UN TOTAL DE 12 CONCELLOS PARTICIPAN NA INICIATIVA

Carballo asina un convenio para participar no proxecto Apego para promover o uso do galego dende as idades máis temperás

Luns 23 de marzo do 2015

Outro dos obxectivos do programa é aumentar o uso do galego no contexto familiar e social dos nenos e nenas nas primeiras idades. Para iso, poranse en marcha diversas accións deseñadas conxuntamente polos concellos participantes, que se adaptarán ás circunstancias concretas de cada municipio. Entre estas accións estará o deseño dunha imaxe común para o programa; a edición dunha campaña informativa con material para distribuír nos espazos que habitualmente atenden ao embarazo e á adopción; ou a elaboración dunha caixa para entregarlles ás embarazadas coa finalidade de preparar a acollida das crianzas, dende a perspectiva da responsabilidade da transmisión da lingua. O programa Apego buscará tamén a creación dunha rede coas familias interesadas en recibir información e recursos de apoio para a crianza en galego. Estas actividades completaranse con obradoiros formativos e coa creación dun espazo-web para informar do desenvolvemento do programa e aglutinar o acceso á información, recursos e redes de apoio á transmisión da lingua.

Ademais do Alcalde de Carballo, asinaron o protocolo esta mañá en Raxoi os alcaldes de Santiago, Agustín Hernández; A Baña, José Andrés García Cardeso; Negreira, Juan Rey Maceira; Redondela, Javier Bas Corugeira; e Rois, Ramón Tojo Lens; os concelleiros de Normalización Lingüística de Ferrol, Martina Aneiros Barros; e de Pontevedra, Demetrio Gómez Xunqueira; os concelleiros de Cultura de Carnota, Iván Franco Grande, e de Ourense, Ana Mª Garrido Rodríguez; e a concelleira de Educación e Bibliotecas de Narón, María del Carmen Espada.