O CONCELLO SOLICITA QUE A EOI FUNCIONE COMO CENTRO INDEPENDENTE
Xoves 11 de novembro do 2010
O Alcalde de Carballo, Evencio Ferrero, e a Concelleira de Educación, Mar Eirís, veñen de manter unha xuntanza coa Xefa Territorial de Educación, María Teresa Villaverde Pais, para trasladarlle de novo as necesidades educativas do Concello. Durante a reunión falouse do principal proxecto que está neste momento en marcha, como é a ampliación do CEIP Bergantiños da capital municipal, unha actuación destinada a paliar en parte os problemas de escolarización previstos para o curso 2011-12, no que será preciso incluír nas aulas a 313 nenos e nenas nacidos en 2008, "unha cifra moi elevada", en verbas do Alcalde. O compromiso de Educación era que os traballos comezasen en 2010 para poder afrontar o curso 2011-12 coas novas instalacións en marcha. Poren, Villaverde Pais informou de que nestes momentos a actuación aínda está en proceso de presentación de propostas. Dende a adxudicación do proxecto estipúlase un prazo de dous meses para a súa redación e despois principiaríase o expediente de contratación, polo que, aínda apurando os prazos, a contratación non se produciría ata o segundo trimestre de 2011.
O PROXECTO FOI FINANCIADO CON FONDOS FEDER
Mércores 10 de novembro do 2010
Técnicos do Agader (Axencia Galega de Desenvolvemento Rural) veñen de vistar a Ruta das Férvedas do Concello de Carballo, acondicionada con fondos FEDER (Fondo Europeo de Desenvolvemento Rexional) xestinados polo Ministerio de Medio Ambiente, o Agader e o Concello de Carballo. A actuación realizouse con cargo ao programa de Proxectos Dinamizadores de Áreas Rurais de Galicia na convocatoria de 2008-09, e consistiu no acondicionamento de 27,6 quilómetros de senda rural, na sinalización do roteiro e na reconstrución dunha ponte sobre o río Rosende para darlle continuidade ao percorrido. A Ruta cruza catro parroquias do Concello, Carballo, Ardaña, Rus e Entrecruces, saíndo da Brea e chegando ata o cruceiro da Capela de San Paio en Entrecruces. O orzamento para a realización da actuación é de 26.326,81 euros, dos que o Agader achega o 44,49 por cento, un total de 11.712,80. Ademais de dous técnicos, estiveron presentes durante a visita o Alcalde de Carballo, Evencio Ferrero; o Concelleiro de Obras, Luís Lamas; e o Concelleiro de Deporte, Sanidade e Xuventude, Marcos Trigo.
ATÉ O 30 DE NOVEMBRO NA BAIXOCUBERTA DO PAZO DA CULTURA
Martes 9 de novembro do 2010
O Concello de Carballo prepara varias actividades para conmemorar o 25 de novembro, Día Internacional da Eliminación da Violencia contra as Mulleres. Despois de que a sesión plenaria de outubro ratificara por unanimidade unha Declaración Institucional contra a violencia de xénero, na que, entre outras cousas, maniféstase unha "enérxica repulsa" contra a violencia que se exerce contra as mulleres, agora chega unha exposición organizada pola Fundación Galiza Sempre, coa colaboración do Ministerio de Educación, a Deputación da Coruña e o Concello de Carballo. A mostra, titulada "Feminismo galego. Cambios sociais e dereitos das mulleres", realiza un repaso pola historia do feminismo dende o ano 1800 e recolle diversos materiais que dan testemuño dos obxectivos e reivindicacións do feminismo galego e pretende contribuír -por medio da reprodución de textos, publicacións, noticias e documentación gráfica- á reflexión na sociedade galega sobre os avances e cambios sociais promovidos polo movemento a prol da igualdade de dereitos mulleres. Pode visitarse na sala da baixocuberta do Pazo da Cultura até o 30 de novembro.
