AS PRINCIPAIS MODIFICACIÓNS REFÍRENSE AO SOLO URBANO
Venres 9 de novembro do 2012
Despois dun longo traballo por parte do equipo redactor do Plan Xeral de Ordenación (PXOM) de Carballo, así como dos grupos políticos da corporación e dos técnicos municipais, finalmente o Concello espera que a aprobación inicial do documento poida realizarse nunha sesión plenaria antes de que remate o ano. O xoves 8 de novembro tivo lugar unha nova xuntanza da Comisión Informativa de Urbanismo na que o equipo redactor presentou un informe no que se recollen todas as achegas e propostas realizadas, tanto polos técnicos como polos grupos políticos, respecto do solo urbano da vila de Carballo, a costa e os núcleos rurais. As modificacións están clasificadas en erros detectados no documento, condicións da ordenación, capacidade residencial, artigos na normativa e reformas dos sistemas viarios, dotacións e accións de interese público. A proposta dos redactores é introducir as modificacións baseándose en conseguir a seguridade xurídica do documento e evitar erros que afecten aos dereitos dos propietarios e á clasificación do solo. Durante a reunión, relatáronse aquelas propostas que finalmente se incorporarán á documentación, afectando os cambios fundamentalmente ao solo urbano e tamén á normativa, neste último caso en canto a condicións de ordenación e edificación para aclarar os contidos. Despois da xuntanza, o seguinte paso e incorporar de feito estas achegas ao PXOM, algo que o equipo redactor espera facer antes de que remate o mes de novembro.
AS OBRAS REALIZARANSE EN 14 PISTAS MUNICIPAIS
Xoves 8 de novembro do 2012
O Concello de Carballo emprendeu hai uns días uns traballos para mellorar a Ruta das Férvedas (PR-G 142) uns labores que remataron esta semana. A actuación consistiu na creación dun treito de chanzos (na imaxe) nunha zona de pronunciado desnivel na ruta, situada entre as Férvedas de Rus e Entrecruces, cerca do castro de Ouxas. O motivo foron as queixas dos usuarios e usuarias, que tiñan dificultades para salvar ese tramo do percorrido debido á súa pendente. Os traballos consistiron na creación de escaleiras ao longo do camiño pero sen ocupalo por completo, para permitir o tránsito dos sendeiristas e ao mesmo tempo facilitar o paso de bicicletas por un dos laterais. Hai que lembrar que precisamente a mediados de outubro a Brigada de Medio Ambiente estivo realizando labores de desbroce e de retirada de maleza na Ruta, que transcorre entre A Brea e San Paio e que conta con preto de 19 quilómetros de lonxitude, incluíndo dous saltos de auga: a Férveda de Rus (no rego da Férveda) e a Férveda de Entrecruces. Coa colocación dos chanzos e os labores de mantemento a PR-G 142 está xa en perfectas condicións para que o Club Ciclista Carballo desenvolva a súa II Marcha Cicloturista o domingo 11 de novembro, na que está previsto que participen arredor de 100 deportistas da zona, pero tamén de lugares como Ferrol ou A Coruña, que poderán desfrutar do percorrido.
VISITA DO XEFE TERRITORIAL: INDALECIO CABANA
Mércores 7 de novembro do 2012
O Concello de Carballo e a Consellería de Educación, Cultura e Ordenación Universitaria colaborarán para realizar melloras no CEIP Gándara-Sofán. Así transcendeu despois dunha visita que realizou hoxe o Xefe Territorial, Indalecio Cabana Leira, ao centro educativo, e na que estivo acompañado polo Alcalde de Carballo, Evencio Ferrero, pola Concelleira de Educación, Mar Eirís, e polo director do centro, Mariano Dopico, entre outros. Durante o percorrido realizado polas instalacións do colexio, examináronse os peches, xa que algúns están en mal estado, con gretas e pouco estables. Finalmente, os deteriorados serán repostos con materiais facilitados pola Consellería. Así mesmo, Cabana puido observar un dos aseos da planta baixa, en estado bastante deficiente. O acordo inclúe a separación deste aseo en espazos para nenos e nenas, xa que nestes momentos é mixto, e a creación dun sanitario adaptado. Por último, os técnicos da Xunta e do Concello estudarán a realización dunha reforma da planta baixa para poder dotar o centro cunha nova aula de Educación Infantil para que o CEIP conte con tres en lugar das dous que ten na actualidade. Baralláronse varias posibilidades, como reducir o tamaño do despacho de dirección ou modificar varios tabiques para facer espazo. Porén, serán os técnicos os que concreten o proxecto nos próximos días. O obxectivo é precisar a natureza das reformas e a consignación orzamentaria o antes posible para que os traballos poidan principiar antes de que remate o ano.
