En marcha as obras de mantemento de vías, que abranguen tanto a zona urbana coma as parroquias

Xoves 13 de marzo do 2025

Hoxe pavimentouse a rúa Álvaro Cunqueiro

A empresa Vázquez y Reino está a executar as obras incluídas no contrato de servizos de conservación, mantemento e reparación das vías municipais, que ten adxudicado desde o 2023 por un período máximo de catro anos e un orzamento total de 1,4 millóns de euros.

O contrato divídese en dous lotes: un correspondente ás vías urbanas e outro, ás rurais. Tal como recolle o prego de prescricións técnicas, a empresa encargarase de realizar as melloras necesarias de conservación, mantemento, reparación da base e do firme das rede viaria, así coma da drenaxe das vías. Deste xeito, entre os traballos que debe levar a cabo, sempre seguindo as indicacións dos técnicos municipais, figuran a limpeza e apertura de gabias, reparación de fochancas, renovación da capa de rodaxe, fresado, reforzos de firme, pavimentacións ou reparacións de beirarrúas, entre outros.

Esta semana, os equipos están a traballar na zona da estrada de Malpica e da contorna da avenida Ponte da Pedra. Nos vindeiros días os traballos iranse estendendo pola zona urbana e polo resto do territorio municipal.