CONTRATACIÓN PARA O SUBMINISTRO DE ENERXÍA ELÉCTRICA
Luns 8 de novembro do 2010
A Xunta de Goberno Local reunida en sesión ordinaria vén de aprobar as Bases da Convocatoria de Subvencións para a realización do Programa Anual de Actividades do ano 2010. Estas axudas teñen por obxecto colaborar coas asociacións culturais do municipio de Carballo na realización dun programa estable de actividades culturais. O Concello pretende contribuír á promoción da cultura e do tecido asociativo e á potenciación do seu papel no desenvolvemento cultural, así como favorecer o acceso á cultura dos cidadáns promovendo a diversidade das propostas culturais. Poderán concorrer na convocatoria aquelas entidades que, ademais de estar inscritas no rexistro do Concello desenvolvan actividades que non persigan ánimo de lucro, que o ámbito das actuacións sexa o municipio carballés, que a súa sede social estea no Concello e que non teñan pendente de xustificar ningunha subvención ou axuda económica co Concello correspondente a exercicios anteriores. Entre os criterios para a concesión das axudas está o interese cultural do programa, a súa valoración económica, o número de beneficiarios da actividade, o ámbito territorial e social do proxecto ou a cooperación entre entidades. Para a concesión destas axudas destinarase un orzamento de 20.000 euros.
O GOBERNO CENTRAL TEN PROXECTOS EN CARBALLO POR 3,8 MILLÓNS
Sábado 6 de novembro do 2010
Os orzamentos do Estado para o próximo ano 2011 inclúen unha partida de 500.000 euros para o Concello de Carballo, segundo informa a administración local. Trátase dunha cantidade que se destinará ao "Acondicionamento e mellora da accesibilidade na contorna do mercado municipal" e que xurdiu dun acordo tomado no debate da comisión de orzamentos do Congreso. O Concello comezará o antes posible o proceso para elaborar o proxecto da actuación, que esperan que sirva para urbanizar o exterior da praza de abastos, especialmente no entorno da rúa Gran Vía. O Goberno local amosou a súa satisfacción pola concesión desta cantidade, e hai que subliñar que nestes momentos o Concello de Carballo xa conta cun investimento estatal de 1.800.000 euros para a reforma integral do mercado municipal, aos que se suma agora este medio millón para a posta en valor dos seus arredores. Así mesmo, a Administración central ten concedido 1.500.000 euros para a construción da futura Biblioteca comarcal, co que se teñen acadado preto de catro millóns de euros do Estado en investimentos para Carballo nos últimos meses, investimentos que se traducirán en novos equipamentos que estarán rematados entre 2011 e 2012.
CONSTRUÍDO CON 245.000 EUROS DO PLAN E
Sábado 6 de novembro do 2010
Os veciños e veciñas de Oza veñen de inaugurar oficialmente o seu novo centro social, un edificio "singular" en verbas do Alcalde, Evencio Ferrero, construído con fondos estatais cun orzamento de 245.000 euros e que pasa a engrosar unha rede de edificios de lecer na que xa están incluídos os centros de Berdillo, Sofán e Imende e na que pronto estarán os de Cances e A Brea. Un total de seis locais auto xestionados polos veciños e veciñas das parroquias que pretenden facer de Carballo "un bo lugar para vivir". O novo local está edificado nos terreos da antiga escola unitaria, realizado maioritariamente con elementos como a madeira e o cristal, e está dotado de sala de informática, oficinas e salas multiusos, un grande salón de actos e un amplo patio. No acto de inauguración estiveron presentes, ademais do Alcalde, o Tenente de Alcalde, José Antonio Viña; a Concelleira de Cultura, Belén Lendoiro; numerosos membros da corporación municipal e un nutrido grupo de veciños e veciñas, ademais do Subdelegado do Goberno, José Manuel Pose Mesura, que desexou que o centro social se converta "nun lugar de encontro onde a xente poda falar, os nenos xogar e que incluso serva como espazo de formación".
