SEMANA EUROPEA DA MOBILIDADE

Concello e Íntegro colaboran para seguir mellorando a accesibilidade nos distintos barrios urbanos

Unha campaña sobre as tarxetas de aparcamento para persoas con mobilidade reducida e unha ruta para "chequear" a accesibilidade centraron esta xornada

Luns 21 de setembro do 2020 Carballo ao día

Pola mañá ocupáronse varias prazas de aparcamento con axudas técnicas

O Concello de Carballo quere seguir contando coa Asociación Íntegro para mellorar a accesibilidade e a mobilidade das persoas con diversidade funcional. Desa colaboración, que vén xa de anos atrás, xurdiu a celebración do Día da Accesibilidade dentro da programación da Semana Europea da Mobilidade. Ese día foi hoxe, e moi completo, cunha campaña sobre os aparcamentos reservados para persoas con mobilidade reducida pola mañá e unha ruta para “chequear” a accesibilidade nos barrios da Milagrosa e A Cristina pola tarde.

Aínda que tamén se repartiron os folletos informativos sobre as tarxetas de aparcamento para persoas con mobilidade reducida que podes descargar máis abaixo, o máis rechamante da xornada matinal foi a ocupación de varias prazas de aparcamento da rúa Cervantes con cadeiras de rodas e distintas axudas técnicas, xunto con carteis nos que podían lerse algunhas das “escusas” utilizadas con máis frecuencia polas persoas que ocupan as prazas para persoas con mobilidade reducida: “Son só 5 minutiños”, “Será só un momentiño”, “Volvo nun santiamén”, “Non teño tarxeta... pero non pasa nada, non?”, “Non sabía que aquí non podía aparcar”...

O concelleiro de Mobilidade e o alcalde, co presidente e dúas representantes de Íntegro

“O que queremos simbolizar _explicou Adolfo López Baña, presidente de Íntegro_ como se sente un cidadá cando lle ocupan unha praza de aparcamento e non pode aparcar. Pois a nós moitas veces pásanos o mesmo”. Dende Íntegro inténtase reivindicar, por unha banda, “que o noso tempo vale o mesmo e que as prazas reservadas non son un capricho, senón unha necesidade”, pero tamén que existe fraude de lei no uso das tarxetas “por usuarios que non teñen discapacidade, e iso, ademais dun fraude, moralmente é tamén algo reprobable”.

O alcalde, pola súa banda, expresou o recoñecemento do Concello de Carballo a Íntegro polo seu “traballo incansable en favor da integración, en favor desas sociedades inclusivas nas que todas as persoas, independentemente das súas habilidades e das súas capacidades para moverse, teñen que ter a identidade de que o espazo urbano é para todos. E, nese sentido, colaboramos dende o Concello de Carballo con esta asociación exemplar, porque só así podemos facer esa sociedade que eduque neses valores”, indicou Evencio Ferrero.

A ruta da accesibilidade arrincou do Fórum

Pola tarde, acompañados polo concelleiro de Mobilidade, Juan Seoane, usuarios e usuarias de Íntegro realizaron unha ruta polos barrios da Milagrosa e A Cristina para “chequear” a accesibilidade. Froito destes percorridos están en marcha nestes momentos proxectos como o de mellora da accesibilidade na Milagrosa e a rúa Vázquez de Parga, e a intención do Concello de Carballo é seguir actuando, na medida das posibilidades, en todos os barrios.

A Semana Europea da Mobilidade rematará mañá coa colocación de aparcabicis e o pintado de rutas do pedibús.