BARÓMETRO MUNICIPAL

Carballo experimentou un notable crecemento de poboación en 2005

Mércores 11 de xaneiro do 2006

Os datos de padrón do Barómetro Municipal confirman a existencia de crecemento vexetativo, é dicir, hai máis altas por nacemento que baixas por defunción. As altas son por procedencia doutros concellos e do extranxeiro. No tocante á procedencia doutros concellos, Coristanco e A Coruña sitúanse á cabeza con 86 e 83 altas respectivamente. No tocante ao destino, Malpica e A Coruña son os máis elixidos polas persoas que causaron baixa en Carballo -22 en cada un dos casos-. Pese a todo, Carballo arroxa saldo positivo con calquera dos concellos nos que houbo movemento de altas e baixas. No tocante ás altas por procedencia do extranxeiro destaca o crecemento da colonia uruguaia, con 259 habitantes. O descenso máis acuciante é o dos romaneses, que pasan de 44 habitantes en 2003 a 18 habitantes en 2005. O casco urbano de Carballo foi a que máis altas causou, mentres que o conxunto das parroquias perderon 50 habitantes. Á cabeza sitúase Rus, con 16 baixas, seguido de Razo con 8. O ascenso máis notable deuse en Bértoa, con 19 altas. No referente ás vivendas, contabilízanse 10183 habitadas por xente empadroada en Carballo. As vivendas dun solo habitante (1.800) subiron nun 1,68%, crecemento que tamén experimentaron as de 2, 3 e 4 habitantes. As de 5 e 7 habitantes, pola contra, baixaron. O alcalde de Carballo, Evencio Ferrero, manifestou na presentación do Barómetro Administrativo Municipal que "todo apunta a que en 2006 este crecemento vaise a consolidar ou a incrementar".