OBRAS E SERVIZOS
Venres 9 de outubro do 2009
Entre o 1 de xaneiro e o 9 de outubro de 2009 o Concello, a través da Alcaldía, ten recibido un total de 1.000 avisos de veciños e veciñas para realizar servizos de mantemento e arranxos en todo o territorio municipal. A Brigada de Obras é a encargada de xestionar estas peticións dos cidadáns, que nun 45 por cento (460 avisos) refírense a substitucións e reparacións no alumeado público, especialmente nas parroquias. Outras das peticións refírense aos sinais de tráfico e carteis indicadores; a servizos de auga, luz, saneamento ou teléfono; a avisos xestionados a través de Carballo Limpo; aos equipamentos e mobiliario dos edificios municipais; á limpeza de espazos públicos ou á mellora da rede viaria do Concello.
12 DE OUTUBRO: UN TOTAL DE 102 INSCRITOS
Venres 9 de outubro do 2009
O Circuíto de Motor de Bértoa acolle o luns 12 de Outubro a disputa do VII Motocross Concello de Carballo, unha proba do Campionato Galego na que están inscritos un total de 102 pilotos, acadándose o número de participantes máis elevado de toda a tempada de 2009. As categorías son de 65, 85,125, 250 e 450 e hai que subliñar a alta competitividade das carreiras, xa que aínda non está decidido ningún dos campionatos. Trátase da primeira proba de Motocross que se corre no Circuíto de Bértoa dende a súa reapertura, o 18 de xullo de 2009, e da terceira proba de motor a nivel galego. Os adestramentos serán a partires das 11.00 horas, e até as 13.30 horas, mentres que as carreiras serán pola tarde, a partir das 15.30 horas.
FESTIVAL INTERNACIONAL OUTONO DE TEATRO
Mércores 7 de outubro do 2009
O mércores 7 de outubro principia o Festival Internacional Outono de Teatro (FIOT '09) cunha das actividades paralelas máis consolidadas do FIOT: a Rúa dos Contos, na que se poderá desfrutar de doce espectáculos teatrais de pequeno formato en cafeterías e pubs do centro urbano carballés. Esta edición número XI da Rúa dos Contos desenvolverase durante cinco noites, desde o mércores 7 ata domingo 11 de outubro, e a entrada a estes espectáculos é libre e gratuíta. O encargado de levantar o pano tanto do FIOT como da Rúa dos Contos é o monologuista David Amor, que estará a partires das 22.00 horas na Cervecería La Bombonera co seu espectáculo 'No censure'.
O PACTO DO EMPREGO ASINARÁ UN CONVENIO DE COLABORACIÓN
Mércores 7 de outubro do 2009
O Concello de Carballo está establecendo xuntanzas e mantendo contactos con outros municipios da comarca e con representantes do Pacto Territorial de Emprego da Costa da Morte para acadar a sinatura dun convenio co Ministerio de Industria que permita impulsar dende o territorio a presentación de proxectos empresariais xeradores de actividade económica e emprego. A última reunión foi o martes 6 de outubro, e nela estiveron presentes o deputado Xavier Carro; o Alcalde de Malpica, Ramón Varela; o Concelleiro de Obras de Carballo, Luís Lamas; o Tenente de Alcalde carballés, José Antonio Viña; e o Alcalde, Evencio Ferrero, que falaron das próximas actuacións e da natureza das axudas, dirixidas a concellos e empresarios.
12 DE OUTUBRO: NOS PAVILLÓNS VILA DE NOIA E CARBALLO CALERO
Mércores 7 de outubro do 2009
O próximo 12 de outubro Carballo acolle unha vez máis o Torneo de Basket das Festas do Pilar, que chega á súa quinta edición e que xa se ten convertido nunha cita deportiva tradicional no calendario do Concello. Esta xornada de baloncesto divídese no Torneo de Minibasket, que se celebra no pavillón Carballo Calero e que conta coa participación da Escola Basket Xiria, o Colexio Artai, o ACB Costa da Morte, o Basquet Coruña Atlántico e o CB Cambre; e no Torneo de Seleccións, no pavillón Vila de Noia e coa participación da Selección Galega Cadete Masculina, a Selección Galega Infantil Masculina o Basquet Coruña Atlántico, a Escola Basket Xiria e o Colexio Artai.
HABERÁ SERVIZO DE CANGURAXE PARA OS VECIÑOS E VECIÑAS
Martes 6 de outubro do 2009
O mércores 7 de outubro principian os obradoiros destinados a formar e informar á cidadanía en educación e participación para preservar o medio ambiente incluídos no programa de actividades 'De ti depende. Carballo sostible'. Este ciclo -que dura até o 11 de novembro- arrinca a partires das 13.00 horas cunha sesión destinada aos técnicos e técnicas do Concello, mentres que ás 20.30, e até as 22.00 horas, será o obradoiro aberto para os veciños e veciñas. A cita é no segundo andar do Pazo da Cultura e a organización informa de que, para favorecer a conciliación familiar, haberá un servizo de canguraxe para facilitar a participación dos cidadáns. Os nenos e nenas recibirán un obradoiro medioambiental na planta baixa mentres ten lugar a sesión para adultos.
