ACTUARÁ COMO CAMPUS ONLINE E PUNTO DE ENCONTRO FORMATIVO
Xoves 17 de febreiro do 2011
O Fórum Carballo xa conta cunha páxina web que actuará como unha versión virtual do proxecto, "unha ferramenta para coñecer o proxecto físico do Fórum e que sirva tamén para a participación veciñal", segundo explica o Tenente de Alcalde, José Antonio Viña. Así, www.forumcarballo.org "é unha nova ferramenta para que cidadáns e empresariado rendibilicen o esforzo que está facendo o Concello cos fondos europeos cos que se constrúe o Fórum", en verbas do Alcalde, Evencio Ferrero. O Concelleiro de Promoción Económica, Xosé Manuel García Guillín, subliña que o obxectivo é "facilitar unha formación de calidade para acadar un emprego de calidade" a través da "dinamización das empresas e do emprego, da teleformación e da coordinación das asociacións, institucións e organismos do Concello coa sociedade". Para iso, a nova plataforma conta con espazos interactivos, como Fórum 2.0, no que a cidadanía poderá solucionar as súas dúbidas en contacto directo con expertos; Fórum TV, con vídeos relacionados coas actividades que desenvolva o Fórum; ou incluso un campus online no que desenvolver cursos e actividades formativas en estreito contacto co profesorado e con foros para intercambiar opinións e información. Todo para exemplificar, en verbas da Concelleira de Formación, María Manso, que "en Carballo as novas tecnoloxías non son o futuro, en Carballo son o presente".
O NIVEL DE AUTOFINANCIAMENTO PREVISTO É DO 55 POR CENTO
Mércores 16 de febreiro do 2011
O Padroado Deportivo Municipal vén de realizar esta semana unha xuntanza do seu consello reitor na que se aprobaron os orzamentos da entidade para o ano 2011 e se presentou a memoria de 2010. Segundo explica o Concelleiro de Deporte, Marcos Trigo, as contas superan o millón de euros -con 1.022.246 €- sendo "o orzamento máis alto da historia do Padroado". Ademais, este ano redúcese a contía da achega municipal a 450.00 euros, por debaixo das cifras do ano 2003, sendo o nivel de autofinanciamento previsto para este exercicio do 55 por cento. Outro dos obxectivos previstos para 2011 é o incremento das liñas de subvencións nun 14 por cento, cunha suba de 7.000 euros para as axudas para o deporte escolar e de 1.000 euros para as axudas a desprazamentos, que chegarían a unha contía total de 25.000 euros. No que respecta á liquidación do orzamento de 2010, hai que subliñar que hai un resultado de 56.371,94 euros e un remanente de tesourería positivo de 106.034,62 euros. Estas contías permitirán incrementar "a oferta para os usuarios en número e calidade", segundo explica Marcos Trigo, ademais de destinarse á xa mencionada suba das axudas e á aplicación da RPT (Relación de Postos de Traballo).
AS SANCIÓNS PODEN CHEGAR AOS 300 EUROS PARA INFRACCIÓNS LEVES
Martes 15 de febreiro do 2011
O Concello de Carballo solicita aos veciños e veciñas que cumpran coa normativa da Ordenanza municipal que regula a protección e tenencia de animais e non permitan que os seus cans anden ceibes polos espazos públicos. Así, segundo a norma, "os animais deberán circular suxeitos con correa ou cadea" e as infraccións poden supoñer sancións económicas que van dende os 150 aos 300 euros. As faltas máis comúns son as leves, que sancionan a non recollida dos excrementos da vía pública ou o feito de levar un can solto, ou un perigoso sen bozal. Hai que lembrar que no caso de cans potencialmente perigosos para a presenza e circulación en espazos públicos é obrigatoria a utilización de correa ou cadea de menos de 2 metros de lonxitude, así como un bozal homologado e axeitado para a súa raza, e en ningún caso poderán ser conducidos por un menor de 16 anos. Por outra banda, a normativa tamén estipula que está prohibido dar de comer aos animais na vía pública, incluíndo gatos ou pombas. Dende o Concello informan de que a Policía Local vixilará especialmente o cumprimento da ordenanza e sancionará as infraccións.
