Case cen persoas participaron nas sesións informativas sobre a couza da pataca

Noicela é, polo momento, a única parroquia afectada pola prohibición de plantar patacas

Venres 13 de decembro do 2019 Carballo ao día

Unha das sesións informativas tivo lugar no Centro Social de Vilela

O Diario Oficial de Galicia (DOG) publica nesta resolución da Consellería do Medio Rural a declaración da parroquia de Noicela como zonas infestada pola couza da pataca. Técnicos do departamento autonómico achegáronse este xoves ata os centros sociais de Imende e Vilela para explicar á veciñanza as consecuencias desa declaración, que implica a prohibición de plantar só en Noicela pero que tamén afecta ás parroquias limítrofes. Case cen persoas participaron nas sesións informativas, ás que tamén asistiron o alcalde, Evencio Ferrero, e o concelleiro de Obras e Servizos, Luis Lamas.

Na parroquia de Noicela, ao igual que nas larachesas de Lendo e Caión, que tamén están infestadas, só se poderá adquirir para consumo propio tubérculo de fóra desa zona embolsado e etiquetado preparado para o consumidor final, precisamente porque o movemento de pataca a granel estará prohibido, igual que no resto de concellos demarcados.

Zona tampón

A maiores, para que o insecto non se estenda, establécense mediante a citada resolución zonas tampón nas parroquias limítrofes ás afectadas. Nelas tomaranse medidas específicas, como que os agricultores deberán comunicar, inmediatamente despois da sementeira, todas as parcelas cultivadas con pataca, segundo o modelo establecido para ese fin.

Para a produción de pataca nestas zonas cualificadas como tampón, será preciso aplicar as medidas establecidas no Real decreto 197/2017 publicado polo Ministerio de Agricultura, Pesca e Alimentación, tales como un tratamento fitosanitario durante a fase de tuberculinización e antes da colleita. As patacas recollidas non se poderán dedicar a semente mentres a praga non se dea por erradicada. Así mesmo, o seu movemento realizarase sempre en vehículos pechados ou cubertos cunha malla.

No caso dos comercializadores, para a súa produción aplicaranse outras medidas a maiores, recollidas tamén na mesma normativa, entre as que se atopan a instalación de mallas tupidas e de trampas de captura de tecia nos almacéns, así como a necesidade de mover as patacas co seu correspondente pasaporte sanitario.

Pola súa banda, a Consellería do Medio Rural establecerá as medidas necesarias para evitar a propagación deste organismo a outras zonas produtoras, reforzando a rede sistemática de puntos de trampeo existente para evitar a súa propagación ás parroquias lindeiras. Neste sentido, dende as Administracións faise un chamamento á colaboración da veciñanza para acatar as indicacións e evitar que a couza continúe estendéndose.

Ligazóns