ESTE ANO INCORPÓRANSE AS CATEGORÍAS BIBERÓN E PITUFO

A carreira 10K Carballo estrea o domingo 21 de xuño o seu novo percorrido coa participación de preto de 1.700 corredores

Mércores 17 de xuño do 2015

Outra das novidades é o apadriñamento da carreira por dous laureados atletas galegos: Carlos Adán, olímpico en Barcelona 92 e récord galego de 5.000 metros, e Esther Pedrosa, campioa de España de gran fondo e posuidora de 19 campionatos galegos. Os dous participarán o domingo na 10k Carballo. Respecto das características técnicas da cita, a competición comeza ás 10.00 horas e prolongarase ata arredor das 13.00 horas. Infórmase aos participantes na 10K Carballo, que poderán retirar os dorsais o domingo 21 dende as 8:30 horas, pero tamén o sábado 20 dende as 11.00 até as 13.30 horas e de 17.00 ate as 21.00 horas no edificio do mercado, na praza do Concello. Deberán presentar o DNI ou documento similar acreditativo. Rógase colaboración neste aspecto, especialmente aos participantes da área de Carballo e arredores, pois o feito de retirar o dorsal o día previo facilitará moito o servizo aos corredores o día da proba. Os interesados e interesadas poden descargar máis abaixo o regulamento ao completo da proba en pdf, no que se recollen todos os detalles da cita. Así mesmo, e posible descargar o plano do novo circuíto, tamén a través dun documento en pdf.