PODE CONSULTARSE E/OU DESCARGARSE A PARTIR DE HOXE
Mércores 16 de xaneiro do 2013
O Concello de Carballo pon a disposición de toda a cidadanía os tomos ao completo do documento para aprobación inicial do Plan Xeral de Ordenación Municipal (PXOM) a través da páxina web <www.carballo.org>. Dende hoxe, e ata que finalice o período de exposición pública que marque o DOG (Diario Oficial de Galicia) todos os veciños e veciñas que o desexen poderán consultar e/ou descargar a información dos once tomos, así como do índice para facilitar as buscas. Nunha sesión con numeroso público e despois de dúas horas e media de pleno, a corporación carballesa outorgoulle o visto e prace á aprobación inicial do PXOM o xoves 10 de xaneiro. A partir de agora, e despois da publicación da resolución no DOG, comeza un período de exposición pública de dous meses, no que tanto os representantes dos partidos políticos, como as asociacións do municipio ou calquera veciño ou veciña que o desexe, poderán presentar as alegacións que consideren oportunas para incorporalas, de ser estimadas, ao planeamento definitivo. Así mesmo, a aprobación inicial do PXOM leva aparellada unha suspensión de licenzas que se aplicará fundamentalmente nos puntos do termo municipal nos que as normas subsidiarias dos anos 80, en vigor nestes momentos, entren en contradición co recollido no novo planeamento. Para consultar a documentación do PXOM, premer aquí.
CONTARON CUNHA REPRESENTANTE DA SUBDELEGACIÓN DO GOBERNO
Martes 15 de xaneiro do 2013
A Casa do Concello vén de acoller unha xuntanza da Comisión de seguimento -de carácter trimestral- e da Comisión Técnica -que celebra reunións mensuais- da Violencia de Xénero do Concello de Carballo. Estiveron presentes nas comisións representantes da Garda Civil, o Xefe da Policía Local de Carballo, Constantino Vázquez, así como a responsable do CIM (Centro de Información á Muller) Nieves Castañón, e a Xefa da Unidade de Coordinación contra a Violencia de Xénero da Subdelegación da Coruña, María Garaboa, así como membros das forzas de seguridade e de Servizos Sociais do Concello que realizan o seguimento diario de cada caso rexistrado no municipio. Durante toda a mañá analizaron esta problemática, planificando liñas de acción e atendendo a situación concreta das vítimas. Desde o ano 2010 o Concello está adherido a un protocolo de colaboración co Ministerio do Interior e a Fegamp (Federación Galega de Municipios e Provincias) para a creación dunha rede de entidades locais en contra desta lacra social e co compromiso de crear comisións de seguimento dos casos de violencia machista. Esta rede está concibida como unha plataforma para favorecer o rexeitamento social, unha maior sensibilización e, consecuentemente, un compromiso real contra esta lacra, contribuíndo a crear modelos de convivencia igualitarios.
XUNTA DE GOBERNO LOCAL
Luns 14 de xaneiro do 2013
A Xunta de Goberno Local, reunida en sesión ordinaria, aprobou fóra da orde do día o contrato de servizos para a coordinación de seguridade e saúde da obra "Mellora do sistema xeral de abastecemento a Carballo (Anllóns-Bardoso). Fase I". O orzamento de execución por contrata ascende a 16.335 euros, IVE incluído. O prazo de execución será o da execución das obras ata a súa recepción, contados a partir da formalización do contrato. O único criterio esixido é o prezo, adxudicándose o contrato á oferta económica máis baixa. Hai que lembrar que nestes momentos está aberto o proceso para adxudicar os traballos de "Mellora do sistema xeral de abastecemento a Carballo: Anllóns-Bardoso", con máis de 30 empresas optando á súa execución. O proxecto -elaborado en agosto de 2012 pola consultora Egis-Eyser SA- inclúe a execución dun novo depósito regulador de auga de 5.000 metros cúbicos en Seixo Branco, conectado co actual depósito de Paraíso. Así mesmo, suporía a instalación dunha nova condución de 400 mm de diámetro de 1.630 metros de lonxitude dende este novo depósito de Seixo Branco ata o lugar de A Ponte de Bértoa. O orzamento previsto para a Fase I é de 1.153.754 euros (IVE engadido) e estes traballos están cofinanciados pola Unión Europea a través das axudas do Fondo Europeo de Desenvolvemento Rexional (Feder).
