DESENVOLVERANSE MÓDULOS PARA EMPRENDEDORES E PROFESIONAIS
Venres 28 de decembro do 2012
As instalacións e o proxecto Fórum Carballo desenvolverán en 2013 un labor de dinamización para "formar persoas no mercado laboral" e servir para que "as empresas de Carballo atopen novas oportunidades", en verbas do Concelleiro de Promoción Económica, Xosé Regueira. Unha vez rematada a parte do Fórum relacionada coa construción e equipamento do complexo, e despois de que en 2012 se lle dera vida ás instalacións co traslado do Centro de Formación, a creación da Bolsa de Traballo Municipal ou a celebración dun total de 15 accións formativas -en colaboración con particulares, empresas e incluso organismos oficiais como as universidades de Santiago de Compostela e A Coruña-, chega o momento de "dinamizar a actividade laboral, empresarial e administrativa" do proxecto, segundo explica o Alcalde, Evencio Ferrero, e convertelo "nun referente en Galicia e incluso máis aló", en verbas do Concelleiro de Formación e Emprego, Marcos Trigo. Comeza, pois, un traballo para dar a coñecer os servizos que se ofrecen no Fórum, que a partir de 2013 irán dende as oficinas de Promoción Económica e de Formación e Emprego, ata a actividade formativa de 20 especialidades homologadas que está previsto ir incrementando en anos sucesivos e que ocuparán os máis de 7.000 metros cadrados das instalacións. Todo para darlle pulo á economía e mellorar a empregabilidade dos veciños e veciñas nun espazo ao seu dispor.
A PARTIR DAS 10.00 HORAS NO PAVILLÓN VILA DE NOIA
Xoves 27 de decembro do 2012
O Pavillón Vila de Noia da capital municipal acolle o sábado 29 de decembro a partir das 10.00 e até as 20.00 horas o I Torneo de Balonmán Feminino que organizan as Escolas de Balonmán Xiria. O obxectivo desta cita, en verbas do director técnico das Escolas, Marcos Rodríguez, é o de "fomentar o deporte feminino" e "dar a coñecer a existencia dun equipo sénior" en categoría feminina. Así, este equipo vén de ser reconstituído logo duns anos nos que deixou de existir debido á falta de xogadoras que permitisen configurar un grupo co que cumprir os requisitos para competir na Liga Galega. O torneo conta con encontros en categorías sénior e cadete. No primeiro caso os clubs invitados son o Club Balonmán Lalín, o Unión Balonmán Lavadores de Vigo e o Club Balonmán Narón. En cadete contarase co Xallas FC. Rodríguez subliña que a presenza destes equipos, máis alá da competición e de loitar polo torneo, é que poidan servir de exemplo para as xogadoras e para que poidan aprender e adquirir experiencia. No caso das cadetes, ademais, está previsto que haxa unha convivencia coas compañeiras do Xallas. Polo de agora, o equipo sénior de Balonmán Xiria Feminino está en fase de construción, coa disputa de partidos amigables e adestrando con continuidade para tentar regresar á 1ª Autonómica da Liga Galega a tempada que vén.
RESERVA DE ENTRADAS NO 981 704 300 DE 11.00 A 14.00 HORAS
Mércores 26 de decembro do 2012
Arrinca o programa do Nadal Pequespectacular que este ano conta con tres citas sinaladas nas que hai música, maxia e teatro para nenos e nenas no Pazo da Cultura. O mércores 26 de decembro é a quenda de Elefante Elegante que presenta Nuncabunga (na imaxe), un espectáculo cómico e poético sen palabras dirixido ao público familiar e a cativos e cativas maiores de 4 anos. A acción desenvólvese nun espazo que evoca a proximidade co mar no que vive una persoa que fixo aí o seu fogar. Un día de tormenta aparece un estraño atrapado nunhas redes, coma un refugallo máis dos que o mar bota fóra. Non ten case comida pero está decidido a quedar. Poderán chegar a un acordo? Elefante Elegante é unha compañía que crea espectáculos de teatro visual baseados no xesto e no movemento. As súas creacions buscan a universalidade, xurdindo da fusión de diferentes linguaxes: o teatro físico, a danza, as artes plásticas e as artes visuais. A compañía, de orixe galego-portuguesa, foi creada en 2007 e ten a súa sede na Coruña. A cita é ás 18.00 horas e o prezo é de 2,5 € (2 € con desconto para menores de 12 anos e maiores de 65). Pode reservarse entrada no 981 704 300 de 11.00 a 14.00 horas para esta ou calquera das funcións do Nadal Pequespectacular.
