A Escola Municipal de Hostalaría elaborou case 2.000 menús para persoas en situación de vulnerabilidade

Profesorado e representantes municipais agradeceron a implicación e a solidariedade do alumnado, que remata a formación no Fórum para incorporarse ás prácticas

Luns 22 de xuño do 2020 Carballo ao día

Hoxe foi día de despedidas na Escola de Hostalaría

A Escola Municipal de Hostalaría elaborou entre o 28 de abril e o 19 de xuño case 2.000 menús para veciños e veciñas do noso concello en situación de vulnerabilidade. O venres apagáronse os fogóns da aula de cociña por este curso, e hoxe foi día de avaliación e de agradecementos por parte dos profesores Fernando Agrasar e José Manuel Martínez; do concelleiro de Formación e Emprego, Iván Andrade, e da concelleira de Igualdade e Benestar, Maica Ures, ao alumnado pola súa implicación e o seu traballo voluntario para axudar ás familias con máis necesidades.

“Malia os atrancos que tivemos, estou moi orgulloso de como rematou o curso”, sinalou José Manuel Martínez, que o venres ten unha nova cita cos seus alumnos e alumnas para as cualificacións finais. “Quedounos unha parte do programa formativo sen poder ver, pero do que non cabe dúbida é de que esta experiencia vaivos dar moita máis soltura na cociña que vos resultará moi útil á hora de realizar as prácticas”, engadiu Fernando Agrasar.

Ao orgullo e o agradecemento pola implicación do alumnado sumouse o concelleiro Iván Andrade, ademais de animar aos cociñeiros e cociñeiras a aproveitar as prácticas para “que poidades atopar un futuro laboral”. Especialmente agradecida, en nome propio, do persoal de Servizos Sociais e das familias usuarias, amosouse Maica Ures, “porque co voso gran de area, que foi moi grande, axudastes a mellorar a calidade de vida para moitos veciños e veciñas. Penso que a experiencia foi unha aprendizaxe didáctica para vós, pero para o resto da sociedade foi unha aprendizaxe de solidariedade”.