ACTIVIDADES ENTRE O 9 DE NOVEMBRO E O 1 DE DECEMBRO
Mércores 7 de novembro do 2012
Carballo honra un ano máis a Santa Cecilia co programa Novembro con Música (NCM) que aglutina a preto de 450 intérpretes en 30 agrupacións que ofrecen nove concertos ao longo de todo o mes. Moitas das actividades constitúen citas xa consolidadas como o festival de rock 'Live in Cances' -que abre o programa o venres 9 de novembro- , 'Sons de aquí', o concerto do Conservatorio Profesional de Música, o concerto de Santa Cecilia, o Festival de Corais, o concerto da Banda Municipal ou o ciclo 'En Familia', dirixido aos máis cativos e cativas e que nesta edición conta con dúas citas. Máis dunha ducia de actividades organizadas polo Concello e por moitas das asociacións culturais e agrupacións musicais do municipio, coas que colaboran organismos como a Deputación da Coruña. Este ano, ademais, o programa conta co patrocinio de Primera Persona Editorial ou coa presenza da Obra Social La Caixa. A maioría das citas, que se complementan con tres exposicións, aglutínanse nas instalacións do Pazo da Cultura, e todas son de balde ata completar o aforo dos espazos nos que se celebran. O Alcalde de Carballo, Evencio Ferrero, Mar Eirís, Concelleira de Cultura, e Jessica Herranz, de Primera Persona, presentaron un programa que "está dirixido non só para o público de toda a comarca, senón tamén para todas as idades", en verbas de Ferrero, colaborando a crear unha sociedade "máis viva".
A MOSTRA: NO PAZO DA CULTURA ATÉ O XOVES 15 DE NOVEMBRO
Martes 6 de novembro do 2012
O andar -1 do Pazo da Cultura de Carballo acolle até o xoves 15 de novembro a exposición "Móvete por África: as mulleres, futuro dun continente". Principian con esta mostra os actos programados pola Concellaría de Benestar para conmemorar o 25 de novembro, Día Internacional para a Eliminación da Violencia de Xénero. Así, ademais da exposición, que pode visitarse en horario de 18.00 a 21.00 horas, está previsto que ao longo de todo o mes os institutos e centros de educación Primaria do municipio acollan obradoiros centrados na prevención da violencia de xénero. Ademais, programarase unha sesión de teatro para sensibilizar sobre esta situación aos máis cativos e cativas e está previsto que o propio 25 de novembro, que este ano cadra coa feira dominical, se celebre a Feira das Asociacións. Ao igual que na anterior edición, estará situada no segundo andar do Mercado Municipal e acollerá stands cunha representación das principais entidades asociativas do municipio para amosar o traballo que desenvolven a prol dos servizos sociais e da defensa dos dereitos das mulleres. Así mesmo, na sesión plenaria do pasado mes de outubro, a corporación aprobou por unanimidade unha Declaración Institucional contra a violencia de xénero (25 de novembro). Nela o Concello comprométese, entre outras cousas, a impulsar unha política municipal activa, integral e coordinada a favor de igualdade e contra a violencia de xénero.
INDALECIO CABANA VISITA O CENTRO O MÉRCORES 7 DE NOVEMBRO
Martes 6 de novembro do 2012
O Alcalde de Carballo, Evencio Ferrero, acompañado da Concelleira de Educación, Mar Eirís, do director do CEIP Gándara-Sofán, Mariano Dopico, e de tres nais integrantes da ANPA do centro, vén de entrevistarse co Xefe Territorial de Educación, Indalecio Cabana Leira, para expoñerlle as necesidades do colexio, que precisa de diversas melloras. Entre elas, hai que destacar a mala situación dos peches do centro ou dos aseos das instalacións. Así mesmo, os responsables do CEIP consideran que sería necesaria unha redistribución das aulas ou a modificación do servizo de comedor para que dependera directamente da Xunta e eliminar o catering co que conta o centro na actualidade, que supón un custo elevado. Por último, os representantes da comunidade educativa falaron sobre a posibilidade de implantar a xornada única. O Alcalde e a Concelleira de Educación axuntaron un informe realizado pola Oficina Técnica Municipal no que se reflicten as principais eivas, non só do CEIP Gándara-Sofán, senón do CEIP Nétoma-Razo, que tamén precisa melloras no peche, ou outras problemáticas existentes en todos os centros do municipio. O Xefe Territorial amosou a dispoñibilidade de ver en persoa as instalacións do CEIP Gándara-Sofán, polo que está previsto que visite o mércores 7 de novembro ás 9.30 horas o colexio para comprobar in situ a situación do centro educativo e ver cales das demandas expostas poden ser atendidas pola Consellería.
