LUZ VERDE ÁS BASES DO CERTAME FOTOGRÁFICO XOSÉ MANUEL EIRÍS
Luns 28 de xaneiro do 2013
A Xunta de Goberno Local reunida en sesión ordinaria vén de aprobar o expediente de contratación para a creación dunha "Rede de saneamento en Pedra Furada" cun prezo de licitación de 39.506,88 euros. A actuación está incluída no Plan Provincial de Cooperación ás Obras e Servizos de Competencia Municipal, POS Adicional 2012. Entre os criterios para a adxudicación do contrato, o de máis peso é a oferta económica, aínda que tamén se terán en conta o programa de traballo e o programa de actuación medioambiental, así como a redución de prazos de execución. Dentro do apartado de contratación, a sesión tamén supuxo a adxudicación do Contrato administrativo de subministro por renting para a "Implantación dun servizo integral de impresión no Concello de Carballo". A responsable será a empresa Fornecementos Galegos SL e o prezo de adxudicación, por un prazo de 48 meses, é de 55.991,04 euros. O prezo de exceso de copias por páxina en branco e negro é de 0,011 €, mentres que o prezo por páxina impresa ou copiada en cor é de 0,079 €. O licitador comprométese á entrega e instalación dos bens ofertados no prazo máximo dun mes a contar dende o día seguinte ao da formalización do contrato. Así mesmo, executará á súa costa as melloras técnicas ofertadas.
COMPARECENCIA NO PLENO DOS AFECTADOS POLAS PREFERENTES
Venres 25 de xaneiro do 2013
A corporación carballesa celebra o luns 28 de xaneiro ás 20.30 horas unha sesión plenaria ordinaria que inclúe entre os asuntos da orde do día a dación de conta do Informe de Intervención e Tesourería de cumprimento da Lei 3/2004 de loita contra a morosidade correspondente co último trimestre de 2012, un informe que as administracións locais deben facer público obrigatoriamente. Segundo este documento, o Concello abonou un total de 1.440 facturas entre o 1 de outubro e o 31 de decembro, das que 1.378 -por un importe de 2.273.077,36 euros-, foron pagadas nunha media de 14,94 días; e as restantes 62 facturas -por un importe de 115.682,78 euros- foron satisfeitas nun prazo medio de 56,40 días. O prazo medio de pagamento, contabilizando a totalidade de facturas presentadas entre outubro e decembro, é de 15 días xustos. Hai que lembrar que no trimestre anterior esta media era de 21,11 días, polo que en tan só tres meses os servizos económicos municipais reduciron a media en máis de 6 días. Nestes momentos, o Concello non ten pendente de pago ningunha factura fóra do período legal, xa que as que había pagáronse de acordo cun recoñecemento extraxudicial de crédito aprobado por un pleno extraordinario da corporación celebrado o 10 de xaneiro. Por tanto, están cumpridas, a 25 de xaneiro de 2013, todas as obrigas por facturas do exercicio 2012.
O PROGRAMA TRANSCORRE ENTRE O 8 E O 16 DE FEBREIRO
Venres 25 de xaneiro do 2013
A partir do martes 29 de xaneiro está aberto o prazo de inscrición no Concurso de Disfraces, Comparsas e Carrozas (na imaxe un dos gañadores de 2012) organizado polo Concello de Carballo e que se celebra o domingo 10 de febreiro na Praza do Concello ás 18.00 horas. Para a inscrición, os interesados e interesadas poden facelo até o día 8 de febreiro para as modalidades de comparsas e carrozas, e até o día 10 de febreiro ás 17.00 horas nas modalidades de grupos e individual tanto en categoría adulto como infantil. Este ano, e como novidade, as solicitudes de participación no Concurso deberán estar asinadas e terán que estar entregadas no Rexistro de Entrada do Concello. Para obter máis información sobre como facelo, os interesados e interesadas poden poñerse en contacto co persoal da Concellaría de Cultura no teléfono 981 704 300 ou achegarse ás oficinas do primeiro andar do Pazo da Cultura na rúa do Pan s/n. Co obxetivo de fomentar a participación, un ano máis volven a concederse un máximo de 20 subvencións na modalidade de Comparsas e Carrozas que se outorgarán por rigorosa orde de inscrición.
