ESTÁ EN FUNCIONAMENTO DENDE O 19 DE NOVEMBRO

A Bolsa de Traballo Municipal xa conta con máis de 200 demandantes de emprego e ten culminado dúas insercións laborais

Venres 21 de decembro do 2012

Durante o seu primeiro mes de vida, o servizo ten xestionado e captado dúas ofertas de emprego con éxito. Así, unha persoa da Bolsa de Traballo con experiencia no sector cubriu un posto como dependenta de telefonía móbil nun establecemento de Carballo. E a segunda oferta satisfeita foi para un operario e repartidor nunha panadería, tamén da vila, a pesares da dificultade pola especialización do posto e o horario nocturno. Os dous casos están pechados de forma positiva e co visto e prace non só dos traballadores e traballadoras municipais, senón tamén das empresas, xa que en apenas dous días dispuxeron dunha listaxe de candidatos e candidatas válidos e axustados ao seu perfil, tanto pola formación e experiencia que reflicten os seus currículos, como polas capacidades e habilidades que os responsables da Bolsa captan nas entrevistas personalizadas que levan a cabo cos aspirantes.

Respecto das características dos candidatos e candidatas, trátase de persoas tanto da vila como de fóra dela, especialmente da Costa da Morte, de localidades da contorna ou incluso de grandes cidades e de fóra da provincia. O perfil profesional é variado, aínda que se caracteriza especialmente pola ampla experiencia laboral, sobre todo no sector da construción e relacionados (encofradores, albaneis, electricistas, fontaneiros, operadores de máquinas como retro excavadoras, palistas, etc.). Por outra banda, tamén hai moitas persoas que están comezando a súa vida profesional, contan con ampla formación e preparación no seu currículo e estudos superiores, pero por culpa da crise económica e a súa menor experiencia están en situación de desemprego. Neste caso aspiran a traballar non só en Carballo, senón tamén noutras vilas, cidades ou incluso países. Por último, outro dos perfís máis frecuentes refírese ás mulleres en xeral, e especialmente aquelas que se teñen dedicado ao coidado dos fillos e fillas ou de persoas maiores e que agora, ao cambiaren as súas circunstancias, dispoñen de máis tempo para reinserirse no mercado laboral ou incluso na formación profesional para o emprego.

Contacto e servizo a empresas