ESTÁ EN FUNCIONAMENTO DENDE O 19 DE NOVEMBRO
Venres 21 de decembro do 2012
A Bolsa de Traballo Municipal, que leva pouco máis dun mes en funcionamento, xa conta con un total de 210 demandantes de emprego e xa ten xestionado a inserción laboral de dúas persoas que introduciron os seus currículos neste servizo. A Bolsa de Traballo ten como obxectivo axudar ás persoas en situación de desemprego que desexen regresar ao mundo laboral, a quen busquen o seu primeiro emprego ou a quen desexen mellorar a súa situación laboral actual. A través do servizo realízase unha función de mediación como unha ferramenta de conexión entre a demanda e as ofertas de emprego que se xeran no Concello e a súa contorna. Situada no Fórum Carballo, a Bolsa de Traballo entrou en funcionamento o luns 19 de novembro, cando se introduciron os primeiros currículos, e atende aos veciños e veciñas todos os días pola mañá de 8.30 a 14.30 h. e dúas tardes á semana que ata o 31 de decembro son os martes e xoves de 16.00 a 19.00 h. De feito, os novos usuarios e usuarias interesados deben agardar até finais de marzo porque ata esa data non hai oco dispoñible para citas, o que demostra a excelente acollida do servizo, ademais de probarse a necesidade dunha Bolsa de Traballo que facilite o contacto entre a oferta e a demanda dunha forma áxil, transparente e eficaz.
SOGAMA PROMOVE BOAS PRÁCTICAS MEDIOAMBIENTAIS NO NADAL
Xoves 20 de decembro do 2012
A Concellaría de Obras e Servizos que dirixe Luís Lamas informa de que durante estes días estanse realizando traballos de desbroce nas beirarrúas da capital municipal e a súa contorna (na imaxe). Os operarios levan arredor de dúas semanas retirando a maleza e os labores tamén inclúen a limpeza dos solares de titularidade municipal. Os traballos realízanse de xeito mecánico cun tractor e tamén manual nun ancho aproximado de dous metros a pé de beirarrúa. Está previsto que esta actuación, que se realiza cada ano en dúas ocasións -dentro do programa de limpeza cotiá do municipio a primeiros de verán e no mes de decembro- estea rematada en breve. Tamén coincidindo coas vacacións de Nadal o Concello carballés recolle as recomendacións de Sogama (Sociedade Galega do Medio Ambiente) para estas datas -xa que o Nadal é, xunto coas vacacións estivais, a época do ano na que máis residuos se producen- e quere transmitirllas aos veciños e veciñas. Así, a entidade quere divulgar pequenos xestos que senten as bases do que deben ser as condutas dos cidadáns de cara ao 2013. Entre estas boas prácticas está o consumo responsable, a racionalidade á hora de realizar as compras ou non usar vaixelas, vasos ou cubertos desbotables que xeran unha grande cantidade de residuos.
O ORZAMENTO ASCENDE A MÁIS DUN MILLÓN DE EUROS
Mércores 19 de decembro do 2012
Unha vez rematado o prazo de presentación de ofertas, ás 14.00 horas do 18 de decembro, despois de ser contabilizadas as propostas entregadas no Rexistro de Entrada e as que finalmente chegaron por correo, un total de 32 empresas optan a realizar a Fase I da obra "Mellora do sistema xeral de abastecemento a Carballo: Anllóns-Bardoso". Agora será a mesa de contratación a encargada de examinar a extensa documentación presentada por cada empresa e elixir a que mellor se adapte ao prego de condicións. O sistema de adxudicación é o procedemento aberto con varios criterios de valoración, entre os que se atopan: a proposta económica (o de máis peso), a identificación dos condicionantes externos da obra, o programa de construción, o plan de control de calidade, a memoria das condicións ambientais, a memoria descritiva, a porcentaxe para o control externo de calidade e as melloras técnicas e de obra. Entre as melloras, hai que mencionar a instalación dunha válvula redutora de presión no depósito da Avenida de Bergantiños, o peche do circuíto de abastecemento na Avenida de Bértoa ou a creación dunha rede de saneamento en Zarrallo (Sofán). Hai que lembrar que o proxecto -elaborado en agosto de 2012 pola consultora Egis-Eyser SA- inclúe a execución dun novo depósito regulador de auga de 5.000 metros cúbicos en Seixo Branco, conectado co actual depósito de Paraíso.
