.jpg)
OS DÍAS 27, 28 E 29 DE MAIO E 3, 4 E 5 DE XUÑO
Chega a cuarta edición de Carballo por etapas, a ruta gastronómica que percorre a vila co mellor dos nosos produtos
Xoves 19 de maio do 2016
Organización e hostaleiros participantes na presentación da cita no Fórum Carballo
Axober, o Concello de Carballo e vinte establecementos hostaleiros da capital municipal xa o teñen todo listo para celebrar un ano máis Carballo por etapas, a ruta gastronómica que todas as primaveras, desde hai catro, invade a localidade co mellor dos nosos produtos. É unha cita que xa se consolidou como unha actividade que axuda a promover o turismo e as visitas a Carballo, como destacaron o Alcalde, Evencio Ferrero, e o Presidente de Axober, Isidro Varela Bardanca, así como o Concelleiro de Promoción Económica, Xosé Regueira, na presentación da cita que tivo lugar no Fórum Carballo.
A ruta comeza o 27 de maio coa saída do tren turístico que percorrerá os 20 locais que participan
A ruta comeza o venres 27 de maio ás 18.30 horas coa saída do tren turístico que percorrerá todos os locais participantes e que o leva facendo desde a primeira edición para que ninguén quede sen o seu petisco. Hai que lembrar que Carballo por etapas celébrase os días 27, 28 e 29 de maio, e 3, 4 e 5 de xuño, cun formato similar ao das edicións anteriores. Os locais participantes elaborarán tapas específicas para o evento que servirán os venres de 20.00 a 22.00 horas e os sábados e domingos de 12.00 a 14.00 e de 20.00 a 22.00 horas. O prezo da tapa será de 1,50 €, e con cada unha entregarase un rasca co que poden conseguirse numerosos premios directos.
Promoción de Carballo
O presidente de Axober agradeceu a implicación do Concello na organización e destacou o apoio de Conservas Calvo, Adegas Carballo e Proquiber, que tamén tiveron presenza no acto para facer posible un ano máis a ruta gastronómica na que tamén colabora o Concello de Cabana coa cesión do tren. “Carballo por etapas é unha oportunidade máis para seguir promocionando Carballo”, destacou o Alcalde, que aludiu á coincidencia da ruta gastronómica cun fin de semana de ampla oferta deportiva, o que fará que moitas das persoas que visiren Carballo eses días poidan gozar tamén coa gastronomía local. “Hai moitas actividades e moitas prográmanse para que teñan incidencia non sector dá hostalería”, apuntou.
Ferrero destacou ademais a iniciativa do movemento asociativo, cultural, deportivo e empresarial para conseguir “entre todos facer de Carballo un bo lugar para vivir”. Á repercusión de eventos na economía como Carballo por etapas tamén se referiu Xosé Regueira, que expresou o seu desexo de que o tempo tamén acompañe para que a última fin de semana de maio e a primeira de xuño Carballo se encha de xente.
A listaxe de participantes
Os establecementos que decidiron subir este ano ao tren da popular ruta son A Barra Bar, A Cervecería de Luis, Cafés A Cafeteira, Cafetería Abastos, Café Bar Embajador, Café Bar Ginebra, Cafetería Habanos 79, Cafetería Xorima, Cervecería Ágora, Cervecería Beos, Cervecería Dublín, Cervecería La Bombonera, Mesón A Cabaña, Mesón As Viandas, Oasis Restaurante-Vinoteca, Restaurante El Hórreo, Restaurante Mesón do Pulpo, Restaurante Vinoteca A de Pako, Taberna O Mexillón, Tapería Aturuxo e Trattoria Pizzería Vesuvio. A maioría repiten, pero tamén hai algunhas incorporacións.
