MÉRCORES 31 DE OUTUBRO ÁS 21.00 HORAS
Martes 30 de outubro do 2012
O FIOT 2012 afronta o seu peche tras un mes de intensa actividade e dunha programación na que se deron cita compañías galegas, nacionais e internacionais que confirman o Festival como a cita teatral do noroeste peninsular tras 21 edicións de andadura. Entre estas compañías estiveron Tantakka Teatroa, que abriu a programación de sala con "Contra el viento del norte"; Talía Teatro, que estreou a coprodución "O método Grönholm"; Animalario Teatro, que trouxo a Carballo aos actores Willy Toledo e Jesús Barranco; ou Kamikaze Producciones que representou "Juicio a una zorra" coa televisiva Carmen Machi como actriz protagonista. O peche desta edición pono Els Joglars, a compañía privada máis estable e lonxeva de Europa, coa montaxe "El Nacional". Antes do inicio da función (ás 21.00 horas), parte do elenco compartirá co público unha relaxada charla sobre o proceso creativo do espectáculo na actividade libre "Café con…" que ten lugar no Pazo da Cultura coa presenza de Ramón Fontserè a partir das 18.30 horas. Esta é a primeira vez que Els Joglars visita o Outono de Teatro e a expectación creada ante o espectáculo quedou patente hai un mes, cando as entradas soltas para a cita quedaron esgotadas en menos dunha hora. Para a organización do FIOT é un orgullo acoller a unha das compañías máis emblemáticas de España que desde a súa fundación hai medio século mantén a súa relevancia.
ELS JOGLARS PECHAN O FESTIVAL O MÉRCORES 31
Luns 29 de outubro do 2012
Juan Gende foi o encargado de recoller o Xograr de Outono 2012 concedido ao seu irmán, o deseñador e creativo carballés Alberto Gende, que recibiu este galardón honorífico a título póstumo, acompañado polo presidente da Asociación Cultural Telón e Aparte, Alberto Sueiro, e das mans do Xograr de Outono 2011, Kukas. Tanto a organización como Kukas dedicáronlle sentidas verbas a Alberto Gende. Así, o Xograr de 2011 quixo reivindicar o labor dos que elaboran as imaxes promocionais para o teatro "porque o primeiro que se ve non é unha obra, é un cartel", un elemento que ten "moita importancia" para levar ao público ás salas. Abafado pola emoción, Juan Gende explicou sentirse como "unha cara que chora e outra que ri", porque "non querería estar aquí, ao igual que non o quererían nin meus irmáns ni miña nai", a pesares da emoción que sentiron coa concesión do premio. Juan subliñou que aínda que Alberto non formaba parte de xeito literal das artes escénicas, "compartía cos actores e actrices a súa sensibilidade creativa", quedando "sen palabras" para describir o labor do seu irmán, e agradecendo á "xente do FIOT" o galardón, no seu nome e no da súa familia. Para rematar, case entre bágoas, quixo lembrar que "Alberto camiñou durante 19 anos co festival", polo que "mentres un dos dous siga vivo, o outro non morrerá" e desexou "longa vida a Alberto, onde estea, e longa vida ao FIOT".
O ALCALDE FORMALIZOU A SINATURA DO ACORDO NO CONCELLO
Venres 26 de outubro do 2012
O Alcalde de Carballo, Evencio Ferrero, e un representante da UTE (Unión Temporal de Empresas) formada por Urbaser e Servigal veñen de asinar na Casa do Concello o contrato de xestión do "Servizo público por procedemento aberto con varios criterios de adxudicación, baixo a modalidade de concesión, que ten por obxecto a recollida de lixo, transporte, Punto Limpo e Canceira do Concello de Carballo". A UTE manifestou a súa vontade de manter a próxima semana unha xuntanza co Concelleiro de Servizos, Luís Lamas, para ultimar detalles e facilitar o período de adaptación da nova xestión, xa que Urbaser e Servigal teñen seis meses de prazo dende o 1 de novembro, momento en que entra en vigor o contrato, para axustar o servizo, adaptar a maquinaria e realizar a dotación de persoal, entre outras cousas. Hai que mencionar que Lamas estivo ausente do acto de sinatura xa que nestes momentos está asistindo á Feira Internacional de Bioenerxía de Valladolid para afondar nas últimas novidades no aproveitamento de masa bioforestal e agrícola e a súa aplicación para o aforro de enerxía. Acompañaron ao alcalde na sinatura a Tenente de Alcalde e Concelleira de Contratación, Milagros Lantes; e o Concelleiro de Medio Ambiente, Marcos Trigo. Hai que lembrar que a adxudicación do servizo a Urbaser e Servigal foi ratificada na sesión plenaria do mes de setembro, que a UTE asumirá a xestión do servizo durante os próximos 16 anos e que supón un importe anual de 740.746,57 euros.
