A Senda do Mar Razo-Baldaio recibe un ano máis o distintivo Sendeiro Azul da asociación ADEAC
O concelleiro Juan Seoane asistiu ao acto de entrega das bandeiras, celebrado este venres na Cidade da Cultura de Santiago de Compostela
Venres 24 de febreiro do 2023 Carballo ao día
![Ángeles Vázquez, Alfonso Rueda, Juan Seoane e José Palacios Ángeles Vázquez, Alfonso Rueda, Juan Seoane e José Palacios](media/../media/img/230224_Cortesia_DCS_129.jpg)
Ángeles Vázquez, Alfonso Rueda, Juan Seoane e José Palacios
Galicia é a comunidade autónoma con máis sendeiros azuis, un galardón outorgado pola Asociación de educación ambiental e do consumidor (Adeac), a mesma que concede as bandeiras azuis. Entre os 29 itinerarios galegos galardoados este ano figura a Senda do Mar Razo-Baldaio. Hoxe tivo lugar na Cidade da Cultura de Santiago de Compostela a entrega das bandeiras que identificarán os sendeiros azuis. No acto, presidido por Alfonso Rueda, participou o concelleiro de Mobilidade, Seguridade, Feiras e Mercados, Juan Seoane.
A Senda do Mar Razo-Baldaio é un itinerario de 5,5 quilómetros de lonxitude que une o porto de Razo co espazo natural de Baldaio pasando polas nosas praias que ano tras ano veñen revalidando a bandeira azul. O fallo deste ano darase a coñecer a principios de maio, como se avanzou no acto de hoxe.
![](media/../media/img/SENDEIRO_AZUL_800X460.jpeg)
As praias de Pedra do Sal, Baldaio-Saíñas e Razo contan ademais cos certificados ISO 14001:2015, vixente ata outubro deste ano, e EMAS (Certificado do Esquema Europeo de Ecoxestión e Auditoría) ,que implican un compromiso coa prevención da contaminación, a mellora continua do areal, a xestión de residuos e a atención aos usuarios e usuarias. A calidade ambiental e a excelencia na prestación dos servizos son os eixos arredor dos que xira a acción do Concello de Carballo nas praias.