OS COLEXIOS PARTICIPAN NO CONCURSO "CARBALLO TAMÉN EN BOTELLA"
Xoves 24 de xaneiro do 2013
Durante toda esta semana responsables da empresa Reave, Recollidas de Aceite Vexetal SL, e de Urbaser, concesionaria do servizo de recollida de lixo do Concello de Carballo, están impartindo obradoiros nos centros de ensino do municipio sobre reciclaxe, recollida selectiva de residuos e recollida e reciclaxe de aceite de cociña usado. A iniciativa forma parte dunha campaña posta en marcha por Reave entre os colexios carballeses para dar a coñecer entre os escolares a importancia do tratamento axeitado dos residuos, especialmente do aceite, altamente contaminante cando se desbota polos sumidoiros das vivendas. Neste marco está previsto que teña lugar dende o 28 de xaneiro ata o 31 de maio o concurso "Carballo tamén en botella", que ten como obxectivo principal fomentar entre os nenos e nenas criterios de prevención na xeración de residuos no seu día a día e na súa contorna, ao mesmo tempo que implicalos na cultura da reciclaxe. Despois de que rematase o prazo de inscrición o 18 de xaneiro, está confirmada a participación de todos os centros de ensino do municipio, incluíndo o CEIP Canosa-Rus e a excepción do Artai. Gañará o centro que posúa a ratio máis elevada de aceite por alumno/a ao final da campaña, sendo o primeiro premio un lote de material escolar e lote de libros; e o segundo un lote de libros.
REXEITADA A POSTA EN MARCHA DO PROGRAMA TES+BUS
Xoves 24 de xaneiro do 2013
O Director Xeral de Mobilidade, Miguel Rodríguez Bugarín, vén de comprometerse hoxe co Alcalde de Carballo, Evencio Ferrero, a realizar un estudo de viabilidade para poder incluír a Carballo no Plan de Transporte Metropolitano tanto da Coruña como de Santiago de Compostela. Así, a Consellería de Medio Ambiente, Territorio e Infraestruturas, da que depende a Dirección Xeral de Mobilidade, recompilará datos tanto do número de viaxeiros como dos custos que se derivarían do servizo para poder ofrecer os resultados antes de dous meses. Unha vez o estudo estea rematado, e de ser o informe favorable, redactaríase un convenio que debería ser ratificado tanto polo pleno da corporación como pola propia Consellería e finalmente se formalizaría a súa sinatura. De saír adiante a iniciativa, os usuarios e usuarias contarían -en función do uso- con importantes descontos nos seus desprazamentos tanto á capital provincial como á capital de Galicia. Tan só terían que adquirir unha tarxeta que, ademais, permitiría facilitar os desprazamentos non só a Santiago e A Coruña, senón tamén empregar o transporte urbano de ambas cidades e incluso aproveitar todas as vantaxes do Plan de Transporte Metropolitano nas cidades galegas a nivel autonómico.
OS INTERESADOS/AS PODEN DESCARGAR O IMPRESO TIPO NESTA NOVA
Mércores 23 de xaneiro do 2013
Despois de que o Diario Oficial de Galicia (DOG) publicase o martes 22 de xaneiro o anuncio de aprobación inicial do Plan Xeral de Ordenación Municipal (PXOM) do Concello de Carballo, hoxe principia de forma oficial o período de dous meses no que os interesados e interesadas poderán formular as alegacións que consideren pertinentes para a defensa dos seus dereitos e intereses, até o venres 22 de marzo de 2013. O goberno ten posto a disposición dos veciños e veciñas dende o luns 21 de xaneiro, e ata que remate o período de exposición pública, toda a documentación e planos relacionados co PXOM nas instalacións do Fórum Carballo no barrio da Milagrosa. O horario de consulta é de luns a venres de 10.00 a 14.00 horas, e martes e xoves de 17.00 a 20.00 horas. Os cidadáns será atendidos por técnicos municipais que poderán solucionar as súas dúbidas, ademais de poder contar os xoves, a través de cita previa, coa posibilidade de consultar a membros do equipo redactor do documento. No caso de presentarse alegacións, dende a Oficina Técnica pregan aos interesados e interesadas que acheguen o plano da parcela sobre planos do PXOM e ou do Catastro, localizándoa mediante unha trama e a súa referencia catastral. O modelo de alegación tipo pode descargarse en pdf aquí.
