A feira da Milagrosa esténdese cara o San Martiño para facilitar a súa celebración coas medidas de distanciamento precisas

Carballo recupera este domingo a venda ambulante na contorna do Campo da Feira

Mércores 24 de xuño do 2020 Carballo ao día

Este domingo volven as feiras ao barrio da Milagrosa, recuperando deste xeito un mercado tradicional e favorecendo o regreso á actividade dos vendedores ambulantes. Pero distribuír 150 postos coas medidas de distanciamento precisas non é doado, e por iso optamos por estender a feira cara o San Martiño, propiciando unha zona de paseo que xa é utilizada de maneira habitual nos desprazamentos entre os mercados do Campo da Feira e da Praza do Concello. No plano axunto podedes ver cal será a distribución dos postos. 

Dende a Concellaría de Feiras e Mercados agradecemos a colaboración dos vendedores ambulantes e da veciñanza das rúas que pasarán a formar parte a partir deste domingo, e mentres a situación sanitaria así o aconselle, do espazo da feira.

Na Praza do Concello tamén se manterá a distribución das últimas semanas, dende que se recuperaron os mercados dos xoves e as feiras dominicais de produtos de alimentación, horta e flores. 

En calquera caso, tanto nunha feira coma na outra, será preciso que vendedores e compradores respecten as medidas de seguridade e hixiene, utilizando mascarillas, realizando unha hixiene axeitada de mans, evitando tocar os produtos e respectando as distancias. 

Lembramos, así mesmo, que mañá xoves, malia ser festivo local, celebrarase o mercado na Praza do Concello e o Mercado Municipal estará aberto de 08:30 a 14:00 horas. O venres funcionará no horario habitual de mañá e tarde, e tanto o sábado coma o domingo de feira estará aberto pola mañá.