O Concello de Allariz importa o noso modelo do Horto Infantil Ecolóxico Municipal

Técnicos relacionados co proxecto da Concellería de Promoción Económica realizan unha visita de traballo ao concello ourensán

Mércores 21 de xuño do 2017 Carballo ao día

O Horto Infantil Ecolóxico Municipal de Carballo está a converterse nun modelo a imitar por outras Administracións, entre elas o Concello de Allariz, que quere importar o noso proxecto para poñer en marcha unha iniciativa semellante. De feito, o técnico de Medio Ambiente do concello ourensán realizou recentemente unha visita a Carballo para coñecer a experiencia máis de preto, e este xoves serán o coordinador do Horto e o técnico asesor de Medio Ambiente os que se desprazarán a terras ourensás para prestar asesoramento ao Concello de Allariz de cara á posta en marcha do seu propio horto infantil e escolar.

Decenas de nenas e nenos teñen participado, dende hai máis de dous anos, nas actividades programadas pola Concellaría de Promoción Económica no Horto Infantil Ecolóxico Municipal de Carballo, que está a piques e iniciar unha nova etapa de tres anos de programación estable. O 26 deste mes arrancarán os obradoiros de verán cun total de 42 participantes, todos eles e elas escolares do 2º ciclo de Educación Infantil e de Primaria. O obxectivo desta experiencia, é poñer aos nenos e nenas en contacto coa natureza e a terra, poñer a disposición das familias unha ferramenta de apoio ao labor educador e formativo dos centros de ensino e converterse nun laboratorio de novas ideas e técnicas que fomenten o espírito emprendedor dende a infancia.