PRÓRROGA DE 30 DÍAS PARA ULTIMAR A REMODELACIÓN DO MERCADO
Luns 14 de febreiro do 2011
A Xunta de Goberno Local vén de aprobar, fóra da orde do día, que o proxecto "Carballo en movemento: Fomento da mobilidade no proceso de formación da xuventude local" concorra á convocatoria do programa europeo Lifelong Learning: Leonardo da Vinci - Mobilidade PLM. A iniciativa "Carballo en movemento", promovida polo Concello, está deseñada para ofrecer prácticas profesionais no estranxeiro de 12 semanas de duración a mozos e mozas de entre 18 e 35 anos, con titulación en FP ou universitaria, dispoñibles no mercado laboral carballés, con priorización daqueles que están en situación de desemprego e sen experiencia previa, así como ás mulleres e a persoas pertencentes a colectivos en risco de exclusión social, por ser os colectivos con maior problema de empregabilidade. O obxectivo desta proposta é o de mellorar os perfís e a cualificación profesional dos beneficiarios, capacitándoos para facer fronte aos novos retos laborais e ás necesidades dun mercado de traballo cada vez máis esixente no que a formación e experiencia se refire. Así mesmo, de chegar a poñerse en marcha no marco do programa europeo, a iniciativa beneficiaría ao tecido empresarial local, que disporía tralo regreso dos participantes, de mozos e mozas preparados e formados nun entorno internacional e intercultural.
O ORZAMENTO DO PEIM ROLDA OS 90.000 EUROS
Sábado 12 de febreiro do 2011
O Concello de Carballo está executando nestes momentos varios traballos de mellora de pistas e camiños no medio rural do municipio, segundo informa o Concelleiro de Obras e Servizos, Luís Lamas. En concreto, está en marcha, coa colaboración da Consellería de Medio Rural e o Ministerio de Medio Ambiente y Medio Rural y Marino, a mellora da pista forestal de Guitoi á Contía, na parroquia de Sofán; e está a piques de comezar, tan pronto as condicións meteorolóxicas o permitan, a mellora do camiño de Castrillón a Agramaior (pista das Fragas), na parroquia de Lema. A empresa encargada da realización destes traballos é Construcciones Alejandro Martínez e Hijos SL e o prazo de execución establecido é de tres meses dende a sinatura da acta de replantexamento. Estes proxectos están incluídos no PEIM 2009/2010 (Programa Estratéxico de Infraestruturas do Medio Rural) para o Concello de Carballo, que ten un importe total de 89.552,39 euros e que tamén supuxo a execución da mellora do camiño de Picoto a Ponte de Quintela na parroquia de Artes (na imaxe) e a mellora do camiño de O Aseñado a Fonte do Cobo na parroquia de Berdillo, cun total de catro actuacións no PEIM. Estes camiños presentaban un firme en condicións deficientes para o tránsito debido ao deterioro da capa de rodadura, co conseguinte prexuicio para os usuarios e usuarias. O obxectivo é incrementar a calidade de vida da poboación que reside nestas zonas.
ATENDÉRONSE 323 EMERXENCIAS E HOUBO 151 DELICTOS
Venres 11 de febreiro do 2011
Os índices de seguridade cidadá do ano 2010 indican que a evolución continúa a ser favorable e que, aínda que "todo se pode mellorar", segundo subliña o Alcalde, Evencio Ferrero, e "hai que seguir traballando", os datos de delincuencia manteñen unha tendencia estable e incluso á baixa nalgún casos. O mesmo ocorre no referente á seguridade viaria e accidentes de tráfico, que segundo tamén explica o propio Alcalde presentan "cifras moi razoables" tendo en conta a poboación e o nivel de circulación de Carballo. O Concelleiro de Seguridade e Tráfico, Benedito Viña, realiza un balance positivo, no só polas cifras senón especialmente porque a grande maioría dos roubos e furtos denunciados foron esclarecidos e remataron coa posta a disposición xudicial dos culpables. Así se plasmou na presentación do balance de seguridade do pasado ano, no que se achegaron datos como que o Grupo Municipal de Intervención Rápida atendeu 323 emerxencias e realizou 2.459 intervencións en 2010, e que, segundo o informe da Policía Local, rexistráronse 151 incidencias relacionadas con delictos, furtos e danos e 193 accidentes de tráfico, ningún con vítimas mortais. No que respecta ao servizo de Salvamento e Socorrismo de Carballo, nas 8 zonas de baño habilitadas en Razo, Pedra do Sal e As Saíñas, os tres areais con Bandeira Azul, rexistráronse sete salvamentos na tempada de praias, así como 583 atencións nos cinco Botiquíns habilitados.
