COMPITE CON OUTRAS 68 CITAS DE TODA ESPAÑA

O Rockin’ Carballo, nominado por segundo ano aos Premios Fest na categoría de mellor festival de pequeno formato

Venres 7 de outubro do 2016

Rockin’ Carballo 2016

O Rockin’ Carballo, o festival de música alternativa das festas de San Xoán, está nominado por segundo ano consecutivo aos Premios Fest, que supoñen o único recoñecemento en España dedicado exclusivamente aos festivais de música. O Rockin’ opta ao galardón ao mellor festival de pequeno formato (recintos con aforo para entre 3.000 e 10.000 persoas), no que competirá con outros 68 de toda España, incluído o Nordestazo de Malpica.

Os Premios Fest son un selo de calidade de referencia internacional que distingue os mellores eventos

Para a Asociación Cultural San Xoán e para a Concellería de Xuventude de Carballo, que comparten tarefas organizativas no Rockin’, a nominación do festival por segundo ano xa supón un recoñecemento e un renovado impulso de cara á vindeira edición. Os Premios Fest tratan de ser un selo de calidade de referencia internacional que distingue os mellores eventos e que contribúe a fomentar a información, a reflexión e a análise sobre o sector.

Os votos combinados dun xurado profesional e do público a través da web <premiosfest.com> decidirán o gañador, así que, se sodes seareiros do Rockin’... votade!