NOVA XUNTANZA DA COMISIÓN INFORMATIVA DE URBANISMO
Luns 10 de decembro do 2012
A Concelleira de Planificación e Desenvolvemento Urbano, Milagros Lantes, acompañada do Alcalde de Carballo, Evencio Ferrero, e de responsables do equipo redactor do Plan Xeral de Ordenación Municipal (PXOM) veñen de manter unha reunión, xunto co arquitecto municipal, Alfredo Garrote, e outros técnicos e membros do goberno para examinar a documentación íntegra do PXOM, que foi entregada hoxe, luns 10 de decembro, no Concello. Despois de varios meses de traballo, esta proposta de planeamento, que será incluída nunha sesión plenaria ao longo do mes de decembro para a súa aprobación inicial, recolle todas as achegas e suxestións realizadas tanto polos técnicos como polos grupos políticos, respecto do solo urbano da vila de Carballo, a costa e os núcleos rurais. Os redactores procuraron estas incorporacións nun traballo realizado ao longo de todo o mes de novembro e intentando manter a seguridade xurídica do documento e evitar erros que afecten aos dereitos dos propietarios e á clasificación do solo. O seguinte paso agora antes da celebración do pleno é manter unha nova xuntanza da Comisión de Urbanismo nos próximos días coa presenza de todos os grupos municipais para ditaminar o documento. De recibir o PXOM o visto e prace no pleno, abriríase o período de exposición pública e presentación de alegacións, no que os veciños e veciñas teñen a oportunidade de presentar as súas propias modificacións para o documento.
MÉRCORES 12 DE DECEMBRO ÁS 20.30 HORAS
Venres 7 de decembro do 2012
O vindeiro mércores 12 de decembro ten lugar no Forum Carballo ás 20.30 horas unha charla-obradoiro dirixida ao empresariado carballés e bergantiñán sobre a vantaxe das empresas galegas para a internacionalización no incipiente mercado brasileiro e lusófono. Debido á crise en Europa, as empresas precisan procurar novos mercados internacionais. Estes novos mercados encóntranse principalmente nos BRIC (grupo de países con máis potencialidades de crecementos, formado por Brasil, Rusia, India e China). O principal desafío co que se atopa unha empresa é xerar confianza no mercado destino. Para iso debe comunicarse ben. Os galegos e as galegas temos dúas linguas que nos serven para comunicarnos internacionalmente con máis de 600 millóns de persoas, e isto para as empresas é moi importante, principalmente pensando no Brasil, toda unha potencia económica en crecemento. Para que as empresas de Carballo e Bergantiños lles poidan sacar mellor rendemento a esta vantaxe e potencialidade, organízase este pequeno obradoiro de unha hora e media de duración, que está organizado polo Concello de Carballo en colaboración coa Asociación de Xóvenes Empresarios de Bergantiños (Axober), a Comunidade de Propietarios do Polígono de Bértoa e a Asociación de Profesionais do Sector Turístico da Costa da Morte (Aptcm).
A NOVA ÁREA RECREATIVA ROLDA OS 3.000 METROS CADRADOS
Mércores 5 de decembro do 2012
O Concelleiro de Obras e Servizos, Luís Lamas, informa de que o Concello de Carballo está emprendendo estes días labores de mellora e arranxo en varias beirarrúas en distintos puntos da capital municipal. Os traballos consisten, ademais de na reposición de lousas crebadas ou en mal estado, no cambio das conducións do subministro de auga, xa que serán substituídas as actuais de uralita por outras de polietileno. Os lugares onde se están desenvolvendo as melloras, que seguirán nos próximos días, son: a rúa Vila de Ordes entre a Avenida de Bergantiños e a Gran Vía; na marxe dereita da rúa Alfredo Brañas entre a Vázquez de Parga e a rúa Muíño (na imaxe os operarios levantando o pavimento); e tamén se fará na confluencia da rúa Médico Manuel Regueiro coa Avenida de Razo nun pequeno treito. Precisamente na contorna das rúas Médico Manuel Regueiro e Muíño da Pintura veñen de rematar os primeiros traballos para acondicionar unha nova zona verde arredor do Rego da Balsa, a carón do IES Isidro Parga Pondal, que conta cun total de 2.900 metros cadrados de superficie. Nos últimos días realizáronse labores de desbroce, de limpeza e aplanamento do terreo, ademais de realizarse unha achega de terra, de sementarse novo céspede e de habilitarse unha senda peonil de zahorra. Unha vez que medre a vexetación está previsto colocar mesas, bancadas e papeleiras que xa son de propiedade municipal para habilitar un pequeno merendeiro.
