O policía local José Luis Garea recibiu hoxe en Madrid a Medalla ao Mérito da Seguridade Viaria a título póstumo

O director xeral de Tráfico puxo ao axente, que faleceu atropelado en maio, como exemplo do compromiso das policías locais coa seguridade viaria

Mércores 13 de decembro do 2017 Carballo ao día

A viúva e os fillos de José Luis Garea recolleron a medalla [Foto: DGT]

O policía local José Luis Garea, falecido o pasado 21 de maio nun atropelo mentres desenvolvía o seu traballo, recibiu hoxe un novo recoñecemento. A raíz da solicitude realizada no seu día pola Unión Nacional de Jefes  Directivos de Policía Local (Unijepol), a Dirección Xeral de Tráfico concedeulle a Medalla ao Mérito da Seguridade Viaria a título póstumo. Ao acto asistiron a súa viúva e os seus fillos.

José Luis Garea compartiu recoñecemento con Stop Accidentes, a Asociación Nacional de Empresa de Auxilio en Carretera, a Fundación Línea Directa e o programa de TVE Seguridad vital. O director xeral de Tráfico, Gregorio Serrano, que presidiu o acto, apelou ao “compromiso de la sociedad civil” para rematar coas mortes na estrada.

Con respecto ao axente carballés, Gregorio Serrano destacou que “el trabajo de José Luis y el de todos los policías locales es un ejemplo de compromiso con la seguridad vial, ya que las funciones de estos policías no solo se limitan a tareas de vigilancia y control, sino a una amplia gama de actividades muchas de ellas relacionadas con la educación vial y la convivencia".

O director xeral de Tráfico cualificou como "un privilegio hacer entrega de estas medallas a personas y entidades de la sociedad civil, personas y entidades que trabajan en hacer cada día un poco más segura, eficiente y sostenible la movilidad de todos los ciudadanos".