VENRES 11 DE FEBREIRO ÁS 21.00 HORAS
Mércores 9 de febreiro do 2011
Esta fin de semana o programa dos Venres Culturais céntranse exclusivamente no teatro, neste caso da man da compañía compostelana EME2, Emoción&Arte. Presentan o traballo "Sexo? Por que non?", no que a actriz Mercedes Castro cobra todo o protagonismo, subindo soa ao escenario para interpretar os preto de vinte personaxes que desenvolven esta historia, baseada nunha obra de enorme éxito en Italia, escrita por Darío Fo, Franca Rame e Jacopo Fo. Por que case nunca falamos de sexo? Por que, se o facemos, sempre o tomamos desde os complexos e os estereotipos? Fuxindo do bombardeo pornográfico, do tópico e do chiste fácil, "Sexo? Por que non?" é unha comedia trepidante e reflexiva na que desde Adán e Eva ata os nosos días se mostran situacións cotiás arredor do encontro carnal. Unha cita humorística para rachar os tópicos e os tabús. A cita é o venres 11 de febreiro a partires das 21.00 horas no auditorio do Pazo da Cultura. O espectáculo está dirixido por Álvaro Lavín, fundador de Teatro Meridional, e a adaptación está realizada por Sandra Romarís, Emilio Cao, Xocas López e Julio Salvatierra. O espectáculo dura 60 minutos e o prezo da entrada de 3,5 euros, 2,5 con desconto.
UNHA VEZ FEITAS AS BEIRARRÚAS, ACONDICIONARASE O FIRME DA VÍA
Martes 8 de febreiro do 2011
O Concello informa de que veñen de comezar esta semana os traballos para mellorar a seguridade vial e crear beirarrúas en Taboada, parroquia de Entrecruces, unha actuación incluída no Plan Provincial de Cooperación ás Obras e Servizos de competencia municipal e da rede viaria local do ano 2010 (POS 2010). A empresa Construcciones Alejandro Martínez e Hijos é a encargada de levar a cabo este proxecto, que ten un prazo de execución de tres meses. Porén, o Concelleiro de Obras, Luís Lamas, explica que está previsto que os traballos poidan estar rematados antes. O orzamento de adxudicación é de 36.620,44 euros, cunha baixa de preto de catro mil euros sobre o orzamento de licitación, de 40.376,57 euros. Estes traballos dan resposta a unha demanda dos veciños e veciñas de Entecruces, que solicitan que se reduza a perigosidade na marxe dereita da ponte, onde se teñen rexistrado accidentes de circulación debido á curva que se forma. Así mesmo, o Concello informa de que xa hai un acordo coa Deputación da Coruña para que, unha vez creadas as beirarrúas e rematadas as obras, se proceda ao acondicionamento do firme da vía. Por último, o Concello pide a colaboración dos veciños e veciñas e dos usuarios e usuarias da estrada mentres duren os traballos e pide desculpas, así mesmo, polas posibles molestias e retencións ocasionadas.
A CITA É O XOVES 10 DE FEBREIRO
Martes 8 de febreiro do 2011
Os días 8, 9, 10 e 11 de febreiro un grupo de xornalistas especializados en viaxes e gastronomía de distintos medios de comunicación asistirán ao FamPress organizado por APTCM en colaboración coa Deputación da Coruña e a Revista Hostalería Galega e Turismo. Os FamPres son xuntanzas nas que se ofrece a un grupo de xornalistas unha combinación de actividades de lecer e profesionais para que coñezan de primeira man as actividades ou produtos dunha empresa, un novo destino turístico ou unha nova infraestrutura. Neste caso, os invitados e invitadas terán a posibilidade de coñecer algúns dos principais recursos turísticos do noso territorio como o Castro de Borneiro, o Forno do Forte, o Castelo de Vimianzo, o Santuario da Virxe da Barca ou o Faro de Fisterra. Pero ademais, tamén poderán comprobar o altísimo nivel da nosa gastronomía e calidade dos establecementos hostaleiros. No caso de Carballo, o día da visita é o xoves 10 de febreiro, xornada na que poderán desfrutar da gastronomía local ceando nun dos principais establecementos hostaleiros da capital municipal. Haberá xornalistas chegados dende Madrid, País Vasco, Canarias ou Portugal, que poderán observar de primeira man o mellor da vila e das súas propostas culinarias.
