.jpg)
AS INSTALACIÓNS CONTARÁN CON HORARIO ININTERROMPIDO
A Biblioteca Rego da Balsa é a quinta de Galicia con máis empréstitos rexistrados en 2015 segundo as cifras da Rede Meiga
O 1º andar abrirase ao público a partir do xoves 8 de setembro
Venres 2 de setembro do 2016
O Alcalde e o Concelleiro de Cultura ofreceron os datos no 1º andar da Biblio
Segundo a estatística da Rede de Bibliotecas de Galicia, a Rego da Balsa é a quinta biblioteca do sistema Rede Meiga que máis empréstitos tivo no ano 2015, ademais de ser a terceira en número de prestararios activos, con 2.127 rexistrados en 2015 e 1.626 que levaron libros de cotío, cunha porcentaxe moi elevada respecto doutras instalacións galegas. Son algúns dos datos que proporcionaron o Alcalde de Carballo, Evencio Ferrero, e o Concelleiro de Cultura, Marcos Trigo, no primeiro andar da Rego da Balsa, que precisamente abrirá ao público a partir do xoves 8 de setembro.
A Rego da Balsa conta con 3.271 usuarios e usuarias rexistrados a 31 de agosto de 2016, ano no que se teñen celebrado 70 actividades
Tanto Ferrero como Trigo amosaron a súa satisfacción polo elevado nivel de uso das instalacións, pensadas "para facer unha biblioteca viva para que a xente goce da lectura e do libro" ademais de para ofrecer unha "programación cultural estable", en verbas do Acalde. Esta percepción está avalada polos datos, con 3.271 usuarios e usuarias rexistrados a 31 de agosto de 2016 e 70 actividades celebradas no que vai de ano con máis de 2.800 asistentes.
A rede de bibliotecas de Carballo, formada pola Biblioteca San Xoán Bautista, a Rego da Balsa e a Ludoteca, conta cun total de 47.159 exemplares nos seus fondos bibliográficos e entre as dúas bibliotecas rexistráronse 19.653 empréstitos en 2015 (con 14.915 na Rego da Balsa e 4.737 na San Xoán Bautista). Estas cifras, explica Ferrero, non só amosan que "o espazo cumpre todas as funcións para os que foi concibido", senón que "a empresa concesionaria responsable da atención ao público tamén cumpre coa concepción que se lle quixo dar".
Duplícanse os puntos de lectura
Por todo o anterior, o Concello quere seguir apoiando o desenvolvemento da Biblioteca, polo que a partir do xoves 8 de setembro estará aberto ao público o 1º andar das instalacións, que duplicará o número de puntos de lectura dispoñibles, hoxe en día os 58 da planta baixa. Marcos Trigo explica que os usos do primeiro andar iranse axustando adaptandose ás necesidades dos usuarios e usuarias, aínda que a idea é crear un espazo máis tranquilo, separado da zona infantil e axeitado para o traballo en grupo ou a celebración de obradoiros.
Un mural de Lidia Cambón anima o recuncho dedicado á banda deseñada con imaxes de Superman, Tintín ou Obélix
O espazo, ademais de con novo mobiliario, conta cun orixinal mural de Lidia Cambón no que se reflicte unha interpretación da banda deseñanda, recollendo cómics tanto de América, como de Asia ou de Europa. Ese será o espazo reservado para a mocidade e no que a banda deseñada tamén terá un protagonismo especial. Astérix, Tintín, Superman ou Candy Candy acompañarán aos rapaces e rapazas nas súas lecturas.
Horario de 10.30 a 20.30 horas
Dende o mes de setembro as dúas bibliotecas municipais abren en horario ininterrompido
Por último e para seguir apoiando a Biblioteca Rego da Balsa, dende o 1 de setembro as instalacións contan con horario ininterrompido, de 10.30 a 20.30 horas de luns a venres e o sábados de 10.00 a 13.00 horas, atendendo as demandas de moitos usuarios e usuarias. Comeza o curso sumándose ao horario ininterrompido que dende o ano pasado xa existe na Biblioteca San Xoán Bautista, que abre de 9.00 a 20.00 horas de luns a venres.
A Biblioteca Rego da Balsa comeza así con forza o novo curso e agarda a todos os veciños e veciñas para que sigan medrando cunhas instalacións que tan só están abertas dende outubro de 2014, e que en dous anos xa rexistran o quinto número de empréstitos de Galicia.