CONTOS PARA FALAR
Luns 5 de outubro do 2009
O salón de actos do Pazo da Cultura de Carballo acolle as mañás do luns 5 e o martes 6 de outubro 'Contos para falar’, unha actividade de dinamización lingüística na que, a través dunha montaxe narrativa musical, nenos e nenas emprenden unha viaxe lúdica coa lingua e a comunicación como protagonistas. O obxectivo destas actividades é que os máis pequenos e pequenas relacionen o uso da lingua galega na lectura e na comunicación oral con actividades positivas, participativas e agradables para que, deste xeito, tamén desenvolvan actitudes positivas respecto da lingua propia dende o punto de vista afectivo e funcional.
FIOT: DO 7 DE OUTUBRO AO 1 DE NOVEMBRO
Luns 5 de outubro do 2009
Un total de 49 actores, 18 contacontos, 10 obras de sala no auditorio do Pazo da Cultura e 6 estreas, unha delas estrea en España, conforman o programa do Festival Internacional Outono de Teatro (FIOT '09). A cita chega nesta XVIII edición á súa maioría de idade cos obxectivos de "manter a traxectoria e calidade" e "achegarse máis ao público", en verbas do presidente da Asociación Cultural Telón e Aparte, Alberto Sueiro. A organización quixo subliñar a dificultade de pechar o programa "nun entorno de crise ao que o festival non podía quedar inmune". Aínda así, o Alcalde, Evencio Ferrero, resaltou a vontade de que "é unha programación para desfrutar e para que nos encha de ánimos en momentos de necesidade". O festival aposta de novo polos seus sinais de identidade, como son a Rúa dos Contos -que duplica a súa presenza- o Festival de Teatro Lido e o premio Xograr de Outono, sen esquecer a calidade do teatro de sala.
XOVES 1 E VENRES 2 DE OUTUBRO
Xoves 1 de outubro do 2009
O Pazo da Cultura concentra o xoves 1 e o venres 2 de outubro tres ofertas culturais ben distintas centradas no teatro, na música e na literatura. O xoves é a quenda da presentación do XVIII Festival Internacional Outono de Teatro (FIOT '09), que inclúe a actuación do humorista Xosé Touriñán. Tamén o xoves chega a música da man do XX Festival Internacional de Música de Pulso e Púa 'Cidade de Cristal', cun concerto a cargo dunha importante agrupación rusa, Izumrud-Grupo Esmeralda, do Teatro da Comedia Musical de Ekaterimburgo. E, por último, o venres regresa o programa Literactúa, desta volta coa presentación e proxección de 'Na bágoa da marea', un miniepisodio dedicado a Carballo da serie de internet 'Para mariñeiros nós'.
APROBADO O PROXECTO PARA A TRAVESÍA DE SÍSAMO
Martes 29 de setembro do 2009
A sesión plenaria ordinaria do mes de setembro celebrada o luns 28 serviu para sacar adiante a aprobación da ampliación da zona azul, nunha cuarta fase, na capital municipal carballesa. Esta medida afecta á rúa Rosalía de Castro, con 44 prazas de estacionamento; a parte da rúa Sol, dende a glorieta até a ponte, con 14 prazas máis; á praza da Milagrosa, con 20 prazas de aparcamento; e ao primeiro tramo da rúa Miño, con 14 novas prazas de zona azul. Trátase dun total de 92 novos espazos para eliminar os vehículos ventosa do centro urbano carballés limitando o tempo de estacionamento a un máximo de 90 minutos.
MODIFICACIÓN DO HORARIO DA AULA ABERTA
Martes 29 de setembro do 2009
A Rede de Dinamización da Sociedade da Información (RDSI), en colaboración co Concello de Carballo, anuncia máis actividades de achegamento ás novas tecnoloxías que terán lugar no Telecentro do Pazo da Cultura (na imaxe) durante o mes de outubro. Os obradoiros que se van desenvolver tratan sobre 'Iniciación á Informática', 'Iniciación á Internet', 'Creación dunha conta correo electrónico', 'Elaboración do currículo co ordenador' e 'Procura de emprego en Internet'. Por outra banda, a RDSI informa do cambio de horario da aula aberta do Telecentro, que terá lugar o xoves 1 de outubro. Así, pasará a ser: de luns a venres de 10.30 ás 14.00 horas e de luns a xoves de 16.30 a 20.30 horas.
FESTIVAL INTERNACIONAL OUTONO DE TEATRO 2009
Martes 29 de setembro do 2009
A organización do Festival Internacional Outono de Teatro (FIOT '09) volve apostar polo teatro de rúa coa XI edición da Rúa dos Contos, unha actividade que xa se ten convertido nun festival máis dentro do FIOT. Nesta quenda incluiranse moitos e divertidos espectáculos de pequeno formato que terán lugar en diferentes locais de Carballo como: A Cabaña, Pub Silfo, Café Valle Inclán, Café Colón, A Reserva, Pub A Tentación, O Patacón, Cósmic, Bodegón O Pescador e Cervecería A Bombonera. Desde o xoves 7 e ata o domingo 11 de outubro, entre as 21.00 e 01.00 horas, poderemos asistir aos espectáculos de David Amor, Avelino González (na imaxe), Celso Fernández, Toñito de Poi e Cándido Pazó, entre outros.
.jpg)