COA PUBLICACIÓN NO BOP COMEZARÁ A EXPOSICIÓN PÚBLICA
Venres 11 de xaneiro do 2013
Nunha sesión con numeroso público e despois de dúas horas e media de pleno, a corporación carballesa outorgoulle o visto e prace á aprobación inicial do Plan Xeral de Ordenación Municipal do Concello de Carballo (PXOM). O documento recibiu o apoio dos grupos municipais do BNG e PSOE e a proposta contou coa abstención de PP e TEGA. A partir de agora, e despois da publicación da resolución no DOG (Diario Oficial de Galicia), comezará un período de exposición pública de dous meses, no que tanto os representantes dos partidos políticos, como calquera veciño ou veciña que o desexe, poderá presentar as alegacións que consideren oportunas para incorporalas, de ser estimadas, ao planeamento definitivo. Durante a sesión, acordouse por unanimidade a incorporación ao documento dunha emenda proposta por PP, TEGA e PSOE para incluír no PXOM unha prolongación da Vila de Negreira e a creación dunha vía entre a rúa Luís Calvo e a comarcal AC-552 á altura da Revolta. Así mesmo, todos os grupos acordaron a inclusión dunha emenda transaccional presentada polo líder do PSOE, José Antonio Viña, na que se recolleron varias das 21 propostas presentadas por TEGA durante a sesión para ser incorporadas ao documento, referidas fundamentalmente a pequenas modificacións e ampliación de anchos nalgunhas rúas. Rexeitáronse en cambio, outras relativas á Agra da Lagoa, ao desenvolvemento de Arnados ou á suba de alturas en Bértoa.
A PEZA COLGARASE NAS REDES SOCIAIS
Venres 11 de xaneiro do 2013
O Concello de Carballo, a través do Servizo de Normalización Lingüística, informa de que xa se pode ver en Youtube o vídeo "Nov@s galeg@s que queren falar galego", realizado por algunhas das persoas participantes no Obradoiro de integración lingüística e cultural, unha actividade que se vén realizando dende o ano 2005. O obradoiro clausurouse o xoves 10 de xaneiro cunha visita á feira carballesa, así como cun pequeno ágape (na imaxe) con comidas e produtos propios dos lugares das persoas participantes. Nesta pequena peza audiovisual, pensada para difundir nas redes sociais, algunhas das persoas participantes nese obradoiro sinalan de maneira moi breve algunhas das súas motivacións para aprenderen galego, como por exemplo "para ser máis de aquí", "para entender as letras dos grupos de música galegos", "por motivos laborais" ou "para ensinarlle á miña filla a falar a lingua de aquí". Durante o obradoiro, que tivo lugar entre o 15 de novembro e o 20 de decembro de 2012, desenvolvéronse diversas actividades para coñecer a lingua, a música, a literatura, a prensa, a xeografía, etc., galegas, e para facilitar o acceso ao mundo laboral, e a integración na sociedade galega e carballesa. Os interesados e interesadas en ver o vídeo, premer aquí
A ORDE DO DÍA RECOLLE UN RECOÑECEMENTO DE CRÉDITO DE 37.000 EUROS
Mércores 9 de xaneiro do 2013
A corporación carballesa celebra o xoves 10 de xaneiro un pleno extraordinario que recolle, como principal punto da orde do día, a aprobación inicial do Plan Xeral de Ordenación Municipal (PXOM) do Concello de Carballo. Despois da celebración da comisión informativa correspondente o xoves 3 de xaneiro- na que o acordo se ditaminou favorablemente cos votos de BNG e PSOE- finalmente todos os grupos da oposición (PP, TEGA e PSOE) presentaron o martes 8 de xaneiro unha emenda ao documento na que se solicita a inclusión de dúas novas vías no planeamento como sistemas xerais, a conseguir por expropiación. Por un lado, solicítase a incorporación dunha prolongación para a rúa Vila de Negreira cunha vía de 20 metros de ancho dende o Ferradal ata a parte posterior da Igrexa de Bértoa; e por outra a inclusión dunha vía de 16 metros de ancho entre a Avenida Rodríguez de Castelao (na contorna do CEIP a Cristina) e a estrada comarcal AC-552 á altura da estación de servizo da Revolta (na contorna da Parrillada Olga). Ante esta emenda de última hora, o Alcalde de Carballo, Evencio Ferrero, e a Concelleira de Planificación e Desenvolvemento Urbano, Milagros Lantes, mantiveron hoxe unha xuntanza co Secretario, o Arquitecto Municipal e o asesor xurídico do Concello. O obxectivo do goberno é axilizar os trámites para poder incluír a emenda -que previsiblemente sairá adiante co apoio da oposición- no PXOM e aprobalo como estaba previsto para evitar demoras.
