Presentados aos grupos municipais os datos da enquisa de mobilidade previa á elaboración da estratexia de mellora do espazo público

O uso “abusivo” do vehículo é unha das conclusións do estudo técnico, que a partir de agora entrará na fase de diagnóstico a través da participación cidadá

Xoves 23 de novembro do 2017 Carballo ao día

Ata agora podiamos intuílo, pero agora xa dispoñemos de datos obxectivos que revelan “un abuso na utilización do coche”. É unha das conclusións dos traballos a pé de campo realizados pola UTE Tema Ingeniería-iPlan como paso previo á elaboración da estratexia de mellora e xestión do espazo público. Os datos foron presentados hoxe por técnicos da empresa nunha xuntanza co alcalde e a concelleira de Planificación e Mobilidade Urbana, os voceiros dos grupos da oposición e o equipo técnico municipal que participa tamén no proxecto.

En Carballo realízanse 74.434 desprazamentos diarios. Os motorizados supoñen o 65,89%, e case todos se fan en coche particular. O uso do autobús é case residual, con 616 viaxes diarias (0,83% do total). En canto aos desprazamentos non motorizados, cada día realízanse 25.395 (34,11%), e coa bicicleta pasa o mesmo que co autobús: o seu uso é mínimo (0,76% do total), o que contrasta coa valoración positiva que fan as persoas enquisadas sobre este medio de transporte. En definitiva, os desprazamentos en coche no casco urbano de Carballo supoñen case o dobre que a pé.

Os traballos de campo realizados polo equipo da UTE Tema Ingeniería-iPlan reflicten que un 31% dos desprazamentos en vehículo privado corresponden a distancias menores de 3 quilómetros, que serían susceptibles de ser realizados en bicicleta ou a pé. Outro dato curioso é que cada carballés/a maior de 15 anos realiza unha media diaria de 2,57 desprazamentos.

En que consistiron os traballos de campo?

Os estudos previos incluíron 351 enquisas telefónicas, 336 enquisas peonís, 1.864 a condutores/as, aforos peonís en tres puntos, aforos de vehículo motorizado en 7 puntos, análise de tres itinerarios con vehículo flotante e inventario e prospección de prazas de aparcamento dispoñibles.

Na xuntanza de hoxe, os representantes dos grupos municipais coincidiron na importancia de abrir o proceso á participación veciñal

Os aforos peonís realizáronse na rúa Fomento (punto 1), no cruce Perú-Pontevedra (punto 2) e na intersección Praza de Galicia-Coruña-Martín Herrera (punto 3). Como se fixeron nun día laborable normal e tamén nun día de mercado, os datos permítennos saber que, por exemplo, un xoves pola mañá pasan polos puntos 2 e 3 case o dobre de peóns que calquera outro día da semana pola mañá. Esa diferenza redúcese moito no punto 1, onde non chega ao 30%. Os días de mercado o tránsito peonil aumenta moito máis, porcentualmente, que o rodado. De feito, nos 7 puntos aforados rexistráronse 34.036 vehículos nunha mañá laborable normal e 36.562 nunha mañá de xoves. Tamén se constata unha redución do tráfico polas tardes, cunha media de 27.150 desprazamentos motorizados. Os vehículos pesados supoñen, nun día laborable medio, o 3,52% do tráfico rodado.

O estudo dos aparcadoiros revela que existe un “uso intensivo” dos máis próximos ao centro, sobre todo os días de mercado, pero a franxa de maior ocupación en xornadas laborables normais é a das 19.00 horas. A medida que nos afastamos diminúe a ocupación, que non supera o 60% en día de feira na franxa horaria do mediodía.

Segunda fase

Unha vez completada a fase 1, o proxecto de elaboración da estratexia de mellora e xestión do espazo público e da mobilidade no concello de Carballo entrará en breve na fase 2, que consistirá na exposición da situación actual e do contraste dos problemas detectados cos axentes sociais. Neste sentido está previsto crear grupos de discusión con distintos sectores, abrir un espazo de suxestións e organizar mesas redondas e foros de debate para chegar a un diagnóstico participado, que será o documento base para a fase 3 (elaboración de propostas). Na xuntanza de hoxe, os representantes dos grupos municipais coincidiron na importancia de abrir o proceso á participación veciñal.