DE 18.00 A 21.00 HORAS NA BAIXOCUBERTA DO PAZO DA CULTURA
Venres 14 de xaneiro do 2011
A sala da baixocuberta do terceiro andar do Pazo da Cultura acolle até o domingo 23 de xaneiro a exposición "Irmáns Mayo. A Guerra Civil española", organizada pola Deputación provincial coa colaboración do Concello de Carballo e do Ministerio de Cultura. Trátase de preto de cen fotografías, das que en Carballo pode observarse unha escolma de 50, captadas durante a Guerra Civil (1936-1939) e coas súas cámaras Leika, polos cinco representante do colectivo Irmáns Mayo, que durante máis de sete décadas permaneceron dos arquivos da Biblioteca Nacional e que saen agora á luz por vez primeira. Son imaxes en branco e negro dos combatentes da 43 División, dos presos republicanos no cárcere de Carabanchel, das trincheiras do Ebro, da fronte de Guadalaxara e de Madrid, así como fotografías que reflicten a realidade social dun país en guerra. O comisario da exposición, o fotógrafo Xurxo Lobato, asegura que as fotografías constitúen "imaxes da dignidade". A mostra pode visitarse en horario de 18.00 a 21.00 horas e conta cun catálogo que pode ser consultado polos visitantes no que se relatan máis detalles sobre a exposición.
INSCRICIÓNS ANTES DAS 20.00 HORAS DO 18 DE XANEIRO
Mércores 5 de xaneiro do 2011
O Concello de Carballo, a través da Concellaría de Promoción Económica que dirixe Xosé Manuel García Guillín, convoca aos locais hostaleiros a participar na II Ruta do Pincho de Inverno, co obxecto de promocionar os establecementos do núcleo urbano, así como os produtos típicos da zona. Poderán participar todos aqueles establecementos, restaurantes e bares situados na capital municipal carballesa. A ruta terá lugar os sábados e domingos, entre os días 29 de xaneiro e 3 de marzo de 2011, en horario de xantar e cea. Os establecementos interesados deberán presentar a súa solicitude na Oficina de Información Turística situada no Museo de Bergantiños antes das 20.00 horas do día 18 de xaneiro de 2011. Os establecementos servirán as tapas de xeito gratuíto con cada consumición e nesta ocasión engádese unha novidade, que é que as fins de semana de marzo os pinchos estarán dedicados á temática do Antroido. Así mesmo, cada establecemento colaborador presentará un pincho distinto cada día de celebración do evento, que deberá anunciarse no local. Os interesados e interesadas en consultar as bases ou en descargar a solicitude, poden facelo en pdf nesta mesma nova.
MÁIS DE 1500 PRODUCÍRONSE NO ANO 2010
Mércores 5 de xaneiro do 2011
O Concello de Carballo ten recibido e atendido nos últimos tres anos, entre 2008 e 2010, un total de 4.241 avisos acerca de demandas cidadáns dos veciños e veciñas para realizar servizos de mantemento e arranxos en todo o territorio municipal. Desta cantidade, un total de 1.545 téñense rexistrado ao longo de 2010, o que supón un incremento dun 8,8 por cento respecto de 2009 -con 137 máis-, cando se rexistraron 1.408. De feito, nos últimos anos as peticións non deixaron de medrar, con 1.303 en 2008, 1.408 en 2009 e 1.545 o ano pasado. A Brigada de Obras é a encargada de xestionar as peticións e solucionar as posibles avarías, que na súa maioría, nun 52,8 por cento nos últimos tres anos, refírense a reparacións e a cambio de focos no alumeado público. Ademais, os veciños e veciñas poden denunciar as deficiencias ou demandar os arranxos que consideren oportunos en materias como o programa Carballo Limpo -recollida selectiva de lixo, punto limpo, recollida de carton, etc.-, a limpeza de espazos públicos, a reparación de mobiliario urbano, o mantemento de edificios e instalacións deportivas, problemas cos servizos de auga, luz, recollida de lixo ou saneamentos ou a reparación e substitución de sinais de tráfico e indicadores ou arranxo de baches. Calquera cidadán pode formalizar as súas peticións a través do número de teléfono 981 704 700 ou ben no correo electrónico <infocarballo@carballo.org>.
