.jpg)
TRÁTASE DUN SERVIZO GRATUÍTO EMPRAZADO NO ANTIGO AMBULATORIO
Carballo conta desde hoxe cunha das tres Unidades de Desenvolvemento Infantil e Apoio Familiar (UDIAF) de Galicia
Luns 3 de novembro do 2014
O acto de apertura do servizo contou coa presenza da presidenta da AGAT, Teresa Busto, do Alcalde de Carballo, Evencio Ferrero, da Delegada Territorial da provincia da Coruña, Belén Docampo, e da Secretaria Xeral de Política Social, Coro Piñeiro. Esta última amosou a súa "satisfacción" pola apertura deste servizo xestionado a través dun decreto de decembro de 2013 para a creación dunha Rede Galega de Atención Temperá e que pretende integrar a acción sanitaria, educativa e de benestar de forma transversal para conseguir un servizo de proximidade que apoie tamén ás familias e acadar unha "mellora cualitativa" para todas as persoas afectadas por este tipo de situacións. Piñeiro anunciou xa que o convenio coa AGAT para ofrecer o servizo en Carballo incrementarase o ano que vén e subliñou que o servizo carballés é "a primeira unidade da provincia da Coruña", nunha rede que a Xunta espera seguir aumentando no futuro. Piñeiro confía no persoal para xestionar acertadamente esta nova entidade e subliña que "con que un só neno ou nena poda levar unha educación e unha vida ordinaria grazas ao servizo merece a pena todo este esforzo".
O Alcalde de Carballo, Evencio Ferrero, salientou a relevancia da UDIAF porque "vai atender a familias con necesidades moi importantes" e tamén expresou que "o primeiro é que a poboación este atendida" e conseguir dar pasos para que as persoas con estas dificultades "se integren con total normalidade na sociedade futura". Mencionou a presenza na cita doutra entidade dedicada aos nenos e nenas con necesidades especiais con presenza na vila, Aloumiños, e manifestou a vontade da administración local de colaborar tamén con eles no futuro. Por último, pechou a súa intervención lembrándose do Centro Especial de Emprego de Aspaber, porque "do mesmo xeito que nos enche de orgullo que Aspaber se encargue da limpeza viaria e da limpeza dos centros de ensino", tamén "é un orgullo contar cunha unidade de atención a nenos e nenas con necesidades específicas".
Agradecementos a Xunta e Concello pola súa colaboración
A presidenta da AGAT, Teresa Busto, quixo facer fincapé nos agradecementos. En primeiro lugar para a Xunta de Galicia e Coro Piñeiro, porque despois duns comezos difíciles da entidade, creada no ano 1997, finalmente se fixo posible "que a atención temperá sexa unha realidade tal e como a tiñamos pensada". E en segundo lugar para o Concello de Carballo e Evencio Ferrero, porque "ás veces non é fácil que se vexa a necesidade de crear servizos que non son rendibles", segundo expresou Busto, especialmente a nivel electoral, "porque os resultados vense a nivel familiar e non social". Porén, iso non fai que sexan menos necesarios e importantes e por ese motivo agradece a vontade do Concello de ceder o local e mesmo de axudar no seu acondicionamento. Por último, mencionou a todos os profesionais e socios e socias da AGAT, sen quen sería imposible sacar os proxectos adiante, e cunha mención especial ao rehabilitador infantil Jaime Ponte, a quen describiu como "alma da AGAT".No, "íntimo" e "tremendamente importante acto", en verbas de Ferrero, estiveron presentes numerosos membros da corporación como os concelleiros Belén Lendoiro e Luís Lamas; o líder de TEGA, Manuel Andrade; o do PP Miguel Ferreiro; os deputados nacional e autonómico Marga Varela e Aurelio Núñez Centeno; o Alcalde de Malpica, Eduardo Parga, en representación dos concellos de Bergantiños que tamén se beneficiarán do servizo; e representantes de entidades locais, como Matilde Anido presidenta local de Cruz Vermella. A inauguración pechou coa celebración dun pequeno almorzo.
Os interesad@s poden descargar un tríptico con toda a información do novo servizo, máis abaixo nesta mesma nova en pdf.