A Costa da Morte supera a primeira fase para a declaración de Reserva Mundial de Surf

O concelleiro carballés e vicepresidente da Deputación da Coruña, Xosé Regueira, anunciou a boa nova en Razo

Venres 12 de xullo do 2019 Carballo ao día

A candidatura do xeodestino Costa da Morte como 'World Surfing Reserve' avanza coa superación da primeira fase do proceso selectivo que desenvolve a ONG Save the Waves Coalition. Así o anunciou hoxe en Razo o concelleiro e deputado provincial de Turismo, ademais de vicepresidente da Deputación da Coruña, Xosé Regueira, que transmitiu a satisfacción do grupo promotor ao considerar que a proposta está agora moito máis preto de conseguir a declaración como Reserva Mundial do Surf. No acto participaron os alcaldes de Carballo e A Laracha, Evencio Ferrero e José Manuel López Varela.

A praia de Razo, un dos espazos de referencia do surf na Costa da Morte e centro do proxecto, foi o lugar elixido para dar unha noticia de especial impacto no camiño da declaración do xeodestino como Reserva Mundial do Surf. "Cumpríronse as mellores previsións", destacou o vicepresidente da Deputación da Coruña, Xosé Regueira, na intervención na que deu conta da resolución de "Save the Waves Coallition" de estimar a candidatura da Costa da Morte superando a primeira das fases do proceso para o seu recoñecemento.

"Este acontecemento, que é unha extraordinaria e case inesperada noticia na primeira vez que se presenta a candidatura, é resultado do traballo colectivo entre o sector e as administracións", dixo Xosé Regueira

"Este acontecemento, que é unha extraordinaria e case inesperada noticia na primeira vez que se presenta a candidatura, é resultado do traballo colectivo entre o sector e as administracións e grazas a esa implicación conseguimos superar o primeiro corte e demostrar que cumprimos os requisitos para que a nosa opción sexa tida en conta", explicou Xosé Regueira dunha noticia que abre un novo periodo de traballo que concluirá coa presentación da candidatura final antes de fin de ano.

Surfeando en Razo (foto de Oti Fernández)

Na rolda de prensa na propia praia de Razo, o vicepresidente da Deputación anunciou tamén a intención de declarar a Costa da Morte como Reserva Local de Surf como mecanismo para preservar as ondas, sumar alianzas do tecido social e demostrar a sensibilización coa conservación do medio e o crecemento sostíbel. Á beira da sede da escola de surf máis antiga do Estado pertencente a un sector que está a gañar forzas no territorio, con areais identificados e recoñecidos pola xente do surf nos que o mar responde con ondas que fan óptimo para o deporte todos os días do ano, Xosé Regueira destacou as fortalezas da Costa da Morte nesta carreira que comeza agora e que, segundo anunciou, continuará co obxectivo de conseguir a declaración oficial.

Impulso da Deputación

A Deputación da Coruña impulsou a creación do grupo promotor do proxecto no que participan representantes de diversos organismos e entidades do sector. O recoñecemento ten como obxectivos sentar as bases para lograr o impulso do surf na Costa da Morte a través da protección e posta en valor das ondas e avanzar no artellamento dun modelo de desenvolvemento sostible arredor do surf. De conseguir a Declaración, Costa da Morte pasaría a ser a Reserva Mundial de Surf número doce do mundo, sendo a demais a primeira do Estado español, e a segunda de Europa.

Imaxe da primeira xuntanza do grupo promotor, celebrada no Fórum Carballo

A primeira fase do proxecto finaliza así felizmente ao superar a barreira que establece "Save the Waves" e que sitúa á Costa da Morte moito máis cerca de ser considerada Reserva Mundial de Surf. A declaración supón importantes beneficios para os territorios tanto na atracción de turismo como na sostibilidade da zona. "Save the Waves" estimou a Carta de Candidatura de Costa da Morte como Reserva Mundial de Surf que presentaba as fortalezas da Costa da Morte nos catro bloques de contidos establecidos: a calidade e consistencia das ondas, a cultura e historia do surf no territorio, as características ambientais únicas do medio e o apoio local á candidatura, para o cal se ten constituído o Grupo Promotor, que integra representantes de organismos públicos e grupos de interese sectoriais.

O documento agora avalado por "Save the Waves" é o resultado dun ambicioso traballo que se desenvolveu durante meses no que se presentaban os principais valores do territorio e o apoio local á declaración. A candidatura busca impulsar a práctica do surf na Costa da Morte, a través da protección e posta en valor das ondas ademais de avanzar nun modelo de desenvolvemento sostible arredor do surf. Coa declaración, a Costa da Morte convertiríase na segunda Reserva Mundial de Surf declarada en Europa, tras da portuguesa Ericeira, e na doceava a nivel mundial.

Vídeos