VENRES 23 DE MARZO ÁS 21.00 HORAS NO PAZO DA CULTURA
Xoves 22 de marzo do 2012
O programa dos Venres Culturais completa este 23 de marzo a súa oferta musical coa celebración do segundo dos dous concertos previstos de RockCarballo. A Concellaría de Cultura organiza esta iniciativa cos grupos de música electrónica/pop/rock/heavy que están a ensaiar nos locais do Pazo da Cultura, nunha actividade que ten o obxectivo de promocionar a estes artistas do municipio, integrándoos na programación xeral da Concellaría e que no seu momento asinaron o Convenio Musical co Concello de Carballo. Nesta segunda quenda actúan Lowcos, Refugio, Versión Imposible e Killer Cats. O concerto comeza ás 21.00 horas no auditorio do Pazo da Cultura e a entrada é libre e gratuíta ata completar aforo. A idea de crear Lowcos nace no ano 2010 en Londres onde se coñecen Suso -vocalista e guitarra- e Conrado -teclados, sintetizadores vento e demais intrumentos-. Desde ese momento fóronse engadindo o resto de membros do grupo, Diego -guitarra-, Pedrín -baixo- e Adrián -batería-, todos eles procedentes de estilos musicais moi variados. O resultado desta mestura é un estilo con sons que van dende a música electrónica ao rock mais clásico. Na actualidade Lowcos está autoeditando o seu primeiro traballo "7 pecados" coa produción de Niki García.
ESTARÁN NA VILA ATÉ O 5 DE ABRIL
Xoves 22 de marzo do 2012
Un grupo de voluntarios e voluntarias do programa Senior BoT -Banco Europeo de Tempo de Voluntarios Sénior- estiveron repartindo na feira de Carballo información sobre esta iniciativa europea (cofinanciada polo Programa de Aprendizaxe permanente Grundtvig da Comisión Europea) que ten como obxectivo desenvolver as competencias persoais, sociais e interculturais das persoas que participen, ofrecendo novas oportunidades de aprendizaxe a persoas maiores e fomentando o concepto de "envellecemento activo". Así, 3 integrantes da Asociación italiana Sud-Est Donne maiores de 50 anos e procedentes de Martina Franca están de visita en Carballo até o 5 de abril para coñecer durante unha estadía de 3 semanas a cultura, a historia, as tradicións e a realidade da vila e do país a través da realización de actividades relacionadas con servizos da vida cotiá. O proceso repetirase con outros tres visitantes no mes de setembro. O programa inclúe tamén a visita dun máximo de 6 veciños e veciñas de Carballo a Italia, repartidos tamén en dúas estadías de igual duración que se desenvolverán nos meses de maio e outubro. Xunto cos voluntarios, que recibiron a visita do Alcalde, Evencio Ferrero, estiveron difundindo a iniciativa a Concelleira de Igualdade e Benestar, Silvana Castro; e a responsable do CIM (Centro de Información á Muller), Nieves Castañón.
PRIMEIRA CITA: SÁBADO 24 DE MARZO
Xoves 22 de marzo do 2012
O Club Ciclista Carballo realiza por segundo ano consecutivo e coa colaboración da administración local o ciclo de rutas en bicicleta "Coñece o teu Concello", que ten por obxectivo "poñer en valor o patrimonio cultural e artístico" do municipio, así como fomentar o ciclismo, en verbas do Concelleiro de Deporte, Marcos Trigo. Son catro rutas gratuítas que percorren a maioría das parroquias carballesas e que son "sinxelas de facer" e "abertas a todo o mundo", segundo explica Juan Seoane, director deportivo do Club Ciclista Carballo. Seoane subliña que o ano pasado a iniciativa tivo un grande éxito, cunha media de 50 persoas en cada percorrido, polo que o Club decidiu repetir a experiencia. As rutas, que transcorren entre o sábado 24 de marzo e o 28 de abril son as mesmas de 2011 en parte porque se persegue manter percorridos en zonas "fáciles e accesibles", que non teñan grandes desniveis nin moito tráfico para que sexa máis sinxelo e axeitado para toda a familia. Cada unha das rutas conta con paradas programadas en monumentos ou espazos de relevancia do municipio, como cruceiros, castros, igrexas ou espazos naturais. A Ruta 1, de 19 quilómetros e de baixa dificultade, transcorre por Sísamo, Goiáns, Cances e Oza e celébrase o sábado 24 de abril a partires das 16.00 horas.
