A Concellaría de Educación traballa na posta a punto dos centros escolares de cara ao comezo do novo curso

A concelleira Mar Eirís, o concelleiro Luis Lamas e o alcalde achegáronse ata o CEIP Fogar, onde o Concello acomete melloras a maiores da reforma integral contratada pola Xunta

Xoves 29 de agosto do 2019 Carballo ao día

O Concello financia a instalación do novo pavimento nun dos ximnasios do CEIP Fogar

Aínda non empezou o curso, pero nos centros escolares do noso concello xa hai actividade porque dende a Concellaría de Educación estanse a realizar os traballos de posta a punto previos ao comezo das clases.

A concelleira de Educación, Mar Eirís, recolle todos os anos a fin de curso as peticións de arranxos, melloras ou investimentos en todos os colexios e escolas unitarias. Hainas de todo tipo, desde pequenas actuacións de electricidade, fontanería ou limpeza, ata obras de máis envergadura como o cambio de ventás. Pero ademais das necesidades concretas de cada centro, dende o Concello de Carballo aténdense outras que afectan a todos, como os controis periódicos da calidade da auga, a limpeza dos areeiros ou as accións de desinfección, desinsectación e desratización, que tamén se están realizando nestas datas previas ao comezo do curso.

Obras no CEIP Fogar

A obra que acomete a Xunta inclúe o revestimento das fachadas

Entre as obras en marcha figura a instalación de novo pavimento nun dos ximnasios do CEIP Fogar, onde o Concello de Carballo está a colaborar tamén no acondicionamento dos novos despachos da área de dirección, e nos vindeiros días instalaremos novas canastras e porterías nas pistas exteriores. 

A concelleira de Educación, o concelleiro de Obras e Servizos e o alcalde achegáronse hoxe ata o centro para comprobar, acompañados por membros do equipo directivo, o desenvolvemento dos traballos, que coinciden coa gran reforma que está a acometer a Xunta de Galicia, cun orzamento de 1,5 millóns de euros, e que cambiará por completo un edificio que está a piques de celebrar o seu 50º aniversario.

Coa finalidade de mellorar a eficiencia enerxética do histórico edificio tamén se renovarán ventás e persianas, ademais de substituír as antigas luminarias por outras de alta eficiencia enerxética, con equipos de regulación lumínica e detectores de presenza. Ao mesmo tempo colocarase illamento térmico na cuberta. Todo para reducir o consumo enerxético e as emisións de dióxido de carbono.

A maiores, a obra que financia a Xunta inclúe a renovación das carpinterías, os radiadores, o pulido do pavimento e outras melloras no interior do colexio carballés, un dos máis grandes de Galicia.