CITAS NOS IES ALFREDO BRAÑAS E PARGA PONDAL

O alumnado dos institutos de Carballo reflexiona este mes sobre as lesións medulares grazas aos faladoiros da Asociación Íntegro

Mércores 16 de novembro do 2016

Un dos faladoiros de Íntegro no IES Parga Pondal

A Asociación Íntegro volve ás aulas esta semana coa campaña de prevención de lesións medulares que está a desenvolver nos centros educativos de Primaria e Secundaria da Costa da Morte co obxectivo de informar aos estudantes sobre as causas e consecuencias de sufrir un accidente medular e sensibilizalos/as sobre a importancia de evitar situacións de risco que poidan derivar nesta doenza. Tras visitar recentemente aos alumnos/as do CEIP Canosa-Rus, agora é a quenda de dous centros de Secundaria do Concello de Carballo. Así, o mércores 16 de novembro é a segunda quenda para os mozos e mozas do IES Parga Pondal de Carballo, onde xa houbo hai uns días outro faladoiro moi positivo e enriquecedor.

O 22 e 29 de novembro o programa visita ao alumnado do IES Alfredo Brañas, e finalizarase a rolda de visitas en todos os institutos do municipio

Logo de visitar o IES Parga Pondal, os representantes de Íntegro tamén acudirán ao IES Alfredo Brañas para continuar coas actividades de sensibilización. Os días elixidos serán o 22 e o 29 de novembro. Deste xeito, complétase a rolda de visitas aos centros da capital de Bergantiños, iniciada o curso pasado cunha xornada informativa no IES Monte Neme. Durante as sesións faise especial fincapé na natureza das lesións medulares e en cales son algunhas das súas consecuencias, con especial atención á prevención de prácticas de risco asociadas á adolescencia, especialmente, en estradas, praias e piscinas, onde se están a rexistrar o maior número de accidentes entre os máis novos.

Experiencias en primeira persoa

Ademais, os asistentens poden escoitar de boca dos seus protagonistas o relato das súas propias vivencias e as dificultades de vivir sobre unha cadeira de rodas nunha sociedade na que as barreiras físicas e mentais seguen a ser unha materia pendente. Obstáculos e limitacións que o alumnado poderá comprobar en primeira persoa poñéndose no lugar das persoas con mobilidade reducida. Unha experiencia única para poñer a proba a destreza dos rapaces e rapazas pero tamén a súa capacidade de empatía con quen sofre este tipo de situacións na súa vida diaria.

Esta iniciativa, que xa leva máis dun ano percorrendo os colexios das comarcas de Soneira, Fisterra e Bergantiños, está cofinanciada pola Xunta de Galicia e a Deputación da Coruña e conta ademais coa colaboración do Concello de Carballo e coa implicación de varias empresas de ámbito privado.