SOLICITA UN FUNIL NA CASA DO CONCELLO

A recollida de aceite usado seguiu aumentando no primeiro semestre do ano, cunha media mensual de 1.307 quilos

Neste momento están dispoñibles 28 colectores en distintos puntos da zona urbana e nas parroquias de Razo, Lema, Noicela, Berdillo, Ardaña, Artes e Sísamo

Xoves 2 de xullo do 2020 Carballo ao día

Os funís poden solicitarse, de balde, no Concello

No primeiro semestre deste ano recolléronse no noso concello 7.843 quilos de aceite de cociña usado. A media mensual sitúase, polo tanto, en 1.307 quilos, case douscentos máis que o ano pasado, o que reflicte a boa acollida do servizo de recollida selectiva que puxemos en marcha en agosto do ano 2018.

Nestes momentos hai 28 puntos de recollida, a maior parte distribuídos polos distintos barrios do casco urbano. Pero a experiencia piloto que iniciamos en Razo, Pedra do Sal e Berdillo esténdese polas parroquias a petición da veciñanza, e nestes momentos xa hai contedores tamén en Ardaña, Sísamo, Artes e Noicela. Os colectores máis utilizados son os situados xunto ao Centro Comercial Bergantiños, xunto á oficina de Caixabank na avenida de Fisterra e no Mercado Municipal.

Unha das vantaxes deste novo sistema é que os colectores están situados na vía pública, o que permite que poidan ser utilizados os 365 días do ano e as 24 horas do día. A recollida nos novos colectores vai dirixida aos fogares.

Evencio Ferrero e Luis Lamas, en Imende (imaxe de arquivo)

As familias deben depositar o aceite de cociña usado en botellas de plástico reutilizadas e pechadas. Para facilitar o depósito, desde o Concello de Carballo ofrecemos á veciñanza funís adaptables ás botellas, que poden solicitarse, de balde e ata fin de existencias, na Casa do Concello (departamento de Medio Ambiente).

Os aceites de cociña son altamente contaminantes. Por cada litro que recollemos evitamos a contaminación de 1.000 litros de auga. Ademais, evitamos problemas de drenaxe nas tubaxes e nos desaugadoiros e avarías nas depuradoras, e reducimos a dependencia de combustibles fósiles, ao poder transformar este residuo en biocombustible ecolóxico, diminuíndo ao mesmo tempo a contaminación atmosférica.