O NÚMERO DE CASOS ACTIVOS SITÚASE XA EN 392

A comisión de seguimento da COVID-19 adoptou novas medidas de prevención ante a preocupante escalada dos contaxios

A Policía Local recuperará o sistema de quendas que utilizou durante o estado de alarma e reforzará o control sobre o cumprimento da normativa

Xoves 28 de xaneiro do 2021 Carballo ao día

A comisión de seguimento reuniuse hoxe

A comisión de seguimento da COVID-19 celebrou hoxe unha xuntanza para avaliar as novas restricións establecidas pola Xunta de Galicia para intentar frear o avance da enfermidade. “Estamos nunha situación de máxima emerxencia sanitaria, con risco de colapso do sistema sanitario, e a área sanitaria A Coruña-Cee é a que peor está”, manifestou o alcalde, Evencio Ferrero.

Hoxe no noso concello acadamos un novo récord, con 392 casos activos, segundo os datos remitidos polo Sergas. Ante o incremento dos contaxios tan preocupante que se está a producir nos últimos días, xa que temos 160 casos activos máis que hai unha semana, o goberno municipal propuxo a adopción dunha serie de medidas que contan co aval da comisión de seguimento, e que son as seguintes:

Para preservar a saúde dos/as axentes e garantir o servizo á cidadanía, a Policía Local traballará en grupos burbulla e recuperará o sistema de organización que xa se utilizou durante o estado de alarma. Deste xeito, haberá dúas quendas diarias de traballo, unha de día e outra de noite, e extremaranse as medidas de control e hixiene tanto nas dependencias coma nos vehículos policiais.
Dado que non existen indicacións noutro sentido por parte da Administración competente, no noso concello manteranse feiras e mercados, coas medidas de distanciamento e prevención esixibles, posto que a alimentación é un servizo esencial e a actividade comercial pode realizarse ata as 18.00 horas. Aínda que, por mor dos peches perimetrais, a afluencia tanto de compradores/as coma de vendedores/as é moito menor do habitual, a Policía Local reforzará o control para evitar a afluencia de persoas doutros concellos e tamén a formación de grupos de persoas non conviventes.
O Mercado Municipal tamén modificará o seu horario para contribuír a que se produza unha menor mobilidade, como tamén se fixo no mes de marzo, de xeito que abrirá de maneira ininterrompida ata as 15.00 horas.
Seguindo tamén as indicacións da Xunta de Galicia, o Concello de Carballo procedeu ao peche de instalacións deportivas e culturais, bibliotecas, oficina de turismo, centros sociais... Dada a elevadísima incidencia do coronavirus no noso concello, e conscientes de que o principal obxectivo debe ser a preservación da saúde e a redución dos contaxios, aos citados equipamentos sumaranse tamén os parques de xogos e as pistas multideporte para intentar reducir aínda máis as posibilidades de contacto e, polo tanto, de propagación da enfermidade. Dende o Concello de Carballo recoméndase a práctica de actividades ao aire libre en espazos abertos pero sempre de forma individual ou coas persoas da mesma unidade de convivencia, como manda a normativa actual.
Dado que os prazos administrativos non están suspendidos, e a tramitación do plan especial de Arnados (Razo) segue o seu curso, o servizo de atención aos veciños e veciñas afectados manterase nas mesmas condicións que ata agora, con cita previa e atención individualizada.

A comisión de seguimento da COVID-19 volverá a reunirse a semana que vén.