A CITA É O MARTES 29 DE XANEIRO A PARTIR DAS 10.00 HORAS
Martes 22 de xaneiro do 2013
O Padroado Deportivo Municipal do Concello de Carballo, dentro do programa DXT na Escola e en colaboración coa Secretaría Xeral para o Deporte e a Federación Galega de Atletismo organiza unha proba da fase local de Campo a través. Estaba previsto celebrar esta cita o venres 18 de xaneiro, pero a alerta laranxa a causa do temporal "Gong" provocou o aprazamento da carreira, que finalmente está prevista para o martes 29 de xaneiro ás 10.00 horas. A cita terá lugar no Campo Municipal de As Eiroas, en lugar do circuíto do Parque Empresarial de Bértoa, debido ás condicións meteorolóxicas dos últimos días. O Concelleiro de Deporte, Marcos Trigo, explicou que esta proba adoita contar coa dificultade das condicións meteorolóxicas, pero non é posible cambiar as datas -habitualmente en inverno- porque o Concello depende do calendario marcado polo programa DXT na Escola. Porén espera que as carreiras, nas que participarán un total de 532 rapaces e rapazas de categorías benxamín, alevín, infantil e cadete (dos colexios Gándara-Sofán, Nétoma-Razo, Xesús San Luís Romero, A Cristina, Bergantiños, Fogar, Artai e Asociación Deportiva Fogar) poidan transcorrer con normalidade.
QUEN COLABORASEN ESTARÍAN EXENTOS DOS IMPOSTOS MUNICIPAIS
Martes 22 de xaneiro do 2013
A Comisión de Coordinación Social do Concello de Carballo vén de manter unha xuntanza na que se acordou dar os pasos necesarios para crear unha bolsa de vivenda municipal con alugueres reducidos destinada a axudar a aquelas persoas en dificultades a causa de situacións de desafiuzamento, producidas a consecuencia tanto do non pagamento de hipotecas como por non poder afrontar os seus alugueres. A comisión naceu en decembro de 2012 co obxectivo de axudar aos máis necesitados e a responder ante as situacións de emerxencia social nos tempos de crise que vivimos e nesta a súa segunda reunión contou coa presenza do Alcalde de Carballo, Evencio Ferrero; a Concelleira de Benestar, Silvana Castro; representantes de todos os grupos políticos municipais con José Antonio Viña, polo PSOE; Manuel Andrade, por TEGA; Miguel Ángel Ferreiro, polo PP; e Xosé Regueira, polo BNG; representantes de Cruz Vermella, de Cáritas Parroquial e dos Servizos Sociais Municipais. Durante a cita expuxéronse datos que recollen que dende outubro de 2012 non se ten rexistrado ningún outro desafiuzamento, a pesares do elevado número de casos rexistrados en meses anteriores. Porén, os integrantes da comisión estiveron dacordo en poñer en marcha mecanismos para axudar a paliar a situación das familias xa afectadas ou que poidan estalo no futuro.
A DISTINCIÓN PREMIA OS SEUS 72 ANOS DE HISTORIA
Martes 22 de xaneiro do 2013
A Mercería As Plateiras vén de recibir o diploma "A semana do teu comercio" como protagonista da campaña que realiza a Dirección Xeral de Comercio da Xunta para promocionar os locais máis lonxevos dos Centros Comerciais Abertos, e, neste caso, do CCA Carballo. Durante as 52 semanas de 2013 cada un dos 52 Centros Comerciais Abertos de toda Galicia escolle ao seu comercio más antigo, que recibe unha homenaxe en representación do comercio local tradicional. Neste caso recolleu o diploma e o premio Pilar Ferreiro Santos, máis coñecida como "Pila das Plateiras", de 88 anos de idade e que leva xa 72 ao frente da súa tenda. Unha "fazaña" que tanto ela como as súas fillas consideran que sería difícil volver a repetir, aínda que brindaron con cava "para que sexa posible que a tenda siga aberta outros 72 anos máis". Entregaron a distinción a Directora Xeral de Comercio, Sol María Vázquez Abeal, xunto coa Delegada Territorial da Xunta da provincia da Coruña, Belén do Campo. O Alcalde de Carballo, Evencio Ferrero, acompañado da Tenente de Alcalde, Milagros Lantes, e do Concelleiro de Formación e Emprego, Marcos Trigo, entregoulle así mesmo como lembranza e homenaxe unha escultura de Sargadelos con forma de Carballo. Tamén estivo presente no acto o concelleiro Miguel Ángel Ferreiro Suárez.