ADXUDICACIÓN DO PRÉSTAMO DE 900.000 EUROS A CAIXABANK
Venres 26 de outubro do 2012
A sesión plenaria ordinaria do mes de outubro inclúe entre os asuntos da orde do día o Informe de Intervención e Tesourería do cumprimento da Lei 3/2004 de loita contra a morosidade correspondente co terceiro trimestre de 2012, un informe do que as administracións locais deben dar conta obrigatoriamente cada tres meses. Segundo este documento, o Concello abonou un total de 894 facturas entre o 1 de xullo e o 31 de setembro, das que 818 -por un importe de 1.578.176,83 euros-, foron pagadas nunha media de 16,93 días; as restantes 76 facturas -por un importe de 68.900 euros- foron satisfeitas nun prazo medio de 66,12 días. Os servizos municipais informan de que durante os 76 días hábiles contabilizados no pasado trimestre entraron unha media de 11,76 facturas diarias no Rexistro de Entrada, e o prazo medio de pago, contabilizando a totalidade de facturas presentadas entre xullo e setembro, é de 21,11 días, case a metade do que marca a Lei, que impón un prazo máximo de 40 días para o abono das contas. Nese mesmo período quedaron rexistradas dúas facturas -por 1.066 euros- que se pagaron despois de máis de tres meses a causa de problemas administrativos. O Alcalde, Evencio Ferrero, cualifica este informe como "unha radiografía perfecta do bo momento económico do Concello", subliñou que Carballo é a única administración local da Costa da Morte que cumpre coa elaboración deste informe e transmitiu os seus parabéns aos Servizos Económicos polo seu dilixente traballo.
SÁBADO 27 DE OUTUBRO ÁS 21.00 HORAS
Venres 26 de outubro do 2012
A organización do Festival Internacional Outono de Teatro, formada pola Asociación Cultural Telón e Aparte e o Concello de Carballo, fai entrega o sábado 27 de outubro do Xograr de Outono 2012 ao deseñador e creativo carballés, Alberto Gende, a quen se lle concede este galardón honorífico a título póstumo. O acto terá lugar antes do inicio da función de Sarabela Teatro "Viaxe a ningunha parte" ás 21.00 horas no Auditorio do Pazo da Cultura. Nunha reunión celebrada o pasado 11 de outubro, os anteriores galardoados co "Xograr de Outono", -entre os que destacan Artur Trillo, Quico Cadaval, Dorotea Bárcena, Cándido Pazó ou Kukas, entre outros- decidiron conceder o premio a Alberto Gende, falecido hai uns meses, xa que durante case dúas décadas foi o autor da imaxe do FIOT. O anuncio da concesión realizouse xusto un día antes do 40 aniversario do homenaxeado e durante a inauguración pública da mostra retrospectiva "Alberto Gende: dezanove anos de percorrido xuntos" (na imaxe). Esta é a primeira ocasión que co "Xograr de Outono" se recoñece o labor dunha persoa que non está relacionada directamente coa profesión teatral ou que destaca pola súa traxectoria de promoción do teatro en Galicia; e a segunda que o galardón se concede a título póstumo. En 2002 o xurado decidiu entregar este título honorífico ao dramaturgo Roberto Vidal Bolaño o mesmo ano da súa morte.
O ALCALDE VÉN DE RATIFICAR O ACORDO EN SANTIAGO
Xoves 25 de outubro do 2012
O Alcalde de Carballo, Evencio Ferrero, vén de ratificar en Santiago de Compostela a adhexión do Concello á APLU (Axencia de Protección da Legalidade Urbanística) -organismo dependente da Consellería de Medio Ambiente, Territorio e Infraestruturas- coa sinatura dun convenio que permitirá que o municipio delegue nesta Axencia o exercicio das competencias municipais de inspección, supervisión, sanción e restablecemento da legalidade urbanística en relación coas obras e usos do solo que se executen sen licenza ou sen axustarse ás súas condicións. As actuacións deberán estar situadas nalgunhas das seguintes clases de solo: rústico e urbanizable, mentres non sexa aprobado o correspondente plan parcial ou de sectorización, así como no ámbito dos núcleos rurais delimitados. A APLU é un ente público de natureza consorcial, dotado de personalidade xurídica, patrimonio e orzamento propios e plena autonomía no cumprimento das súas funcións, para o desenvolvemento en común pola Administración autonómica e os municipios que voluntariamente se integren nela das funcións de inspección, restauración da legalidade e sanción en materia de urbanismo. Os ingresos obtidos por multas coercitivas e sancións administrativas impostas en exercicio das competencias delegadas serán repartidos a partes iguais de modo que o 50 por cento pasará á administración autonómica e o 50 por cento restante ao Concello.