PRÓXIMA XUNTANZA: O 22 DE XANEIRO
Martes 4 de decembro do 2012
Representantes dos catro grupos políticos da corporación municipal presididos polo Alcalde, Evencio Ferrero, e acompañados de responsables do Departamento de Servizos Sociais de Carballo, así como de membros de Cruz Vermella e Cáritas Diocesana veñen de constituír unha Comisión de coordinación social destinada a axudar aos máis necesitados e a responder ante as situacións de emerxencia social nestes tempos de crise. Durante a xuntanza, dunha hora e media de duración, tanto as entidades como os Servizos Sociais municipais expuxeron a situación actual, na que numerosas persoas e familias forman parte da súa rede de atención. Unha das conclusións ás que se chegou é que polo de agora están cubertas as necesidades relacionadas co reparto de alimentos, atendidas por Cruz Vermella, Cáritas e Concello. Porén acordouse que haxa unha nova reunión o 22 de xaneiro para tratar máis en profundidade e analizar as situacións derivadas dos desafiuzamentos, producidos a consecuencia tanto do non pagamento de hipotecas como de alugueres. Os representantes dos grupos políticos valoraron, así mesmo, o traballo realizado até o de agora tanto por parte do Concello como por parte de Cruz Vermella e Cáritas e acordaron que é necesario seguir avanzando na axuda, incluso solicitando medidas como que a Xunta de Galicia acurte os prazos de atención da RISGA.
A GAÑADORA É UNHA ALUMNA DO CEIP A CRISTINA
Luns 3 de decembro do 2012
O luns 3 de decembro tivo lugar no Pazo de Cultura a reunión do xurado encargado de fallar o Concurso de Cartel e Postal de Nadal 2012, convocado pola Concellaría de Cultura do Concello de Carballo. O xurado estivo constituído por alumnado dos centros de ensino, representados, neste caso, por Raquel Martínez Blanco e Eduardo Castro Fernández, alumnos do Colexio Artai; e por Daniel Otero Suárez e Iria Gundín Cerviño, alumnos do CEIP Fogar; así como por un representante dunha asociación cultural, este ano Adelina Fernández Taibo, membro da AC A Braña de Rus; unha artista local que ten gran experiencia no mundo da arte plástica, Eva Facal Lazo; e en nome do Concello de Carballo estivo presente a Concelleira de Planificación e Desenvolvemento Urbano, Contratación e Feiras e Mercados, Milagros Lantes Seara. Logo das oportunas deliberacións, resultou elexida como Postal gañadora a presentada por Nerea Vilariño Cabeza, de 11 anos e alumna do CEIP A Cristina, outorgándoselle un premio de 175 euros en libros e xoguetes educativos e un diploma. Tal e como se recolle nas bases, o centro educativo ao que pertenza o gañador deste galardón, outórgaselle un premio por valor de 150 euros en material didáctico e que este ano recae no CEIP A Cristina. Na imaxe pode verse a postal gañadora do ano 2011. A imaxe gañadora deste ano farase pública cando se presente o programa do Nadal Cultural 2012.
APRAZAMENTO DE SOBRECÁNONES DO MERCADO
Luns 3 de decembro do 2012
A Xunta de Goberno Local en sesión ordinaria vén de dar conta dun Convenio de colaboración coa Academia Enter para a realización de prácticas non laborais en empresas. Por este acordo, o Concello acolle nas súas dependencias a dúas alumnas que realizarán prácticas non remuneradas no edificio do Fórum Carballo (tendo como titor a Juan Lorenzo, director do Centro Municipal de Formación) e no Departamento de Cultura (tendo como titora a Carmen Castro, Animadora Cultural e Xefa de Programas do Concello) durante 60 e 80 horas respectivamente entre o 28 de novembro e o 12 de decembro de 2012. O obxectivo destas prácticas é o de complementar a adquisición por parte do alumnado da competencia profesional acadada no centro formativo mediante un conxunto de actividades produtivas no centro de traballo, contribuír ao logro das finalidades xerais na súa formación profesional, facilitar a avaliación dos aspectos máis relevantes da competencia profesional adquirida polo alumnado e facilitar a súa futura inserción profesional. O seguimento e avaliación do alumnado será realizado polo profesorado do centro en colaboración co instrutor do centro de traballo. O convenio aclara que a relación entre o alumnado e o centro de traballo non terá en ningún caso natureza xurídica laboral ou funcionarial e que non recibirá retribución algunha pola súa actividade formativa.