CARBALLO CONTARÁ EN ABRIL CON 8 NOVOS SEMÁFOROS INTELIXENTES
Mércores 21 de marzo do 2012
O Concello de Carballo e a Xefatura Provincial de Tráfico veñen de asinar de man do Alcalde, Evencio Ferrero e do Xefe Provincial, Pedro Pastor, un convenio de colaboración polo que a administración local poderá tramitar o cambio de domicilio no Rexistro de Condutores da DXT (Dirección Xeral de Tráfico) así como realizar duplicados do permiso de circulación de vehículos polo cambio de domicilio do seu titular. Os dous trámites son gratuítos para os veciños e veciñas e o Concello adquire a obriga de enviar, alomenos quincenalmente, as solicitudes presentadas por correo ordinario ou remitilas telematicamente á Xefatura Provincial. A adhesión ao acordo supón que o Concello oferta un novo servizo para os cidadáns e a administración local asegúrase, así mesmo, de que os veciños e veciñas empadronados do Concello manteñen o mesmo domicilio no permiso de circulación, polo que tributarán o Imposto de vehículos de tracción mecánica no municipio carballés. Outro dos obxectivos do convenio é que Tráfico manteña unha maior actualizacion da súa base de datos. Hai que aclarar que a notificación de cambio de domicilio no Rexistro de Condutores da DXT é obrigatoria, aínda que o Concello só notificará esta modificación a Tráfico se conta coa solicitude previa do condutor/a afectado.
OS DOMINGOS ENTRE O 25 DE MARZO E O 10 DE XUÑO
Mércores 21 de marzo do 2012
A Asociación Ambiental Senda Nova, coa colaboración do Concello de Carballo, organiza unha nova edición, por terceiro ano consecutivo, de "Primavera en ruta", unha iniciativa que propón un total de oito percorridos por seis concellos da comarca e limítrofes co obxectivo de fomentar a práctica deportiva e o espírito de convivencia no marco da contorna natural. Segundo explica o presidente da entidade, Xose M. Menéndez, os roteiros tamén pretenden "o coñecemento e posta en valor do patrimonio ambiental, artístico e histórico". Os percorridos están dirixidos a todas as idades e son de xornada completa, aínda que a duración varía lixeiramente dependendo do volume de xente, das características de deseño da ruta, etc. Senda Nova quere facilitar as inscricións, polo que os interesados/as en participar poden anotarse: na base de Protección Civil de Carballo (edificio do antigo ambulatorio) de luns a venres de 9.30 a 13.30 horas; no Pazo da Cultura, mércores, xoves e venres de 18.00 a 20.00 horas; e no Edificio de Servizos Múltiples de Coristanco os venres de 18.00 a 20.00 horas. O prezo, que inclúe un bocadillo para comer no medio da ruta, é de 6 euros para os maiores de idade e de 3 euros para menores e socios. Máis información na web de Senda Nova.
ARREDOR DE 200 PERSOAS ACUDIRON Á CITA NO POLÍGONO DE BÉRTOA
Martes 20 de marzo do 2012
A ampliación do Parque Empresarial de Bértoa acolleu a pasada fin de semana un acto organizado pola Asociación Ambiental Senda Nova en colaboración co Concello de Carballo para conmemorar o Día da Árbore e Día Forestal Mundial que se celebra o mércores 21 de marzo. A pesares do vento, das baixas temperaturas e da saraiba, arredor de 200 persoas acudiron para apadriñar máis de 120 árbores, fundamentalmente carballos, pero tamén acivros e salgueiros. Cada unha destas árbores recibirá a partir de agora un seguimento por parte de cada padriño ou madriña que, despois de bautizar o seu exemplar, serán o encargados de darlle os coidados necesarios para que medre. Especialmente elevada foi a asistencia de cativos e cativas, que acadaron o seu diploma de apadriñamento e unha ficha colocada a carón de cara árbore como certificación do compromiso de coidala para sempre. O lema da cita foi "100 árbores, 100 persoas, 100.000 vidas" e a Asociación Ambiental Senda Nova quere agradecer, ademais da colaboración do Concello de Carballo, a de Protección Civil, Cebeygar, Riego Betanzos e Protección Verde. En breves a páxina web de Senda Nova incluirá un plano do lugar de prantación cos números e nome de cada árbore e de cada padriño e madriña.