XOVES 10 DE XANEIRO ÁS 11.00 E ÁS 20.00 HORAS
Mércores 9 de xaneiro do 2013
O xoves 10 de xaneiro reuniranse por última vez as persoas participantes no obradoiro de integración lingüística e cultural que durante os últimos dous meses estivo tendo lugar no Pazo da Cultura de Carballo. Primeiro, pola mañá, un grupo dos integrantes na iniciativa reúnese a partir das 11.00 horas na parte posterior do Concello (pola zona da entrada de Servizos Sociais) para facer unha visita á feira e interaccionar alí en galego (na imaxe). Xa pola tarde, ás 20.00 horas, no Salón de actos do Pazo da Cultura, reuniranse para compartir un pequeno ágape con produtos propios dos distintos lugares das persoas participantes, que levarán elas mesmas. Nese acto de despedida, recibirán os seus diplomas de participación e presentarase, ademais, un pequeno vídeo para difundir nas redes sociais que algunhas das persoas participantes gravaron durante o obradoiro, no que sinalan de maneira moi breve algunhas das súas motivacións para aprenderen galego. Neste obradoiro práctico organizado polo Servizo de Normalización Lingüística do Concello de Carballo, que tivo lugar entre o 15 de novembro e o 20 de decembro de 2012, desenvolvéronse diversas actividades para coñecer a lingua, a música, a literatura, a prensa, a xeografía, etc., galegas, e para facilitar o acceso ao mundo laboral, e a integración na sociedade galega.
EN 2012 TRAMITÁRONSE UN TOTAL DE 17 PARA UNIFAMILIARES
Luns 7 de xaneiro do 2013
O Concello de Carballo ten rexistrado ao longo dos últimos dez anos, con datos rexistrados dende 2003 a través dos servizos da Oficina Técnica Municipal, un total de 3.735 solicitudes de licenzas para a construción de vivendas no municipio. No que respecta ao exercicio que acaba de rematar, 2012, rexistráronse un total de 17 solicitudes, todas elas peticións referidas a vivendas unifamiliares. Hai que aclarar que estes datos recollen as solicitudes que se contabilizan no Rexistro municipal, o que non quere dicir que se concederan todas as licenzas solicitadas nin que se edificaran todas as vivendas que recibiron licenza. Dende o ano 2008 non se rexistra ningunha solicitude para a construción de edificios de vivendas no casco urbano, solicitándose nese ano un total de 662 e outras 80 para vivendas unifamiliares. Respecto da evolución das peticións para a construción de vivendas unifamiliares, en 2009 contabilizáronse 30 peticións fronte ás 22 de 2010, as 36 de 2011, e as 17 de 2012, con un descenso dun 52,7 por cento en 2012 respecto do exercicio anterior, rompéndose a tendencia positiva de 2011, exercicio no que se rexistrara un incremento do 38,8 por cento. Hai que sinalar, así mesmo, o número de solicitudes de licenzas de primeira ocupación contabilizadas en 2012, que ascende a 72, tanto para vivendas, como para edificios e locais comerciais.
APLICARASE UNHA SUSPENSIÓN DE LICENZAS OBRIGATORIA
Venres 4 de xaneiro do 2013
Xusto un mes despois de que a documentación íntegra do novo Plan Xeral de Ordenación Municipal (PXOM) de Carballo fose entregada no Concello está previsto celebrar un pleno extraordinario no que se abordará a aprobación inicial do planeamento. A cita é o xoves 10 de xaneiro ás 20.30 horas, logo dunha xuntanza da comisión informativa de urbanismo -celebrada o xoves 3 de xaneiro- na que os representantes dos catro grupos políticos da corporación tiveron a oportunidade de expoñer as súas posturas. En caso de ratificarse a aprobación inicial do documento durante a sesión, procederase a publicar a resolución no DOG (Diario Oficial de Galicia) para que comece un período de exposición pública de dous meses, no que tanto os representantes dos partidos políticos, como calquera veciño ou veciña que o desexe, poderán presentar as alegacións que consideren oportunas para incorporalas, de ser estimadas, ao planeamento definitivo. Así mesmo, a lei estipula que a aprobación inicial do PXOM leve aparellada a suspensión automática da concesión de licenzas. A Oficina Técnica Municipal ten decidido aplicar esta suspensión nos puntos do termo municipal nos que as normas subsidiarias dos anos 80 que están en vigor nestes momentos entren en contradición co recollido no futuro planeamento.