REXÍSTRASE UN DESCENSO DUN 33 POR CENTO RESPECTO DE 2010
Luns 7 de febreiro do 2011
O ano 2011 ten comezado cun total de 124 demandas de arranxos e melloras de veciños e veciñas que teñen sido atendidas pola Brigada de Obras, que xestiona este tipo de avisos. Esta cifra, rexistrada en xaneiro, supón un descenso dun 33 por cento respecto do mesmo mes de 2010, en que se rexistraron 186 peticións. En 2009 tíñanse rexistrado 141 e en 2008, 128, polo que se rompe neste principio de ano a tendencia á suba dos últimos tres períodos. Como vén sendo habitual, xa que o Concello de Carballo conta en todo o territorio municipal con más de 8.000 puntos de luz, a maioría dos avisos refírense ao alumeado público, con 91 peticións. Os veciños e veciñas poden denunciar as deficiencias ou demandar os arranxos que consideren oportunos en materias como o programa Carballo Limpo -recollida selectiva de lixo, punto limpo, recollida de cartón, etc.-, a limpeza de espazos públicos, a reparación de mobiliario urbano, o mantemento de edificios e instalacións deportivas, problemas cos servizos de auga, luz, recollida de lixo ou saneamentos ou a reparación e substitución de sinais de tráfico e indicadores ou arranxo de baches. Calquera cidadán pode formalizar as súas peticións a través do número de teléfono 981 704 700 ou ben no correo electrónico <infocarballo@carballo.org>.
A EXPOSICIÓN: NO PAZO DA CULTURA ATÉ O 28 DE FEBREIRO
Venres 4 de febreiro do 2011
Carballo vén de acoller a entrega de premios e a inauguración da exposición da IX Bienal de Pintura do Eixo Atlántico, un certame que premia a catro obras dunha selección de 30 realizadas por artistas galegos e do Norte de Portugal que forman unha exposición itinerante. Carballo é a primeira das vilas do Eixo que acolle esta mostra até o 28 de febreiro, pero percorrerá todas as cidades que forman parte da institución entre 2011 e 2012, pasando por lugares como Porto, Braga, Santiago de Compostela, Ourense ou Barcelos. O Pazo da Cultura acolleu a creadores e autoridades de Galicia e do Norte de Portugal nun acto no que o Secretario Xeral do Eixo Atlántico, Xoán Vázquez Mao, subliñou a necesidade de traballar "todos xuntos, man con man", promovendo "a cultura e os elementos novidosos e emerxentes" para que "a nosa Eurorrexión sobreviva e teña ferramentas para saír da crise". O Alcalde de Carballo, Evencio Ferrero, recolleu o testemuño de Vázquez Mao, subliñando os puntos en común "históricos, culturais, económicos, sociais e lingüísticos" entre Galicia e o Norte de Portugal que deben ser compartidos para "darlle pulo" a todas as cidades que conforman o Eixo Atlántico.
VENRES 4 ÁS 21.00 HORAS E DOMINGO 6 ÁS 18.00 HORAS
Xoves 3 de febreiro do 2011
O mes de febreiro estréase con novas actividades dos Venres Culturais, neste caso con música chegada dende as Illas Británicas e con orixinais monicreques galegos. O venres 4 de febreiro ás 21.00 horas é a quenda das notas do irlandés Duncan Maitland, que presenta o seu último disco "Lullabies for the 21st century" ("Cantos de berce para o século XXI"). Duncan Maitland é un músico irlandés de extensa traxectoria que liderou grupos como The Flood ou Picture House nos anos oitenta e noventa. Nestes momentos está presentando en España o seu primeiro traballo en solitario, "Lullabies For the 21st Century", cheo de sons psicodélicos que lembran tanto aos Beatles desa época, como a XTC, banda coa que ten colaborado. O domingo 6 de febreiro ás 18.00 horas tócalle á compañía O retrete de Dorian Gray que presentará "Rúa Aire" no ciclo En Familia. Este espectáculo é a primeira peza do mundo feita con marionetas de globos. Un puñado de globos emperrados en vivir que se ven envoltos en aventuras intrépidas con malvadas tesoiras de ideas fixas, bombíns con patas e o vento que chama á porta. Un espectáculo para todos os públicos. As dúas citas son no auditorio do Pazo da Cultura. O prezo para Duncan Maitland é de 3 €, 2 € con desconto; e para os lugueses "O retrato de Dorian Gray" é de 2,5 €, 2€ con desconto.
.jpg)