RETÁRDASE A RETIRADA DO CARTÓN PREGADO A PÉ DE PORTA
Martes 18 de decembro do 2012
Dende o pasado 1 de novembro a Unión Temporal de Empresas (UTE) formada por Urbaser e Servigal ten asumido a xesión do servizo de recollida de lixo, Punto Limpo e Canceira do Concello de Carballo despois da sinatura do contrato e de superar un proceso de adxudicación que comezou en xaneiro de 2012. Dende ese día contan con seis meses para axustar o servizo, adaptar a maquinaria e realizar a dotación de persoal, entre outras cousas. Pero hai algúns cambios que xa se teñen rexistrado coa nova xestión e que recollen as demandas de moitos veciños e veciñas, como é o caso da ampliación do horario do Punto Limpo do parque empresarial de Bértoa ou o incremento de días de recollida do Punto Limpo Móbil. Así, no primeiro caso a apertura é xoves e sábados de 10.00 a 13.00 e de 16.00 a 19.00 horas, incorporándose o horario de tarde. No segundo, amplíase substancialmente a recollida de voluminosos a domicilio, prestándose a partir de agora o servizo todos os mércores entre as 7.00 e as 13:40 horas, cando antes se limitaba aos primeiros martes de mes. Para facilitar o funcionamento do servizo, prégase a todos os usuarios/as que depositen os enseres os martes pola noite e chamen antes ao 981 75 49 17 ou o fagan no Twitter <@CarballoLimpo>. Así mesmo, respecto da recollida do cartón pregado a pé de porta, mantense os luns, mércores e venres diante dos comercios, só que principa ás 23.00 horas para non obstaculizar o tráfico.
CONTRATO PARA A DIRECCIÓN DA BANDA DE GAITAS
Luns 17 de decembro do 2012
A Xunta de Goberno Local reunida en sesión ordinaria vén de aprobar os expedientes de contratación para tres obras incluídas no Plan DTC 94 "Unha Deputación para todos os concellos" da Deputación da Coruña. Trátase, en primeiro lugar, do contrato administrativo para as obras de "Conservación do pavimento das rúas do casco urbano de Carballo". O orzamento estimado de execución por contrata é de 149.513 euros con IVE, sendo os criterios de adxudicación a oferta económica, o programa de traballo, o programa de control medioambiental, o plan de control de calidade, ou o esquema do plan de seguridade e saúde. En segundo lugar, saíu adiante o expediente para o contrato de obras de "Rebacheo e mellora da rodadura en varios camiños das parroquias de Rus, Artes, Bértoa, Lema, Goiáns, Sísamo, Sofán e Carballo no Concello de Carballo", cun orzamento que ascende a 91.001 euros con IVE. Os criterios de adxudicación son similares aos da obra anterior. Por último, tamén dentro do DTC 94, a Xunta de Goberno sacou adiante o expediente de contratación para as obras de "Mellora da rede de saneamento nas parroquias de Ardaña e Rus", que teñen un orzamento de adxudicación de 92.586 euros con IVE e cuns criterios similares aos dos procedementos anteriores. En todos os expedientes se recolle, así mesmo, a posibilidade de que a empresa adxudicataria reduza os prazos de execución previstos.
A PRIMEIRA ETAPA INCLÚE OBRADOIROS E A CREACIÓN DE RUTAS A PÉ
Venres 14 de decembro do 2012
Representantes das ANPAS (Asociacións de Nais e Pais) dos centros educativos de Carballo asistiron o xoves 13 de decembro no Fórum Carballo á presentación de Pedibús, unha iniciativa da Concellaría de Tráfico que dirixe Xosé Regueira e que pretende avanzar nunha alternativa de mobilidade para o alumnado dos colexios do casco urbano carballés. Durante a cita, na que tamén estivo o Alcalde, Evencio Ferrero, e outros membros do goberno municipal, expuxéronse as principais claves deste proxecto que persegue mellorar os problemas de tráfico que se rexistran cada día ás horas de entrada e saída dos centros de ensino, pero que tamén ten outros obxectivos. Así, o Pedibús pretende favorecer que as rúas sexan ámbitos máis seguros para os peóns, fomentar hábitos de mobilidade sostibles e saudables, diminuír o consumo de enerxía e o emprego dos vehículos a motor ou favorecer a aprendizaxe en educación viaria. O Pedibús percorrerá andando as rutas máis empregadas polo alumnado camiño do centro educativo, facilitando que ir ao colexio sexa unha experiencia de autonomía e contacto directo coas nenas e os nenos da súa contorna cotiá, o seu barrio e as súas xentes. Durante a presentación, Regueira subliñou que a implantación pode levar moitos meses, porque se trata de modificar hábitos moi arraigados, pero o Concello espera "que non sexa unha proposta unilateral, senón que todos e todas colaboremos no proxecto".
