A Deputación inicia o pago das expropiacións para as obras da terceira e última fase da travesía de Sísamo
As 103 persoas que figuran como titulares catastrais dos terreos afectados están convocados para os días 24 e 25 deste mes
Xoves 20 de abril do 2023 Carballo ao día
![As obras mellorarán toda a estrada, dende Carballo ata o lugar do Outeiro As obras mellorarán toda a estrada, dende Carballo ata o lugar do Outeiro](media/../media/img/0SISAMO_800X.jpg)
As obras mellorarán toda a estrada, dende Carballo ata o lugar do Outeiro
A Deputación da Coruña impulsa a terceira e última fase das obras de pavimentación e construción de beirarrúas e zonas de aparcamento na estrada provincial DP 1901 Carballo-Sísamo co pago dos depósitos previos e indemnizacións pola rápida ocupación en expedientes de expropiación forzosa. O día 18 publicouse no BOP o anuncio destes pagos a 103 titulares de terreos desta vía, que están convocados para os días 24 e 25 de abril, en horario de tarde, no segundo andar da casa do concello, para recibir as indemnizacións que permitan comezar unhas obras moi demandadas pola veciñanza.
O proxecto, aprobado hai catro meses, supón un importante investimento de 2,4 millóns de euros, dos que a Deputación achegará 1.789.000 euros para a execución das obras de pavimentación e construción de beirarrúas e zonas de aparcamento na DP 1901 Carballo-Sísamo, mentres que o Concello de Carballo financiará con 652.006 euros a dotación de servizos como saneamento e abastecemento de auga, instalación de mobiliario urbano e xardinería. Resérvanse ademais 116.835 euros para as expropiacións.
O investimento total das tres fases (2,7 millóns de euros de fondos provinciais e 652.000 do Concello de Carballo) farán desta obra un dos investimentos máis importantes acometidos pola Deputación na rede provincial de estradas nos últimos anos.
Descrición das obras
![As obras darán continuidade á mellora realizada na zona urbana da vía As obras darán continuidade á mellora realizada na zona urbana da vía](media/../media/img/estrada_sisamo.jpg)
As obras darán continuidade á mellora realizada na zona urbana da vía
As obras de reurbanización parten do punto quilométrico 0+810 (final da segunda fase) no entronque co acceso ao instituto de Monte Neme e continúan até o final da via no lugar do Outeiro (PK 2+570), mellorando e completando as infraestruturas tanto no tramo máis urbano coma no rural e adaptando a vía á mobilidade urbana a un ou dous niveis, dependendo da zona.
As obras seguirán a mesma liña das fases anteriores: ancheamento e pavimentación da plataforma, construción de beirarrúas de baldosa hidráulica cun ancho medio de 1,40 metros e dotación de servizos urbanos como saneamento e abastecemento de auga e alumeado con luminarias de LED de aceiro inoxidable
A veciñanza de Sísamo demandaba completar as obras da travesía ata o final da estrada, no lugar do Outeiro. Unha vella demanda que será posible grazas aos dous convenios de colaboración entre a Deputación e o Concello de Carballo, que asinaron o pasado mes de decembro o presidente Valentín González Formoso, e o alcalde deste municipio, Evencio Ferrero. Nos convenios delégase a contratación e execución das obras no Concello de Carballo e establécense as cantidades económicas a aportar por cada administración e o seu obxecto, así como a cesión da titularidade da travesía ao Concello unha vez rematados os traballos.