OS MÉRCORES 21 E 28 DE NOVEMBRO NO PAZO DA CULTURA
Luns 5 de novembro do 2012
O Concello de Carballo, a través do seu Servizo de Normalización Lingüística, organiza un obradoiro de nanas dirixido a nais e pais, presentes ou futuros, así como a outr@s familiares e formadores que queiran aprender ou practicar o aproveitamento do poder emocional das nanas e cantos de berce para arrolar os seus bebés. Este pequeno obradoiro ten catro horas de duración, e desenvólvese o mércores 21 e o mércores 28 de novembro, en horario de 17.00 a 19.00 horas, no Pazo da Cultura de Carballo. Nel poden participar un máximo de 25 persoas, ben soas, ben acompañadas do seu bebé. A inscrición é gratuíta e pode facerse no Servizo de Normalización Lingüística (no Pazo da Cultura) ou no teléfono 981 704 304, en días laborables en horario de mañá. De impartir o obradoiro encárgase o músico bergantiñán Xabier Díaz, que é cantante do grupo Berrogüetto e que, entre outros proxectos, publicou o ano pasado o disco "Arrolos de salitre", un álbum que contén precisamente 11 cantos de berce en galego e que foi presentado, con grande éxito, no mes de agosto na Praza dos Libros de Carballo. Este disco foi editado xunto co músico Guillerme Fernández, que tamén participa no obradoiro de nanas. Nas dúas sesións das que consta este obradoiro, as persoas participantes aprenderán a cantarlles aos bebés diversas nanas galegas, tanto de autoría como populares.
PRINCIPIAN OS TRABALLOS PARA UNHA REDE DE SANEAMENTO EN ARTES
Luns 5 de novembro do 2012
A Xunta de Goberno Local vén de aprobar a contratación da Fase I da obra "Mellora do sistema xeral de abastecemento a Carballo: Anllóns-Bardoso". O proxecto -elaborado en agosto de 2012 pola consultora Egis-Eyser SA- inclúe a execución dun novo depósito regulador de auga de 5.000 metros cúbicos en Seixo Branco, conectado co actual depósito de Paraíso, así como a instalación dunha nova condución de 400 mm de diámetro de 1.630 metros de lonxitude dende este novo depósito ata o lugar de A Ponte de Bértoa sobre o Río Anllóns. O orzamento previsto é de 1.153.754 euros (IVE engadido) e estes traballos están cofinanciados pola Unión Europea a través das axudas do Fondo Europeo de Desenvolvemento Rexional (Feder). O sistema de adxudicación é o procedemento aberto con varios criterios de valoración, entre os que se atopan: a proposta económica (o de máis peso), a identificación dos condicionantes externos da obra, o programa de construción, o plan de control de calidade, a memoria das condicións ambientais, a memoria descritiva, a porcentaxe para o control externo de calidade e as melloras técnicas e de obra. O prazo total de execución previsto para a Fase I é de oito meses. O "Proxecto Anllóns-Bardoso. Posta en valor dos ríos" ten un orzamento global, incluíndo as dúas fases, de 4.145.796,5 euros, dos cales 2.902.057,59 euros serán achegados polos fondos europeos. Esta iniciativa mellorará considerablemente o subministro e a calidade das augas na capital carballesa, ademais da protección do Anllóns en situacións de seca.
A ORGANIZACIÓN ESPERA A PARTICIPACIÓN DE MÁIS DE 100 PERSOAS
Venres 2 de novembro do 2012
O Club Ciclista Carballo-Placasa, coa colaboración do Concello, organiza por segundo ano consecutivo unha Marcha Cicloturista que transcorre pola Ruta das Férvedas, un percorrido que principia na capital municipal e que remata en Entrecruces no que se poden contemplar importantes paraxes a nivel ambiental, como as férvedas de Rus e Entrecruces, pero na que tamén están incluídos bens patrimoniais como as igrexas das parroquias de Ardaña, Rus e Entrecruces, destacando sobremaneira a barroca de Sta. María de Rus (a máis importante do Concello a nivel artístico). A cita é o domingo 11 de novembro, e a saída está prevista para as 9.00 horas dende o Pavillón Vila de Noia (Zona Escolar) onde estará situada a Oficina Permanente e o Parque Pechado desde dúas horas antes. A proba inclúe servizo de duchas, vestiarios, aparcamento reservado para coches, lavadeiro de bicicletas, avituallamento durante a marcha e uns pinchos ó finalizar para repor forzas, que falta fará xa que a marcha é dunha dificultade media-alta. A inscrición, de 12 euros para federados, e de 24 para non federados, pode formalizarse na páxina web do Club Ciclista Carballo <cccarballo.com> ata o mesmo día da proba pouco antes da saída, e nas oficinas Carballo Deporte.