MÉRCORES 5 DE XANEIRO A PARTIRES DAS 17.30 HORAS
Mércores 5 de xaneiro do 2011
O Concello de Carballo e a Asociación Xuvenil Fogar da Xuventude organizan a tradicional Cabalgata de Reis do Concello de Carballo, que este ano conta tamén coa colaboración do Centro Comercial Bergantiños-Haley, co reparto de caramelos e agasallos entre os asistentes. O itinerario inclúe a chegada dos Reis Magos ás 17.15 horas ao CCB-Haley, de onde está previsto que as súas Maxestades saian ás 17.30 horas. Despois dun percorrido polas principais rúas do centro da vila, os reis Magos dirixiranse á carpa situada na Praza do Concello, onde recibirán aos cativos e cativas que queiran falar con eles ou entregarlle persoalmente as súas cartas. A chegada á Praza do Concello está prevista para as 19.30 ou 20.00 horas, aproximadamente. Tampouco hai que esquecer que os Reis Magos teñen previsto visitar as parroquias carballesas, xa que o mércores 5 están en Berdillo, Baldaio, Sísamo, Vilela, Oza, Entrecruces e Bértoa, mentres que o xoves 6 visitan Sofán, Razo e Cances. Estas cabalgatas están organizadas polas asociacións de cada parroquia e seguen os itinerarios de anos anteriores.
OS TÉCNICOS ESTUDAN O INFORME EMITIDO POR AVALIACIÓN AMBIENTAL
Xoves 30 de decembro do 2010
O equipo redactor do Plan Xeral de Ordenación Municipal (PXOM) de Carballo espera enviar o documento urbanístico ao completo para que a Xunta emita o informe previo e avanzar de cara á súa aprobación a finais de febreiro ou principios de marzo de 2011. Así o explicaron o Tenente de Alcalde e Concelleiro de Urbanismo, José Antonio Viña, e o Alcalde, Evencio Ferrero, nunha rolda de prensa na que tamén subliñaron que, nestes momentos, a Oficina Técnica está estudando en profundidade o documento de referencia emitido o pasado 14 de decembro pola Secretaría Xeral de Calidade e Avaliación Ambiental. Este informe estipula algunhas directrices e recomendacións sobre o documento de inicio do PXOM -un equivalente ao anteproxecto do planeamento- enviado polo Concello o pasado 12 de outubro e que se realizou respectando as directrices da Comisión de Urbanismo encargada do proceso de revisión do Plan e da que forman parte representantes de todos os grupos políticos da corporación. Unha vez os técnicos analicen e avalíen o documento de referencia da Secretaría Xeral, será convocada a Comisión de Urbanismo para que grupos e técnicos sigan avanzando nos trámites da revisión do PXOM.
PODERÁN PARTICIPAR 25 ESTABLECEMENTOS DA VILA
Mércores 29 de decembro do 2010
O Concello de Carballo pon en marcha a partires de xaneiro de 2011 un Plan de Mellora da Imaxe Comercial e Escaparatismo, incluído no Plan de Reactivación e Dinamización Empresarial que se está a desenvolver dentro do proxecto Fórum Carballo. A iniciativa foi presentada o martes 28 de decembro ás 21.00 horas no salón de plenos da Casa do Concello ante arredor de 20 comerciantes da vila. Consiste en que os establecementos de Carballo que sexan admitidos na proposta poderán contar cun informe especializado realizado por unha consultora, I2, no que cada un dos locais participantes será obxecto dun estudo individual a partir do que se elaborará un dossier no que se analizarán a faciana, o escaparate e o interior do local, así como a colocación do produto co obxectivo de mellorar a imaxe comercial do establecemento. Os interesados/as en participar poderán recoller os impresos de solicitude a partires do día 8 e até o 26 de xaneiro, tanto na Casa do Concello como noutros puntos comerciais estratéxicos e calquera establecemento carballés pode tomar parte na iniciativa. En total, serán admitidos 25 comercios, polo que se seguirá un proceso de selección no que primarán aspectos como a antigüidade do negocio e do titular ou a contratación de persoas con minusvalías. Para consultar as bases, premer aquí.
