Novo paso na consecución de parques infantís inclusivos coa instalación dun “columpio” adaptado no Rego da Balsa

As obras da cuberta do Parque do Anllóns están practicamente listas e a renovada zona de xogos reabrirase, previsiblemente, a semana que vén

Mércores 17 de abril do 2019 Carballo ao día

Columpio adaptado no Parque Rego da Balsa

O Concello de Carballo ten en marcha unha serie de actuacións encamiñadas a adaptar os espazos infantís ás necesidades dos nenos e nenas e a fomentar o xogo como peza fundamental no desenvolvemento das crianzas. Dentro desa filosofía enmárcanse, por exemplo, a construción da cuberta do Parque do Anllóns, que permitirá optimizar o uso dese espazo de xogos, ou a instalación, hoxe mesmo, dunha randeeira adaptada no Parque Rego da Balsa.

Coa colocación deste novo xogo damos un paso máis na consecución de parques infantís inclusivos, onde todos os nenos e nenas poden desfrutar por igual á marxe das súas condicións de mobilidade. Os primeiros elementos adaptados instaláronse no ano 2016 no Parque Eduardo Pondal, e a intención do goberno municipal de Carballo é seguir implantándoos na medida das posibilidades.

A instalación de xogos adaptados dá resposta a unha necesidade e unha demanda social, como tamén o era dispoñer dun espazo cuberto que facilite o ocio infantil tamén no inverno. Ese espazo está creado xa no Parque do Anllóns, que, previsiblemente, a vindeira semana poderá reabrirse para que os nenos e as nenas desfruten dun parque renovado e a cuberto.

No noso concello existen na actualidade máis de corenta parques infantís, todos eles certificados e sometidos a revisións periódicas para mantelos nas mellores condicións. Nesa liña, entre as próximas actuacións previstas figuran a instalación dun tobogán sobre pavimento de caucho no parque infantil do Piñeiro de Entrecruces e a creación dunha nova zona de xogos xunto ao campo da festa de Artes.