EN VIRTUDE DUN CONVENIO COA UNIVERSIDADE DA CORUÑA
Luns 19 de marzo do 2012
O Reitor da Universidade da Coruña (UDC), Xosé Luís Armesto, vén de visitar por primeira vez o Concello carballés dende o seu nomeamento con motivo dun Convenio de colaboración educativa coa UDC para a realización de prácticas dirixidas aos estudantes de terceiro curso da asignatura Proxectos e Urbanismo da Escola Técnica Superior de Arquitectura (ETSA). En virtude deste acordo, os arredor de 250 alumnos e alumnas de Proxectos III realizarán traballos de carácter práctico en emprazamentos urbanos de Carballo para poder obter un coñecemento máis amplo das realidades construtivas e arquitectónicas dos concellos e das técnicas e metodoloxías que se desenvolven nas administracións públicas, o que lles permitirá unha mellor inserción no mercado laboral. En concreto, e segundo avanzou Felipe Peña, profesor da ETSA que acompañou ao Reitor xunto con outro docente, Cristóbal Crespo, as propostas estarán listas despois de Semana Santa e concrétanse en dous proxectos que xiran arredor do paso do río Anllóns polo casco urbano, cunha actuación para crear un pequeno parque; e nun terceiro centrado na contorna do barrio da Milagrosa. Así mesmo, traballarase sobre o edificio da Ludoteca Municipal e sobre a creación dunha pequena vivenda unifamiliar na zona costeira.
AS SANCIÓNS PODEN CHEGAR AOS 300 EUROS
Sábado 17 de marzo do 2012
O Concello de Carballo, a través da Concellaría de Servizos que dirixe Luís Lamas, ten detectado nos últimos días varias infraccións polo reparto incorrecto de publicidade nas rúas da capital municipal, xa que esta actividade está regulada pola Ordenanza de Limpeza. Por ese motivo, quere lembrar aos veciños e veciñas a normativa vixente que establece que queda prohibido repartir ou lanzar carteis, folletos ou follas soltas, ensuciando os espazos públicos, así como deixar papeis de propaganda na vía pública ou nas fachadas, ademais de no mobiliario urbano, a non ser nos lugares destinados explicitamente para tal fin, ou colocar publicidade nos parabrisas dos vehículos estacionados ou detidos na vía pública. Precisamente nos últimos días tense obervado a presenza de publicidade nos turismos, así como folletos tirados fóra dos espazos destinados a tal fin nos portais da capital municipal. Tanto os servizos de inspección do Concello como a Policía Local ou a veciñanza poden denunciar este tipo de infraccións, que acarrean unha multa de 300 euros, xa que estes feitos están tipificados como "graves" na Ordenanza municipal.
A SUBVENCIÓN SUPERA OS 130.000 EUROS
Venres 16 de marzo do 2012
O Centro Social San Xoán Bautista de Carballo vén de mellorar e rehabilitar as súas instalacións para crear un centro de día e un albergue para transeúntes tendo como obxectivo favorecer a inclusión social. O Centro Social forma parte dende o ano 2008 da Asociación de Desenvolvemento da Comarca de Bergantiños do Agader (Axencia Galega de Desenvolvemento Rural) e no ano 2010 presentouse unha solicitude á Consellería de Traballo e Benestar para a creación dun centro de día e un albergue. En setembro dese ano apróbase o proxecto básico para a elaboración das obras, que conta un orzamento de 215.221,57 euros e que pretende favorecer o benestar e a inclusión de varios grupos de poboación da comarca. Finalmente, a actuación inclúese, a través do Agader, no Programa Leader 2007-2013 e concédese unha subvención de 133.809,79 euros que supón o 62 por cento do total do investimento. Durante o ano 2011 executouse a reforma dos locais e ao longo de 2012 está previsto rematar a construción do albergue para transeúntes que contará con seis prazas dispoñibles e que ten un custo de 95.505,45 euros.