A CITA PECHOU OS ACTOS CON MOTIVO DO 25 DE NOVEMBRO
Venres 30 de novembro do 2012
Máis de 250 nenos e nenas de 1º de Primaria dos centros de ensino do municipio asistiron no auditorio do Pazo da Cultura a unha sesión de Contatontos pola Igualdade e a Convivencia no marco do programa de actos da Concellaría de Igualdade e Benestar para conmemorar o 25 de novembro, Día Internacional para a Eliminación da Violencia de Xénero. O obxectivo da actividade é o de tratar de maneira sinxela a barreira de xénero, para que os cativos e cativas rompan con ela, e tamén loitar contra a xerarquización dos estereotipos e roles asignados arbitrariamente a un e outro sexo, e así contribuír a educar nos valores do respecto, a tolerancia e a igualdade. Durante a sesión fomentouse a educación en igualdade de oportunidades entre nenas e nenos desde a animación á lectura, así como a coeducación para previr a violencia de xénero. Ao longo dunha hora despregouse un repertorio de contos cos que se fixo reflexionar aos máis pequenos sobre as diferenzas entre homes e mulleres, a integración, a cooperación, a corresponsabilidade, etc. Con esta cita péchanse os actos de todo un mes dedicado á loita pola igualdade con obradoiros para o alumnado dos centros de ensino, exposicións e a Feira das Asociacións que, como cada ano dende 2004, contou coa presenza de distintas entidades que traballan en Carballo con e a prol das mulleres.
O SÁBADO 1 DE NOVEMBRO ESTÁN PREVISTAS EXHIBICIÓNS DE RESCATE
Venres 30 de novembro do 2012
O Alcalde de Carballo, Evencio Ferrero, e o Concelleiro de Deporte, Marcos Trigo, acompañaron aos responsables da organización do Congreso Internacional de Salvamento e Socorrismo 2012 durante o acto de inauguración desta cita que ten lugar nas instalacións do Fórum Carballo e en distintos puntos do municipio até o domingo 2 de decembro. Segundo Nuria Rodríguez, presidenta da Federación de Salvamento e Socorrismo de Galicia (Fessga), o obxectivo é que as actividades "sirvan para o facer profesional" dos arredor de 150 socorristas, deportistas, voluntarios e responsables da medicina que se dan cita durante tres días para reflexionar sobre o salvamento, os primeiros auxilios e o salvamento deportivo. Marcos Trigo subliñou que xa hai 25 anos que o salvamento comezou a súa historia en Carballo e espera que o Congreso sexa útil, non só para reivindicar a profesión, senón tamén para "que sexa recoñecida e valorada pola responsabilidade e o papel que xoga nas nosas vidas". O Alcalde, pola súa banda, desexou que, despois dos primeiros 25 anos na vila, "o socorrismo siga durante moitos anos máis e se tome como exemplo de superación". Ferrero tamén resaltou o feito de que Carballo sexa a única vila de Galicia con dous clubs de salvamento deportivo e espera que os asistentes ao Congreso, algúns chegados dende lugares como Noruega, Brasil, Portugal ou Holanda, desfruten da Costa da Morte, "lugar difícil onde golpean as augas do Atlántico pero no que tamén vemos saír o sol".
VENRES 30 DE NOVEMBRO E SÁBADO 1 DE DECEMBRO
Xoves 29 de novembro do 2012
O Novembro con Música 2012, o programa musical elaborado pola Concellaría de Cultura do Concello de Carballo, coa colaboración das Agrupacións Musicais de Carballo e da Deputación da Coruña, chega á súa fin esta fin de semana con dúas propostas organizadas polo propio Concello. O venres 30 de novembro o auditorio do Pazo da Cultura acolle o Concerto do alumnado e das agrupacións do Conservatorio Profesional de Música de Carballo, no que intervirán alumnos e alumnas do centro, así como grupos musicais que tamén dirixen mestres do Conservatorio. A cita é a partir das 20.00 horas e a entrada é libre e gratuíta ata completar aforo. O sábado día 1 de decembro pecha oficialmente o programa a Banda Municipal de Música de Carballo que, baixo a dirección de Vicente Pérez Planells, ofrece un variado programa onde non faltarán temas clásicos, contemporáneos, obras de autor e como non, os pasodobres. Este concerto ten lugar o sábado 1 de decembro ás 21.00 horas e, como no caso anterior, a entrada ao auditorio é libre e gratuíta ata completar aforo. Péchase así o Novembro con Música 2012, un programa que se desenvolveu durante todo o mes de novembro, e no tiveron cabida todo tipo de estilos musicais: desde o pop-rock ata a música clásica ou desde a música tradicional á música coral ou incluso os cantos de berce.
