SERÁ POR UN PRAZO DE CATRO ANOS

Asinado o contrato do servizo de limpeza viaria no municipio que asumirá Aspaber por un prezo de 350.000 euros anuais

Xoves 22 de setembro do 2016

Un momento do acto de sinatura na Alcaldía

A Casa do Concello vén de acoller o acto de sinatura co contrato administrativo de servizos de "Limpeza viaria e servizos conexos do Concello de Carballo, reservado a Centros Especiais de Emprego e Empresas de Inserción Sociolaboral". O responsable da adxudicación será o Centro Especial de Emprego Aspaber SL, cuxos representantes formalizaron o contrato xunto co Alcalde, Evencio Ferrero. O prezo anual de adxudicación é de 356.344,91 euros (IVE incluído) e o prazo de duración do contrato é de catro anos, con dúas posibles prórrogas dun ano previo acordo das partes. Aspaber deberá encargarse, entre outros servizos, da limpeza das rúas, prazas, pasaxes, aparcadoiros e paseos da vila, incluíndo todo o que afecte ao varrido, recollida de residuos, rega, baldeo e desatranque de tragantes. Dita limpeza tamén inclúe a eliminación da vexetación que naza nos pavimentos.

O contrato inclúe a limpeza de vías e espazos afectados pola celebración de festas, festexos ou celebracións de todo tipo

O contrato recolle, así mesmo, a limpeza de parques municipais ( infantís, adultos etc.), xardíns e
zonas axardinadas, no que afecte ao varrido e recollida de residuos, ademais da limpeza dos imbornales, sumidoiros e canaletas de desaugadoiro. Ademais, Aspaber encargarase da limpeza e mantemento de papeleiras, limpeza e eliminación de herbas, limpeza e retirada de excrementos ou a limpeza de fontes e lavadoiros públicos. Cando se requira, tamén efectuarán o baldeo ou regado de rúas, prazas, pasaxes e paseos e a limpeza de vías e espazos afectados pola celebración de festas, festexos ou celebracións de todo tipo.

Limpeza intensiva do espazo da feira e rúa Estrela

Limparase os xoves e os domingos de feira unha vez queden libres as prazas do concello, a zona da Milagrosa e rúas próximas. Realizarase un fregado manual da zona da Estrela os domingos
pola mañá. A requirimento do Concello o contrato inclúe a limpeza de espazos abertos de carácter público e os solares e terreos de propiedade e uso público sen edificar, así como os campos das festas que se indiquen; a retirada de pancartas e a limpeza de pintadas e grafitis incluíndo a retirada de carteis; as limpezas intensivas, limpezas de manchas de pavimentos ou mesmo limpezas de emerxencia.

A limpeza dos servizos conexos inclúe o servizo de limpeza, mantemento, conservación e reparación do mobiliario urbano: bancos de madeira e metálicos, maceteiros e marquesiñas, situados na vía pública ou zonas con xardíns.