BANCO EUROPEO DE TEMPO DE VOLUNTARIOS SÉNIOR
Mércores 31 de outubro do 2012
Un grupo de tres italianos maiores de 50 anos visita Carballo durante tres semanas dentro do proxecto "Senior BoT", Banco Europeo de Tempo de Voluntarios Sénior, que pretende dar a oportunidade aos seus integrantes de coñecer a cultura, a historia, as tradicións e a realidade doutros países a través da realización de actividades de voluntariado relacionadas con servizos da vida cotiá. Este é o segundo grupo de italianos que visita o municipio e un grupo de carballeses e carballesas xa tiveron a oportunidade de visitar Italia para intercambiar coñecementos, proxectos e ideas. Os participantes -que estarán até o 19 de novembro na vila- pertencen á Asociación Sud-Est Donne, xestora do proxecto en Italia, e proceden da rexión de Puglia (Apulia), situada xeograficamente no "tacón" da "bota" italiana con provincias como Tarento ou Brindisi. O proxecto Senior BoT corre cos gastos de desprazamento e manutención dos participantes durante a súa estadía no estranxeiro, dándolles ademais unha preparación previa antes da súa partida sobre o país de destino. Durante as próximas semanas, a delegación italiana levara a cabo intercambios coas persoas e entidades que colaboran co Banco de Tempo carballés, apoiando a cooperación informal para o desenvolvemento de diversas actividades e obradoiros. O Alcalde de Carballo, Evencio Ferrero; a Tenente de Alcalde, Milagros Lantes; a responsable do CIM (Centro de Información á Muller) Nieves Castañón; e dúas carballesas que xa viaxaran a Italia co programa estiveron na Alcaldía para falar cos participantes e darlles a benvida.
O ACTO DE SINATURA TIVO LUGAR NO SALÓN DE PLENOS CARBALLÉS
Mércores 31 de outubro do 2012
O Concello de Carballo, así como a parroquia, as funerarias do municipio e unha escolma de persoas en representación da vida política, social, cultural e empresarial do municipio subscribiron o martes 30 de outubro, en vésperas do día de Todos os Santos, a declaración Galeg@ para sempre, na que se recoñece a lingua como factor principal da galeguidade e coa que se quere facer público o desexo de, unha vez chegada a morte, ser lembrad@ en galego en posibles actos, funerais, recordatorios, lápidas, necrolóxicas, etc. O cura párroco, José García Gondar, realizou unha declaración sobre o compromiso e a importancia do uso do galego nos actos relixiosos; e as funerarias con presenza en Carballo (Pompas Fúnebres San Antonio, Pompas Fúnebres Bergantiños, Funeraria San José, Funeraria Santa Marta e Funeraria A Milagrosa) asinaron un compromiso co fomento do galego e de preguntarlles ás familias, en cada caso, que lingua queren que se use na lápida, recordatorio, necrolóxica, flores, etc. durante as honras fúnebres. O obxectivo desta acción é fomentar o galego nas cuestións relacionadas coa morte, visibilizando a lingua como factor principal da galeguidade e procurando que todas as persoas que viven en galego, tamén poidan morren en galego, xa que, na actualidade, a presenza da lingua galega despois da morte é moito inferior que ao longo da vida.
UNANIMIDADE PARA A DECLARACIÓN CONTRA A VIOLENCIA DE XÉNERO
Martes 30 de outubro do 2012
A corporación carballesa vén de celebrar a sesión plenaria ordinaria correspondente ao mes de outubro na que un dos puntos da orde do día que xerou máis debate foi o relativo á aprobación do complemento de prestacións ao persoal funcionario e laboral do Concello de Carballo en situación de incapacidade temporal. Dende o pasado 15 de outubro a norma establece que calquera traballador en situación de incapacidade temporal non ten dereito a percibir o 100 por cen da nómina. Porén, a administración local chegou a un acordo polo que en Carballo os traballadores nesas circunstancias si terán dereito á totalidade do seu salario, recorréndose a fondos municipais para asumir o custo correspondente. O acordo plenario ratifica esta resolución. Así mesmo, e tamén no relativo a cuestións de persoal, aprobouse o acordo obrigatorio da non dispoñibilidade de crédito para a paga extraordinaria dos traballadores do Concello de Carballo e do Padroado Deportivo Municipal, e que supón a inmobilización do diñeiro derivado da supresión desta paga. No caso dos traballadores do Concello, o importe é de 205.329,44 euros; e nos do Padroado de 20.412,30 euros. Entre os asuntos aprobados por unanimidade, destaca a Declaración Institucional do Concello de Carballo contra a violencia de xénero con motivo da conmemoración do 25 de novembro, que manifesta a vontade da administración local de seguir traballando para eliminar esta lacra, tentando implicar a todos os sectores da sociedade.
.jpg)