O pasado ano rexistrou o dobre de demandas por alcol e tabaco fronte outras drogas ilegais

Asinado un convenio coa Deputación da Coruña para o financiamento da Unidade de Condutas Adictivas

O servizo, que atende a toda a Costa da Morte, comezou a funcionar no ano 1994 como Unidade Asistencial de Drogodependencias

Venres 28 de setembro do 2018 Carballo ao día

Ánxela Franco e Evencio Ferrero, na sinatura do convenio

Cunha achega de 30.000 €, a Deputación da Coruña contribúe ao mantemento da Unidade de Condutas Aditivas, un servizo que empezou a funcionar hai 18 anos como Unidade Asistencial de Drogodependencias e que atende a toda a Costa da Morte.

A deputada de Benestar Social, Educación e Políticas de Igualdade, Ánxela Franco e o alcalde de Carballo, Evencio Ferrero, asinaron o convenio polo que a Deputación da Coruña se compromete a colaborar no financiamento da Unidade Asistencial de Drogodependencias que, con sede en Carballo, atende aos concellos de Camariñas, Fisterra, Malpica, Cee, Laracha, Muxía, Ponteceso, Coristanco, Laxe, Cabana, Vimianzo, Zas, Corcubión e Dumbría.

O acordo contempla que a Deputación achega un total de 30.000 euros para o financiamento dun servizo que ten un orzamento anual de 235.000 € e que funciona desde 1994, con actividade asistencial desde o ano seguinte.

A Unidade Asistencial de Drogodependencias de Carballo ofrece servizos de asistencia, prevención de consumo de menos risco, incorporación social, documentación e investigación, docencia e coordinación con outros servizos sanitarios e sociais. O balance do último ano de funcionamento indica que, en 2017, o número de demandas de tratamento por substancias legais, o alcol e o tabaco, duplica o número das realizadas por substancias ilegais sendo dun 62,36% fronte a un 37,63%.