O CENTRO PROMOVE CAMPAÑAS DE RECICLAXE E RECOLLIDA DE ALIMENTOS
Mércores 12 de decembro do 2012
O CEIP Gándara-Sofán xa conta con novos aseos na planta baixa grazas uns traballos realizados con dotación económica municipal e que supoñen, ademais da renovación dos baños, a súa separación con espazos para nenos e nenas -xa que até o de agora o servizo era mixto- e a creación dun sanitario adaptado. Nunha xuntanza celebrada hai pouco máis dun mes no propio centro na que estiveron o Alcalde de Carballo, Evencio Ferrero, a Concelleira de Educación, Mar Eirís, o Xefe Territorial de Educación, Indalecio Cabana Leira, e o director do centro Mariano Dopico, acordouse a renovación destes aseos, así como a creación dunha nova aula de Educación Infantil e a mellora do peche perimétrico do colexio. Mentres que a primeira das melloras xa está rematada e correu a cargo do Concello, nestes momentos estase á espera da dotación de materiais por parte da Consellería de Educación para poder reparar os peches en mal estado, xa que algúns contan con gretas e son pouco estables. Respecto da nova aula de Educación Infantil, para non interromper a actividade cotiá, dende o centro informan de que está previsto que as obras se leven a cabo ao longo do próximo verán. Para crear este novo espazo tíñanse estudado varias posibilidades, como reducir o tamaño do despacho de dirección ou modificar varios tabiques para facer lugar. Finalmente a aula crearase aproveitando a superficie de varios dos despachos e de parte do corredor.
ENTRE O 15 DE DECEMBRO E O 6 DE XANEIRO
Mércores 12 de decembro do 2012
Un ano máis Carballo festexa o Nadal cun programa de actividades para todos os públicos, pero que presta especial atención aos cativos e cativas. Coa colaboración do Concello, de moitas das entidades culturais do municipio e dos centros educativos, o Nadal Cultural está centrado na Cabalgata de Reis e nos espectáculos do Nadal Pequespectacular, pero tamén inclúe a presentación dun libro, contacontos, teatro ou a tradicional chocolatada na Ludoteca. O programa do Nadal Pequespectacular desenvólvese entre o mércores 26 e o venres 28 de decembro e as entradas poden reservarse a partir do mércores 19 de decembro nas oficinas do Pazo da Cultura ou no 981 704 300 de 11.00 a 14.00 horas. Porén, as actividades principian xa o sábado 15 coa entrega de premios do Concurso do Cartel e Postal de Nadal, que irá acompañado de Cantos de Nadal a cargo das Cantareiras e Cantareiros da AC Argazo, do Coro O Candil, das Cantareiras e Cantareiros de Arume de Berdillo e do Coro Vagalume. A cita é a partires das 18.30 horas e está patrocinada por Todo Lar. Na primeira fin de semana do programa, o domingo 16 é a quenda do Festival de Nadal para a Terceira Idade, no Pazo da Cultura ás 18.00 horas co Dúo Libertad e co sorteo de 15 lotes de Nadal.
ATÉ O 21 DE DECEMBRO NO FÓRUM CARBALLO
Martes 11 de decembro do 2012
A planta baixa do Fórum Carballo acolle até o venres 21 de decembro "O noso mundo, o noso futuro, a nosa opción", unha mostra que reflexiona sobre o cambio climático a través da problemática do sector enerxético e os efectos sobre o quecemento global. Así, moitas das actividades que realizamos na nosa vida cotiá provocan, directa ou indirectamente, emisións de gases de efecto invernadoiro, e por tanto contribúen a un dos principais problemas ambientais deste século: o cambio climático. A subida do nivel do mar, as vagas de calor, tormentas, inundacións, etc., son algunhas das consecuencias, que por todo o planeta, provoca este fenómeno. Nas nosas mans está impedir que isto aconteza, pero, é preciso que todos os actores sociais se involucren na loita contra esta problemática global. A exposición está aberta a visitas guiadas dos escolares dos centros de ensino do municipio, e tamén está dispoñible para o público en xeral en horario de 9.00 a 14.00 horas. A produción da exposición correu a cargo do CEIDA (Centro de Extensión Universitaria e Divulgación Ambiental de Galicia) e INEGA (Instituto Enerxético de Galicia) coa colaboración da Consellería de Innovación e Industria, a Dirección Xeral de Desenvolvemento Sostible da Consellería de Medio Ambiente e Desenvolvemento Sostible, o Ministerio de Medio Ambiente, a Alianza del clima, a Dirección Xeral de Medio Ambiente da Comisión Europea e o propio Concello carballés.
.jpg)