OS 8.400 EUROS QUE RESTAN PAGARANSE A PRÓXIMA SEMANA
Xoves 15 de marzo do 2012
O Concello de Carballo ten pendentes de pago do ano 2011 un total de 17 facturas por un importe de 8.492,99 euros, unha cantidade que será abonada a próxima semana e antes da data límite do 30 de marzo estipulada polo Goberno, segundo explican o Alcalde, Evencio Ferrero, e a Concelleira de Facenda, Belén Lendoiro. Unha vez cumprido este trámite, e despois de terse aprobado o 8 de marzo nunha sesion extraordinaria un recoñecemento extraxudicial de crédito por un importe de 311.637,36 euros polo resto das facturas non abonadas a 31 de decembro de 2011, na actualidade o Concello "non ten débedas nin con proveedores nin con terceiros", en verbas de Ferrero, polo que non necesitará ningún plan de axuste para cumprir co Real Decreto de financiamento de pago a proveedores estipulado polo Goberno central para as administracións públicas. O Alcalde explica que os servizos económicos teñen realizado "un cribado exhaustivo de todo o que estaba pendente" para poder cumprir cos prazos establecidos e aclara que estes resultados, "ao igual que os da liquidación do orzamento de 2011", foron ofrecidos polos servizos económicos municipais "sen ningún tipo de inxerencia" e en base ao traballo realizado polos técnicos.
CONTINÚA ABERTO O PRAZO DE MATRÍCULA PARA O CURSO 2012-2013
Mércores 14 de marzo do 2012
A nova Escola Infantil Municipal "A Braña", situada na rúa Xoana de Vega na contorna da estrada de Razo da capital municipal entra en funcionamento a próxima semana, segundo informan responsables da xestión do novo servizo. Así, hoxe comezaron as entrevistas persoais coas nais e pais dos cativos, e prolongaranse até o venres 16; o luns 19 hai unha nova xuntanza cos proxenitores; o martes 20 realízase unha xornada de portas abertas para que os usuarios e usuarias poidan coñecer as instalacións; e, finalmente, o mércores 21 principia o período de adaptación dos nenos e nenas que se irán incorporando ao servizo de xeito progresivo. Hai que lembrar que a nova Escola Infantil Municipal ten capacidade para 102 prazas, aínda que para a primeira quenda do curso 2011-2012 foron admitidos 87 nenos e nenas, cunha listaxe de agarda de 61. Así mesmo, hai que informar de que está aberto até o 31 de marzo o período para solicitar praza para o curso 2012-2013 nas dúas Escolas Infantís do Concello de Carballo: As Landras e A Braña. As listaxes provisionais de admitidos/as publicaranse o día 11 de maio e as definitivas, o día 11 de xuño. O prazo para formalizar a matrícula será dende o 12 até o 30 de xuño.
DOMINGO 18 DE MARZO ÁS 11.30 HORAS
Martes 13 de marzo do 2012
O Concello de Carballo colabora coa Asociación Ambiental Senda Nova na conmemoración do Día da Árbore e Día Forestal Mundial que se celebra o mércores 21 de marzo. Así, e co obxectivo de sensibilizar á poboación, especialmente á máis nova, organízase unha plantación conxunta e apadriñamento de 100 árbores autóctonas, acordes co noso clima e coa nosa xeografía. Os interesados e interesadas en colaborar só teñen que achegarse á ampliación do polígono de Bértoa o domingo 18 de Marzo a partires das 11.30 horas e apadriñarán unha árbore por persoa. Ademais, esta actuación requerirá un posterior seguimento da planta autóctona apadriñada, regándoa e véndoa medrar no futuro. O lema da cita -que ademais de coa colaboración do Concello conta coa axuda de Protección Civil de Carballo, Riego Betanzos, Cebeygar e Protección Verde- é "100 árbores, 100 persoas, 100.000 vidas". Tanto a Asociación Ambiental Senda nova como o Concello de Carballo queren animar a todos os veciños e veciñas a que se despracen ao parque empresarial para contribuír deste xeito a protexer as superficies arboradas e a vexetación autóctona do municipio. Os interesados e interesadas poden descargar o cartel anunciador da iniciativa nun documento en pdf nesta mesma nova.
.jpg)