CREACIÓN DUN FONDO SOCIAL DE VIVENDAS

O pleno aborda a aprobación ou modificación de seis ordenanzas e o convenio de traslado das dependencias da Xunta ao Fórum

Venres 26 de abril do 2013

Xunto coa ordenanza fiscal de terrazas, a sesión propón a aprobación da modificación do texto refundido da Ordenanza de circulación e utilización das vías públicas no que respecta ás terrazas de hostalería. Neste caso, a modificación estaría destinada a reforzar a seguridade das terrazas en aspectos como a mellora da súa visibilidade. O pleno inclúe tamén a aprobación da Ordenanza fiscal nº 18 reguladora das taxas do Conservatorio Profesional de Música para o curso 2013-2014. Determínase unha suba das taxas do 5 por cento, un pouco superior á suba do IPC. O Alcalde, Evencio Ferrero, quixo subliñar que, a pesar da suba, as taxas só cobren o 31,75 por cento do mantemento do servizo, que é deficitario nuns 200.000 euros. Coa suba do 5 por cento o Concello pasará a achegar o próximo curso 189.526 euros. Hai que resaltar que o Conservatorio acolle alumnos de máis de 17 concellos da contorna. Seguindo coas ordenanzas, a sesión inclúe a aprobación da Ordenanza fiscal número 28 reguladora das taxas por actividades e servizos de control animal. Por esta normativa, regularanse os servizos da Canceira municipal, como por exemplo o pago pola estadía de animais nas instalacións, por sacrificio humanitario, ou pola adopción, que custaría 50 euros e incluiría a vacinación e desparasitación, os trámites administrativos, a colocación dun microchip e o rexistro do animal.

A orde do día recolle a modificación da Ordenanza fiscal nº 10 reguladora da taxa polo servizo de rede de sumidoiros e depuración de augas residuais. Con esta medida quedaría fixado en 14 metros cúbicos o consumo mínimo estimado para o canon de saneamento nas vivendas da zona rural que carecen de contador, fronte aos 18 metros cúbicos que están establecidos na actualidade. E pechando o apartado de ordenanzas, a sesión recolle a aprobación inicial da Ordenanza Municipal reguladora do exercicio de actividades de apertura de establecementos e da realización de determinadas obras menores. Esta norma supón a aplicación da Directiva europea Bolkestein, tamén coñecida como Directiva de servizos. Aínda que foi aprobada en 2006, non foi ata hai pouco que as administracións estatal e autonómica aplicaron as directrices desta normativa, polo que o Concello non puido incorporala até o de agora ás normas municipais. Entre os cambios que supón, está o feito de que os establecementos que queiran iniciar a súa actividade e que non estean sometidos a un informe sectorial só teñan que comunicarllo ao Concello, sen máis xestións. O obxectivo final da normativa é contribuír a axilizar trámites administrativos.

Convenio para o traslado das dependencias da Xunta ao Fórum