NO FÓRUM CARBALLO ENTRE O 30 DE NOVEMBRO E O 2 DE DECEMBRO
Mércores 28 de novembro do 2012
Arredor de 150 persoas participan entre o venres 30 de novembro e o domingo 2 de decembro no Congreso Internacional de Salvamento e Socorrismo 2012 que se celebra no Fórum Carballo e que está organizado pola Federación de Salvamento e Socorrismo de Galicia (Fessga) coa colaboración da Deputación da Coruña, o Concello, Carballo Deporte, Protección Civil e o Consorcio Provincial de Bombeiros. Doutores, profesores e relatores expertos na materia chegados de Holanda, Brasil, Portugal, Noruega e de moitos puntos da xeografía española e galega analizan durante tres días as claves do salvamento, os primeiros auxilios e o salvamento deportivo. Segundo explica a presidenta da Fessga, Nuria Rodríguez, un dos maiores atractivos do programa céntrase nas exhibicións do sábado 1 de decembro que están dirixidas non só aos participantes no Congreso senón a todos os veciños e veciñas que queiran asistir. Así, está previsto que a partir das 14.00 horas, e coa presenza da Axencia Galega de Emerxencias, Asociación de Cans de Salvamento de Galicia, Protección Civil de Carballo e o Consorcio de Bombeiros lugares como Verdes, as praias de Razo e Baldaio e a explanada do Fórum Carballo acollan un obradoiro de rescate en ríos e acantilados, un simulacro de rescate coa participación do helicóptero Helimer Galicia, un simulacro de rescate con embarcacións, unha exhibición de rescate con cans ou un obradoiro de excarceración.
ACTUALÍZANSE OS PREZOS DE USO DAS INSTALACIÓNS DEPORTIVAS
Martes 27 de novembro do 2012
O pleno da corporación vén de aprobar a modificación da Ordenanza fiscal nº 6, reguladora das taxas de recollida de lixo para 2013 -cos votos a favor do goberno, en contra de PP e TEGA e a abstención do PSOE- e despois de desestimarse a única alegación presentada, unha emenda que no seu momento recibiu un informe negativo da Oficina Técnica e que se refería fundamentalmente ás condicións para o cobramento da taxa a vivendas desocupadas. Unha vez rexeitada a alegación e tan pronto se publique no BOP (Boletín Oficial da Provincia) entrará en vigor esta modificación da normativa pola que en 2013 comezarán os trámites para cobrar o recibo a arredor de 2.200 vivendas baleiras do municipio. Será a Oficina Técnica a que, en caso de dúbida ou presentación de alegacións, ditamine a condición de habitabilidade das vivendas, xa que o que determinará que unha vivenda deba contribuír ao pago da taxa é que estea en condicións de obter unha licenza de primeira ocupación. A modificación tamén supón unha suba dun 2,5 por cento para ter en conta o IPC (que ascende a un 3,8 por cento). Así mesmo, recolle cambios nos importes para establecementos comerciais co obxecto de aplicar taxas máis progresivas. Deste xeito, sube o importe que abonan os bancos por metro cadrado, ou o dos grandes autoservizos como Froiz, Día, Gadis, etc. e establecementos que xeran un elevado nivel de residuos. Porén, baixan outras taxas como as das perruquerías, froitarías, carnizarías ou panadarías.
SUBSCRITA POR UNANIMIDADE DOS MEMBROS DA CORPORACIÓN
Domingo 25 de novembro do 2012
A violencia de xénero é un atentado contra a integridade, a dignidade e a liberdade das mulleres, e salienta as desigualdades aínda existentes na sociedade entre mulleres e homes. Manifestada a través de violencia física e mortes, tamén inclúe episodios de violencia psicolóxica e emocional que se manifesta na desvalorización da muller, no menosprezo do seu traballo e no illamento social. Cada ano, centos de vítimas son atendidas polos servizos públicos, aos que hai que engadir moitos casos que ocultan a súa condición de maltratadas, así como a moitas outras mulleres que, desgraciadamente, son asasinadas a mans das súas parellas ou exparellas. Todas estas vítimas fan que a violencia de xénero se converta nun drama de grandes dimensións que afecta a toda a sociedade. Para prever e erradicar esta lacra social temos que sumar todas as forzas: rexeitala enerxicamente por medio da tolerancia cero, amosarlle ás mulleres que non están soas, e enviarlle unha mensaxe clara aos maltratadores, que non contan co apoio nin de homes nin de mulleres. Por todo isto é necesaria a implicación do conxunto dos poderes públicos e da sociedade en xeral. A sociedade galega non debería aceptar ningunha forma de violencia de xénero, e as institucións locais teñen que responsabilizarse nesta tarefa.
.jpg)