Todos os escolares de 4 e 5 anos participarán este trimestre no programa de visitas guiadas á Biblioteca Rego da Balsa

O luns 14 de outubro arranca unha nova campaña de difusión dun dos recursos culturais máis importantes da Costa da Morte

Domingo 13 de outubro do 2019 Cultura

Imaxe dunha visita do ano pasado

Un total de 598 escolares de catro e cinco anos de idade participarán este trimestre no programa de visitas guiadas á Biblioteca Rego da Balsa, unha iniciativa da Concellaría de Cultura para que as nenas e os nenos empecen a familiarizarse coa “Esencia perenne” dun recurso cultural único na Costa da Morte.

Alumnos e alumnas dos colexios Bergantiños, Fogar, A Cristina, San Luís Romero, Artai, Gándara-Sofán, Nétoma-Razo, Canosa-Rus e CRA Ponte da Pedra participarán nunha actividade duns 45-50 minutos de duración que inclúe unha visita guiada pola zona infantil e unha función de contacontos cos Ratos de Lonxedetodo da compañía teatral Trinketrinke . Ademais, cada un dos cativos e das cativas levará un agasallo.

As sesións comezarán o luns 14 cos coles Fogar e Bergantiños e continuarán o martes 16 (Fogar, A Cristina e Canosa-Rus), o luns 4 de novembro (San Luís Romero, Nétoma-Razo e Bergantiños), o luns 11 de novembro (Artai e Gándara-Sofán) e o martes 12 de novembro (CRA Ponte da Pedra).

Outras propostas para a rapazada

Dende as Bibliotecas de Carballo este curso lévanse a cabo visitas e propostas culturais para o alumnado dos distintos ciclos coa finalidade de que coñezan todos os recursos que teñen á súa disposición.

A vindeira semana, de feito, as nosas bibliotecas acollerán tres novas actividades do programa Ler Conta Moito. O luns 14 teremos na Ludoteca Municipal o espectáculo “Onde está o vento”, de Animar-T, destinado a nenos e nenas de 1 a 3 anos. O mércores 16 Ernesto Is achegará á rapazada de 4 a 11 anos, tamén na ludoteca, as “Historias sorprendentes para nenos e nenas diferentes”, e o xoves 17 recibiremos na Biblioteca Rego da Balsa a Peripeciencia Colectivo m=!!! cunha proposta para nenos e nenas de 7 a 12 anos, Be water! Nos tres casos é preciso reservar convite previamente.