Asinado o contrato das obras de abastecemento de auga e saneamento dos lugares de Figueroa e Outeiro, en Sísamo

Os traballos, que levará a cabo a empresa carballesa Construcciones Ramón Vázquez y Reino, teñen un prazo de execución de cinco meses

Martes 28 de maio do 2019 Carballo ao día

A sinatura do contrato realizouse na Alcaldía

O alcalde, Evencio Ferrero, asinou hoxe o contrato correspondente ás obras de abastecemento de auga e saneamento dos lugares de Figueroa e Outeiro, na parroquia de Sísamo, que foron adxudicadas á empresa carballesa Construcciones Ramón Vázquez y Reino por un importe de 257.125 euros. 

A parte máis importante da actuación realizarase no lugar de Figueroa, onde se instalarán un total de 2.297 metros de rede de saneamento e 106 de impulsión, ademais de 62 pozos de rexistro; mentres que para o abastecemento de auga será preciso colocar 2.607 metros de canalizacións e un pozo de bombeo. A reposición do viario afectado realizarase con aglomerado.

No Outeiro a obra será menor porque o lugar xa conta con rede pero é preciso completala. Deste xeito, o proxecto prevé a colocación de 296 metros de canalizacións e 200 máis de impulsión para o saneamento, así coma 12 pozos de rexistro. En canto ao abastecemento de auga, será preciso instalar 277 metros de rede e un pozo de bombeo. Neste caso, as reposicións realizaranse con formigón.

O prazo de execución das obras é de cinco meses.