O PERÍODO DE EXPOSICIÓN PÚBLICA COMEZA A PRÓXIMA SEMANA
Venres 18 de xaneiro do 2013
Arredor de medio centenar de profesionais relacionados co sector da construción e do urbanismo asistiron no auditorio do Fórum Carballo a unha xuntanza cos representantes do equipo redactor do documento para aprobación inicial do Plan Xeral de Ordenación Municipal (PXOM) -Álvaro Fernández Carballada e Verónica Cernadas- para coñecer as principais claves do planeamento. Nunha cita presidida polo Alcalde, Evencio Ferrero, e que contou coa presenza da Concelleira de Planificación e Desenvolvemento Urbano, Milagros Lantes, do Arquitecto Municipal, Alfredo Garrote, e doutros técnicos municipais e membros da corporación, expúxose o "intenso proceso", en verbas de Ferrero, para elaborar esta proposta que contou coas achegas de todos os grupos da corporación, que supuxo máis de 60 xuntanzas da comisión informativa de urbanismo e que leva perfilándose dende o ano 2005. O documento propón, segundo explica Fernández Carballada, unha capacidade residencial de aproximadamente 26.000 vivendas co obxectivo de, no caso da capital municipal, colmatar o chan urbanizable, facilitar a culminación daqueles ámbitos que xa tiñan comezado o seu desenvolvemento e "realizar un documento claro, dentro do posible". Tamén se falou especificamente da costa, na que moitas zonas de Arnados e Razo pasan de ser chan urbanizable a chan de núcleo rural, unha "modificación de calado", sedundo o técnico, pero que mantén "a tipoloxía de edificación que se buscaba".
INSCRICIÓNS ATÉ O LUNS 25 DE FEBREIRO
Venres 18 de xaneiro do 2013
Por segundo ano consecutivo, o Concello de Carballo e o Conservatorio Profesional de Música poñen en funcionamento o curso "Música e movemento". Esta iniciativa, que naceu o ano pasado baixo a coordinación da Concellaría de Cultura e que ten como obxectivo achegar aos máis cativos e cativas á música e ao descubrimento das familias instrumentais, persegue a finalidade de que cando poidan acceder aos estudos musicais oficiais, teñan unha pequena base musical e un coñecemento das distintas ferramentas musicais que lles facilite a elección do instrumento que poidan estudar. A esta convocatoria poden concorrer todos aqueles rapaces e rapazas de 2º curso de Educación Primaria, prioritariamente veciños/as de Carballo, que desexen iniciarse no mundo da música. O curso é de carácter gratuíto e ten un límite de 30 prazas que se adxudicarán por rigorosa orde de inscrición. Para anotarse nesta convocatoria, os/as interesados/as teñen un prazo que vai dende o luns 18 até o luns 25 de febreiro (ambos os dous días incluídos) e deberán facelo a través dunha solicitude que pode recollerse nas Oficinas de Cultura (situadas no 1º andar do Pazo da Cultura) ou descargarse nesta mesma nova nun documento en pdf.
ESTÁ EN MARCHA UN CONCURSO ESCOLAR
Xoves 17 de xaneiro do 2013
A empresa Reave, Recollidas de Aceite Vexetal SL, que dende o pasado mes de xullo ten posto en marcha no Concello carballés un servizo de recollida de aceite de cociña usado para a súa reciclaxe, emprende agora unha campaña para sensibilizar aos escolares do municipio da importancia de evitar que o aceite acabe nos sumidoiros dos seus fogares. Así, ademais da celebración dun concurso entre os centros de ensino do municipio carballés, a empresa ten pensado realizar obradoiros nos que se explicará aos alumnos e alumnas como se recolle e trata o aceite usado, os problemas medioambientais que supón unha mala xestión ou o mellor xeito de empregar os funís que Reave ten repartido para facilitar a recollida nas botellas (e que tamén serán entregados durante os obradoiros aos rapaces e rapazas). Así, hai que subliñar que a reciclaxe do aceite usado é moi beneficiosa para o medio ambiente, non só porque evita a súa presenza nas canalizacións de auga, senón porque pode dárselle unha nova vida e reconvertelo, principalmente en produtos cosméticos ou incluso para xerar combustible biodiésel. Respecto do concurso, o venres 18 de xaneiro remata o prazo para que os centros interesados formalicen a súa participación, e está previsto entregar un primeiro premio, que consiste nun lote de material escolar e de libros, e un segundo, consistente nun lote de libros.
.jpg)