ACTIVIDADES PARALELAS: "QUERES SER UN PERSONAXE TEATRAL"
Martes 23 de outubro do 2012
O FIOT entra na súa recta final con catro funcións seguidas entre o xoves 25 e o domingo 28 de outubro e pon o colofón con Els Joglars o mércores 31. Nestes momentos aínda quedan entradas para asistir a "Acto cultural" (na imaxe), dos venezolanos Grupo Actoral 80, e para os dous espectáculos que restan do OTNI: "Calla y come", de La Cocina, e "Fingir" dos cataláns Colectivo 96º. No caso de "Acto cultural" (venres 26 ás 21.00 horas), a proposta conta cómo nunha pequena vila, os membros da xunta directiva dunha Sociedade Cultural celebran os seus 50 anos cun acto no que representan o drama histórico "Colón Cristóbal, el genovés alucinado", ao que teremos a honra de asistir. Durante a representación, os patéticos protagonistas van desvelando ante os asistentes as súas vidas precarias, abandonos, desexos e miserias. Un retrato dun pobo que encerra un pasado, un presente e un futuro que os afoga. O divertido texto do popular dramaturgo venezolano José Ignacio Cabrujas parodia unha sociedade paralizada ante unha situación de crise que fantasea ou falsea a realidade, ata que ésta se impón. Grupo Actoral 80 é unha das referencias do teatro en Iberoamérica e na súa traxectoria atopamos premios internacionais e máis de corenta montaxes. As entradas, por 6,80 €, en <www.servinova.es> ou no 902 504 500.
LUZ VERDE PARA O PROGRAMA ANUAL DE ACTIVIDADES CULTURAIS 2012
Luns 22 de outubro do 2012
A Xunta de Goberno Local vén de aprobar as bases reguladoras para a creación dunha Bolsa de Traballo do Concello de Carballo. Así, o Centro Municipal de Formación, no seu labor de facilitar a inserción laboral da cidadanía, ofrece a toda a poboación activa unha Bolsa de Traballo Municipal que será de utilidade para as persoas en situación de desemprego que desexen regresar ao mundo laboral, para os que busquen o seu primeiro emprego ou para quen desexen mellorar a súa situación laboral actual. O obxectivo prioritario desta Bolsa será o de realizar unha función de intermediación laboral, constituíndo unha ferramenta de conexión entre a demanda e as ofertas de emprego que se xeran na contorna do Concello. Esta ferramenta permitirá a divulgación de información en materia de emprego, recursos humanos e promoción económica, e contribuirá á dinamización da actividade económica para incentivar a creación de emprego e a implantación de empresas no municipio. O proxecto tamén recolle a posibilidade de elaborar, de forma independente ou en colaboración con outros organismos, programas específicos que incidan no desenvolvemento local, establecer e afirmar contactos co sector empresarial da zona como estratexia facilitadora de acceso ao mercado de traballo ou mellorar a transparencia de información á cidadanía e redundar na igualdade de oportunidades. Ademais, será un servizo adicional ao que presta o Servizo Público de Emprego da Xunta a través da Oficina de Emprego.
ENTRE OUTOBRO E FEBREIRO NO FÓRUM E CON RUTAS NO MUNICIPIO
Sábado 20 de outubro do 2012
Vén de arrincar no recinto do Fórum Carballo o obradoiro infantil Sendas Carballo, organizado pola Asociación Ambiental Senda Nova coa colaboración do Concello, no que o obxectivo é que os participantes pasen un bo rato aprendendo todo o esencial sobre o patrimonio cultural e ecolóxico do municipio carballés, incluíndo castros, mámoas, bosques, ríos ou humedais. Nestes momentos xa están anotados unha decena de rapaces e rapazas, aínda que a entidade espera cubrir o cupo de 25 nenos e nenas de 5º e 6º de Primaria. Está previsto que a actividade teña unha duración de cinco meses (entre outubro e febreiro) e ten un custo de 9 euros ao mes. Durante o obradoiro desenvolveranse actividades de aula con temarios específicos, saídas ao medio, xogos, actividades e manualidades como a realización de maquetas e herbarios. As sesións de aula son os sábados de 10.00 a 13.30 horas e as saídas ao medio, con rutas polo municipio, levaranse a cabo os domingos. O presidente de Senda Nova, José Manuel Menéndez, quixo agradecer a colaboración do Concello para poñer en marcha esta iniciativa, así como a participación dos rapaces e rapazas que xa iniciaron a súa actividade no obradoiro. O Alcalde de Carballo, Evencio Ferrero, amosou a súa satisfacción por ver que "en Carballo hai persoas comprometidas co medio e co territorio", nun municipio "que ten moitos recunchos atractivos e interesantes".