ENTRE O LUNS 27 E O XOVES 30 DE DECEMBRO
Luns 27 de decembro do 2010
Pasado xa o día de Nadal intensifícanse as actividades organizadas pola Concellaría de Cultura para os máis cativos e cativas dentro do Nadal Cultural 2010. Así, entre o luns 27 e o xoves 30 de decembro chega o programa Nadal Pequespectacular, unha das citas máis esperadas destas datas, neste caso con catro espectáculos centrados nos monicreques, no teatro, na música e na maxia, que pecha o ciclo cun festival no que visitan Carballo algúns dos mellores magos de Galicia. O Nadal Pequespectacular inclué actuacións da Agadic (Axencia Galega das Industrias Culturais) que principian o luns 27 con Caramuxo Teatro e o famoso espectáculo 'Os Bolechas'; continúan o martes 28 con Teatro do Morcego que presenta os seus 'Saltimbanquis'; seguen o mércores 29 os vascos Teatro Paraíso Sal, cin 'El flautista mágico'; e pecha o ciclo o xoves 30 a gala 'Nadal Máxico 2010', un festival no que ofrecen os seus trucos o Mago Antón, o Mago Richard, o Mago Romarís, o Mago Pablo e Kiko Pastur. Todas as funcións son no auditorio do Pazo da Cultura ás 18.00 horas e os prezos oscilan entre os 2,5 e os 3,5 euros (con descontos para menores de 12 anos e maiores de 65).
O PRAZO DE PRESENTACIÓN REMATA O 7 DE FEBREIRO
Martes 21 de decembro do 2010
O Concello de Carballo, a través da Concellaría de Cultura que dirixe Belén Lendoiro, convoca a XIII edición do Certame Fotográfico 'Xosé Manuel Eirís'. O Concello, atendendo á proposta expresada pola Comisión Organizadora da Homenaxe a Xosé Manuel Eirís, integrada por representantes de trinta asociacións culturais de Carballo, acordou en sesión plenaria do 5 de maio de 1997 a creación deste Certame Fotográfico que tería lugar con carácter anual. A denominación de 'Xosé Manuel Eirís' para este Certame Fotográfico provén do recoñecemento que o Concello e as entidades culturais do municipio queren render a unha persoa vinculada ao mundo cultural e artístico de Carballo e de Galicia, preocupada pola recuperación e promoción do noso patrimonio cultural e pola participación da cidadanía neste proceso de desenvolvemento. Esta iniciativa pretende perpetuar o recordo do que foi animador cultural de Carballo a través dunha das súas afeccións, a fotografía. En cada edición o Concello de Carballo convida a unha asociación do municipio a formar parte do xurado e a colaborar na súa organización. Os interesados e interesadas en participar no concurso deben presentar as súas propostas antes do 7 de febreiro de 2011.
ENTREVISTA CO DIRECTOR XERAL DE EDUCACIÓN
Luns 20 de decembro do 2010
O Alcalde de Carballo, Evencio Ferrero, e a Concelleira de Educación, Mar Eirís, veñen de manter hoxe, luns 20 de decembro, unha xuntanza co Director Xeral de Educación, Formación Profesional e Innovación Educativa, José Luis Mira Lema, para plantexarlle a necesidade de que a Escola Oficial de Idiomas (EOI) de Carballo funcione como un centro independente, xa que este curso 2010-2011 conta cun total de 602 alumnos e alumnas, un volume altísimo que fai que cada ano sexa máis difícil desenvolver as clases con normalidade nas instalacións do Pazo da Cultura. Dende a posta en marcha da EOI, que na actualidade está integrada na EOI da Coruña, pasouse de 89 matriculados para o curso 2004-2005 até os 602 da actualidade, cun crecemento dun 85 por cento. Así mesmo, dun único idioma, o inglés, que se ofertaba nos comezos, agora os alumnos e alumnas poden cursar inglés, francés e alemán, pasándose dun só profesor/a nos inicios aos nove que hai na actualidade. O Director Xeral de Educación escoitou as demandas do Alcalde e da Concelleira de Educación, pero explicou que a escisión da EOI da da Coruña depende dunha reordenación máis ampla, a máis longo prazo e que afecte a todos os centros galegos.