ATÉ O XOVES 11 DE NOVEMBRO
Venres 5 de novembro do 2010
O Concello de Carballo abre un novo obradoiro formativo, ampliando así o cupo de participantes para o I Festival de Curtas rodadas con móbil. O novo obradoiro audiovisual terá lugar os mércores e xoves en horario de 17.00 a 20.30 horas, dando comezo o vindeiro mércores 10 de novembro. Como no obradoiro xa anunciado para os sábados, en horario de 10.00 a 13.30 e de 16.00 a 19.00 horas, os participantes no Festival poderán desenvolver de primeira man cada unha das fases do proceso creativo dunha curta, pasando pola elaboración do guión, a rodaxe e a posprodución. As dúas quendas de traballo dan mais flexibilidade de horario aos e ás participantes pero ambos os dous horarios manteranse sempre e cando exista un mínimo de participantes para as dúas quendas. O comezo dos obradoiros formativos será: o mércores 10 de novembro, ás 17.00 horas, e o sábado 13 de novembro, ás 10.00 horas. Por este motivo, vólvese a ampliar o prazo de inscrición ata o mércores 10 ás 14.00 horas, para o novo obradoiro, e para o xoves 11 ás 20.00 horas para o obradoiro dos sábados. Ambos os dous obradoiros terán lugar no Telecentro de Comunicación do Pazo da Cultura de Carballo, onde os e as interesados se poden informar e anotar para esta actividade. Máis información no teléfono 981 704 300 ou no propio Telecentro.
ATÉ O 14 DE NOVEMBRO NO PAZO DA CULTURA
Venres 5 de novembro do 2010
A sala de exposicións do andar -1 do Pazo da Cultura acolle até o domingo 14 de novembro a exposición "Rosalía sempre viva. Viva Rosalía!!", que organizan a Fundación Manuel María e a Deputación da Coruña coa colaboración do Concello de Carballo. A mostra, que conmemora o cento vinte e cinco aniversario do falecemento da escritora Rosalía de Castro está conformada por 20 paneis montados en 5 estruturas compostos de elementos gráficos e textos que repasan os elementos máis relevantes da vida e obra da escritora, ofrecendo una novidosa visión e subliñando "aspectos moi pouco coñecidos" da poetisa, segundo explica Alberte Ansede, da Fundación Manuel María. O comisario responsable da exposición é Diego Pardo, un especialista na figura da autora que ten entre os seus obxectivos "desmontar tópicos inxustos" acerca da escritora máis célebre da literatura galega e a súa vontade é a de conformar unha mostra divulgativa pero sen renunciar ao rigor documental. Na presentación da mostra, que poderá visitarse en horario de 16.00 a 21.00 horas, estiveron presentes, ademais de Ansede, a Presidenta da Fundación Manuel María e viúva do autor, Saleta Goy; Xoán Sande, Deputado provincial; e a Concelleira de Cultura, Belén Lendoiro.
DOMINGO 7 DE NOVEMBRO DE 9.00 A 21.00 HORAS
Venres 5 de novembro do 2010
O Club Golpe Pitch&Putt organiza o domingo 7 de novembro o VII Maratón de Golf Horbesa 2010 no entorno do espazo natural de Razo-Baldaio que se converte no maior burato de golf do mundo. Está previsto que a cita se desenvolva entre as 9.00 e as 21.00 horas e que participen nela arredor dun centenar de persoas, tanto homes como mulleres. Dende a organización, José Luis Martínez Souto, subliña o feito de que o próximo ano tentarán que o Récord Guinness declare o entorno no que se desenvolve a proba, de máis de catro quilómetros de lonxitude, como o maior burato do mundo, ou, de non cumprirse os requisitos, que se recoñeza como o bunker de golf máis longo. Os participantes do maratón irán golpeando as bolas dende a saída, na zona do Bar O Cordobés, ata enbocar nun burato de catro metros de diámetro situado máis aló da ría de Baldaio. Os xogadores irán saíndo cada cinco minutos. Unha vez cheguen todos os participantes, os xogadores tamén realizaran un percorrido de nove buratos no Club Golpe. Ás 14.30 horas está previsto facer un descanso cun xantar no club. Os interesados/as en inscribirse aínda poden facelo no 981 739 699 ou no 670 406 421.