OS DÍAS 5 E 6 TAMÉN HAI ITINERARIOS NAS PARROQUIAS
Venres 4 de xaneiro do 2013
O Concello de Carballo e a Asociación Xuvenil Fogar da Xuventude organizan a tradicional Cabalgata de Reis que percorre o 5 de xaneiro as principais rúas da capital municipal. O itinerario inclúe a chegada dos Reis Magos ás 17.00 horas ao Centro Comercial Bergantiños-Gadis, de onde está previsto que as súas Maxestades saian ás 17.30 horas. Despois do percorrido, os Reis Magos diríxense á carpa situada na Praza do Concello, onde reciben persoalmente aos cativos e cativas. A chegada á Praza do Concello está prevista para as 19.30 ou 20.00 horas, aproximadamente. A cita conta co patrocinio do Concello de Carballo e a colaboración do CCB-Gadis e La Caixa, co reparto de caramelos. Así mesmo, está prevista a colaboración de Protección Civil de Carballo, a Policía Local, a Brigada de Obras, Automóbiles Gonzacar e Alquileres Reneymar, que instalará calefactores baixo a carpa da Praza e achega un camión para a cabalgata. Tampouco hai que esquecer que os Reis Magos teñen previsto visitar as parroquias carballesas, xa que o mércores 5 están en Berdillo, Baldaio, Sísamo, Vilela, Oza, Ardaña, Entrecruces e Bértoa, mentres que o xoves 6 visitan Sofán, Razo, Artes e Cances. Estas cabalgatas están organizadas polas asociacións de cada parroquia e seguen itinerarios e horarios similares aos de anos anteriores.
AS DEMANDAS PODEN EFECTUARSE NO 981 704 700
Xoves 3 de xaneiro do 2013
O ano 2012 deixa un total de 1.473 demandas realizadas por veciños e veciñas do municipio referentes a arranxos e melloras no alumeado público, nos sinais informativos e de tráfico, nos servizos de auga, luz ou teléfono, no deterioro de equipamentos e mobiliario urbano municipal e no sistema viario ou referentes á limpeza de espazos públicos e ao programa Carballo Limpo. As Brigadas de Obras e Medio Ambiente teñen atendido e solucionado estas peticións -e outras que atenden directamente no seu labor diario que non quedan rexistradas neste reconto-, que na súa maioría están referidas ao alumeado público -especialmente ao arranxo ou substitución de puntos de luz-, con 822 demandas. Respecto do ano 2011, tense rexistrado un pequeno incremento dun 3,4 por cento, xa que o ano pasado contabilizáronse 1.422 avisos. Parte deste incremento débese á suba nas peticións de arranxos no alumeado, que pasaron de 808 a 822, cun 1,7 por cento máis que en 2011. Todos os veciños e veciñas que o desexen poden denunciar as deficiencias ou demandar as melloras que consideren oportunas a través do número de teléfono 981 704 700 ou ben no enderezo electrónico <infocarballo@carballo.org>.
OS COLECTORES ESTÁN DISPOÑIBLES EN SEIS EDIFICIOS PÚBLICOS DA VILA
Sábado 29 de decembro do 2012
A empresa Reave, Recollidas de Aceite Vexetal SL, ten acumulado nos seis primeiros meses de funcionamento do servizo un total de 1.112 litros e 609 botellas de aceite de cociña usado nos seis colectores situados en distintos puntos da capital municipal carballesa. Entre os lugares nos que se rexistran máis litros, hai que subliñar en primeiro lugar o mercado municipal, cun total de 510 litros (o 45 por cento do total) en 264 botellas. Tamén hai que resaltar o movemento rexistrado nas dúas piscinas da capital municipal, a Carballo Calero e a Vila de Noia, xa que entre as dúas acumulan 265 litros e 155 botellas. Hai que lembrar que Reave e o Concello de Carballo puxeron en marcha no mes de xullo este servizo que persegue evitar que o aceite vexetal producido durante a preparación dos alimentos ou presente nas conservas se tire polos desaugadoiros, xa que obstrúe as canalizacións provocando graves avarías, contamina a auga e prexudica o medio ambiente, ademais de poder dificultar o funcionamento das depuradoras municipais. O único que ten que facer a cidadanía é verter o aceite de cociña usado (de xirasol, de oliva, de millo, de soia, etc.) ou o aceite das conservas nun recipiente de plástico. Logo, deben levar o envase perfectamente pechado aos colectores de cor laranxa situados en varios edificios de titularidade municipal: Casa do Concello, Mercado, Pazo da Cultura, Ambulatorio Vello, Piscina Vila de Noia e Piscina Carballo Calero.
.jpg)