NA CATEGORÍA DE ADMINISTRACIÓN DE SISTEMAS INFORMÁTICOS
Venres 17 de decembro do 2010
O alumno do IES Isidro Parga Pondal, Ismael Castiñeira González, vén de gañar o Campionato Galego da Formación Profesional, GaliciaSkills 2010, na categoría de Administración de Sistemas Informáticos, polo que representará a Galicia nas XXXIII Olimpíadas da Formación Profesional SpainSkills 2011, que se celebran en Madrid o próximo mes de abril. Xunto con Ismael Castiñeira, no podio tamén estivo outro alumno do Parga Pondal, Michel Vila Gomes, que resultou o terceiro clasificado na mesma categoría, os dous baixo a titoría do profesor Juan Francisco Puentes Calvo. A cita celebrouse no IES San Clemente de Santiago, onde competiron con 34 centros das principais cidades e vilas de toda Galicia. En total, GaliciaSkills supuxo a entrega de 20 premios en categorías de Formación Profesional que van dende o deseño web á ebanistería ou coidados de beleza. O Alcalde de Carballo, Evencio Ferrero, e a Concelleira de Educación, Mar Eirís, recibiron no Concello aos gañadores, que estiveron acompañados por profesorado do IES Parga Pondal. Ferrero felicitou aos alumnos por vencer nunha disciplina que eles mesmos recoñeceron que se fixo complicada e desexoulle a Ismael sorte para a cita do Campionato de España.
PECHE DAS III XORNADAS CARBALLO PORTAABERTA
Venres 17 de decembro do 2010
O Telecentro de Comunicación do Pazo da Cultura vén de acoller as III Xornadas Carballo PortaAberta, que abordaron "As novas tecnoloxías e o sector audiovisual" a través de tres conferencias e unha mesa redonda e que tiveron como peche a entrega de premios das III Olimpíadas Tecnolóxicas a través do I Festival de Curtas rodadas con Móbil. Un total de catro microcurtas duns dous minutos de duración, rodadas en obradoiros realizados durante o mes de novembro, repartíronse os galardóns, que consistiron nunha reproducción do logo das Xornadas PortaAberta realizado en Cerámica de Buño por Eloy Mancebo Lema, de <feituras.com>. Os galardóns foron entregados polo Alcalde de Carballo, Evencio Ferrero, e polo Concelleiro de Promoción Económica, Xosé Manuel García Guillín. O premio á Mellor Idea Orixinal recaeu en "Entre dos aguas" de Juan Carlos Gómez Mancebo, así como o de Mellor Guión. O premio á Mellor Posprodución foi para VADEM Productions por "2 formas de facer as cousas". O premio á Mellor Interpretación Feminina foi para Soraya Suárez Míguez por "Inxustizas", microcurta que tamén levou o Premio do Público. E por último, "Misterio na Panadería" levou o premio á Mellor Interpretación Masculina, para Adrián González Sánchez, que tamén recolleu o premio á Mellor Curta polo seu traballo. Os interesados e interesadas que queiran ver as curtas aínda poden facelo en youtube a través de <alinternamaxica>.
CATÁLOGO DE AGASALLOS E CARTA AOS REIS MAGOS
Xoves 16 de decembro do 2010
A Deputación da Coruña e os Servizos de Normalización Lingüística (SNL) dos concellos de Carballo, Cabana, Malpica, Ponteceso e Zas veñen de unirse para favorecer unha campaña de Nadal que facilite que os cativos e cativas poidan escribir en galego a súa Carta aos Reis Magos, ademais de favorecer a compra de agasallos "en galego" nestas datas. Para iso, a Deputación vén de editar unha guía, titulada "Agasallo. Propostas de regalos en galego", que conta cunha tirada de 45.000 exemplares que serán distribuídos en toda a provincia e que ofrece arredor de 250 propostas de regalos para todas as idades, incluíndo narrativa infantil e para adultos, xoguetes, música ou incluso camisolas. A oferta vai dende produtos culturais ata aparellos tecnolóxicos, DVD, móbiles, colonias, etc. Trátase de agasallos etiquetados, promocionados ou realizados en galego e o obxectivo é que se distribúan nos edificios oficiais do municipio, como a Casa do Concello ou o Pazo da Cultura, e tamén nos centros escolares para que os cativos e cativas poidan escribir a súa carta e pedir os seus agasallos de Nadal "en galego".
.jpg)