ENTRE O 6 DE NOVEMBRO E O 3 DE DECEMBRO
Venres 5 de novembro do 2010
Cando o Pazo da Cultura aínda se está recuperando do éxito de público do FIOT o outono cambia de traxe e pasa do teatro aos pentagramas co inicio do programa Novembro con música (NCM) 2010. Un total de once concertos gratuítos protagonizados por 32 agrupacións musicais, a grande maioría do municipio, conforman un programa no que tamén están incluídas 3 exposicións, un obradoiro e un espectáculo de contacontos. A Concelleira de Cultura, Belén Lendoiro, subliña a variedade de estilos presentes no programa, con música clásica, folk, rock e tradicional, tentando cumprir, ademais, un dos obxectivos principais do Novembro con música, que é o de dar a coñecer o traballo das agrupacións musicais de Carballo. As actividades desenvólvense entre o sábado 6 de novembro e o venres 3 de decembro e os concertos son con entrada libre ata completar o aforo no Pazo da Cultura, excepto nun en que será preciso reservar convite. O programa inclúe citas xa consolidadas, como o 'Live in Cances', o concerto 'Sons de aquí', o concerto do Conservatorio Profesional de Música, o concerto de Santa Cecilia, o Festival de Corais, o Concerto da Banda Municipal ou o ciclo 'En Familia'.
LUNS 1 DE NOVEMBRO ÁS 21.00 HORAS
Sábado 30 de outubro do 2010
O Festival Internacional Outono de Teatro, FIOT 2010, pecha as súas portas o luns 1 de novembro coa presenza da compañía que gañou o premio do público en 2009: Pentación Espectáculos. Naquel entón, as "Seis clases de baile en seis semanas" de Lola Herrera e Juanjo Artero conquistaron ao público, acadando unha puntuación de 4,81 sobre 5. Juanjo Artero repite este ano coa nova proposta de Pentación, "Karaoke", na que está acompañado por espléndidos actores e actrices como son Neus Asensi, Elisa Matilla e Ángel Pardo. "Karaoke" é unha comedia de personaxes infelices, repleta de humor, ironía e esperanza. De catro perdedores que viven por inercia, xa que nada parece mover os seus adormecidos corazóns. Só a canción que cada un interpreta no karaoke de barrio ao que acoden lles fai recordar e revivir os momentos felices das súas vidas. O karaoke é unha táboa de salvación á que se aferran antes de deixarse afogar polo paso do tempo. Unha comedia aceda, chea de trazos cómicos, música, bromas divertidas, situacións absurdas e sentimentos que conseguirá emocionarnos. Está previsto que a compañía recolla o Premio do Público momentos antes da representación, prevista para as 21.00 horas. As entradas para a función están esgotadas dende os primeiros momentos da súa posta á venda.
CAFÉ CON...: DOMINGO 31 ÁS 19.00 HORAS
Venres 29 de outubro do 2010
A penúltima función do Festival Internacional Outono de Teatro, FIOT 2010, vén o domingo 31 de outubro da man duns vellos coñecidos do escenario carballés, Atalaya Teatro. Estiveron en 2005 co seu éxito "Medea", que naquel entón tiña atrapado aos espectadores coa súa plasticidade, a súa emoción e a súa revisión da historia de Eurípides dunha muller sumida nunha desesperación tal que a empuxa a matar aos seus propios fillos. Agora volven con "Ricardo III", outra traxedia non menos cruenta, neste caso doutro xenio da dramaturxia, William Shakespeare. A loita de Ricardo III polo poder absoluto do goberno de Inglaterra é a historia escalofriante dun criminal, un tirano e un psicópata corrompido pola súa ambición desmedida que non dubida en recorrer a enganos, traizóns e asasinatos. Partindo dunha adaptación impecable dunha das obras máis representadas de Shakespeare, Atalaya realiza un creativo e soberbio traballo de enorme envergadura, cunha suxerinte posta en escena, beleza plástica e gran forza dramática que nos achega aos abismos do ser humano. A cita é ás 21.00 horas. As entradas están esgotadas.
.jpg)