ENTRE O 21 DE OUTUBRO E O 23 DE DECEMBRO
Xoves 18 de outubro do 2012
A Asociación Ambiental Senda Nova, coa colaboración do Concello e de Protección Civil de Carballo, organiza o I Outono en Marcha, unha iniciativa que pretende realizar percorridos por lugares de especial valor patrimonial, histórico, natural e paisaxístico, mudando o punto de vista para observar a comarca a través da choiva, das follas secas e do outono. O programa propón un total de cinco rutas, a maioría delas por Carballo, pero tamén tocando algúns concellos da comarca e limítrofes, tendo como outro dos seus obxectivos fomentar a práctica deportiva e o espírito de convivencia no marco da contorna natural. O presidente da entidade, Xose Manuel Menéndez, quixo subliñar durante a presentación da actividade a elevada afluencia do seu anterior proxecto, a III Primavera en ruta, que conseguir reunir a máis de 90 persoas nalgún dos seus percorridos entre marzo e xuño deste mesmo ano. Desexou que a xente se anime tamén no outono, a pesares das posibles inclemencias meteorolóxicas, xa que, segundo explica "se chove, teremos a oportunidade de gozar da choiva" e ver as paisaxes dun xeito diferente. O Alcalde, Evencio Ferrero, transmitiu os seus parabéns a Senda Nova por esta iniciativa, contribuíndo a "desterrar a idea de que Carballo é feo", e aproveitando as rutas para "coñecer o territorio doutra maneira". Así mesmo, quixo felicitar aos voluntarios de Protección Civil pola súa colaboración.
O ALCALDE RECIBIU AOS REPRESENTANTES DESTE CONCELLO FRANCÉS
Mércores 17 de outubro do 2012
O Alcalde de Carballo, Evencio Ferrero, acompañado da Tenente de Alcalde e representante do Concello no Consello Escolar Municipal, Milagros Lantes, vén de recibir na Casa Consistorial a unha delegación formada por representantes do Concello bretón de Vannes (Mairie de Vannes), do Comité para as relacións entre Bretaña e Galicia (Comité Bretagne Galice) e do Colexio Notre Dame de Vannes (Collège Notre Dame Le Ménimur), ademais de a membros do equipo directivo e do profesorado do IES Monte Neme carballés. Esta visita enmárcase dentro do Proxecto Comenius Regio "Échangeons notre échange scolaire" ("Intercambiemos o noso intercambio escolar") que busca promover o desenvolvemento de actividades de cooperación entre autoridades activas no eido da educación en Europa e contribuír así a mellorar a súa oferta de ensino, participando por parte de Carballo o IES Monte Neme. Nunha mestura entre galego, castelán e francés, os presentes contaron algunhas anécdotas, como que o alumnado do instituto amosou a súa sorpresa ao ver a banda que levan en Francia os representantes das alcaldías; ou algunhas experiencias de Ferrero e Lantes nas súas visitas á Bretaña. Así mesmo, Latifa Bakthous Ben Abdallah, Tenente de Alcalde de Vannes en materia de Educación, insistiu en invitar a unha delegación do Concello carballés a visitar Bretaña e Vannes, e agradeceu a hospitalidade galega e carballesa, manifestando a súa intención de recibir coa mesma amabilidade aos representantes carballeses cando viaxen a Francia.
INSCRICIÓNS ATÉ 26 DE OUTUBRO ÁS 13.00 HORAS
Mércores 17 de outubro do 2012
O Concello de Carballo informa de que a Antena Local da Cámara de Comercio da Coruña organiza a actividade formativa gratuíta "Marketing e finanzas para o comerciante", unha iniciativa enmarcada dentro do programa "Emprendedores no comercio" e que está especialmente dirixida tanto a novos emprendedores, coma a comerciantes xa establecidos que precisen formación para procurar a sostibilidade do seu negocio. Esta cita conta coa colaboración do Concello, ademais do CCA Carballo (Centro Comercial Aberto) e Axober (Asociación Xóvenes Empresarios de Bergantiños). A actividade consiste en impartir formación (presencial e online) e consultaría individualizada, sen ningún tipo de custo tanto para emprendedores que teñan un proxecto de empresa como para comerciantes en activo. A formación presencial impartirase en clases de luns a xoves no Viveiro de Empresas de Carballo situado no Polígono de Bértoa en horas de tarde sen interferir no horario laboral (de 20.30 a 22.00 horas), entre os días 29 de outubro e 9 de novembro de 2012. As inscricións poden formalizarse até as 13.00 horas do venres 16 de outubro nas instalacións do CCA e Axober (Rúa Fomento, 21-23, 1ºL, Telf.: 981 701 613 / 981 756 313); ou na Antena Local da Cámara de Comercio (Rúa Bronce, Esquina Rúa Cobre, s/n, Polígono de Bértoa, Telf.: 981 757 599); así como no correo: <carballo@camaracoruna.com>.
.jpg)