RECEPCIÓN NA ALCALDÍA
Venres 3 de xullo do 2009
O programa do Verán Cultural de Carballo 2009 principia con música e exposicións. Despois da inauguración o xoves 2 de xullo da mostra 'Reflexos de Carballo', que permanece no Pazo ata o 10 de agosto, agora é o momento de principiar coa oferta musical, neste caso co Festival dúas Beiras, organizado pola asociación Casa del Uruguay El Ceibo e o Concello de Carballo. Este festival nace da motivación por amosar os diversos estilos musicais de ambas beiras do Atlántico e as influenzas culturais dos dous países como ferramenta integradora e do coñecemento mutuo. Pola beira galega está prevista a actuación das cantareiras da asociación Raigañas de Cerqueda (Malpica), mentres que por parte de Uruguai chegan La Tríada, Batería de Murga. A cita é o sábado 4 de xullo no Pazo da Cultura a partires das 21.00 horas. A entrada é de balde ata completar o aforo.
NOVAS TECNOLOXÍAS
Venres 3 de xullo do 2009
A Rede de Dinamización da Sociedade da Información continuou en xuño co seu traballo a prol da inmersión dos veciños e veciñas de Carballo nas NovasTecnoloxías. No mes que remata impartíronse un total de 5 obradoiros tecnolóxicos, a través dos que se formou a 51 persoas e que se estenderon ao longo de 40 horas. Ademais, 23 persoas inscribíronse como usuarios/as da Rede para poder aproveitar -sempre de xeito gratuíto- as instalacións do Telecentro e todas as iniciativas que a Rede oferta nas horas de aula aberta, que foi utilizada nun total de 297 ocasións. En canto aos números xerais da Rede, desde que botou a andar neste concello de Carballo en xaneiro de 2007 foron xa 648 os usuarios e usuarias que fixeron o carné da RDSI. Neste tempo leváronse a cabo 53 obradoiros nos que se formou a 459 participantes. Tamén se fixeron dúas charlas e sete iniciativas, nas que participaron 40 persoas.
CONCELLARÍA DE CULTURA
Xoves 2 de xullo do 2009
O programa do Verán Cultural de Carballo 2009 xurde coa vocación de contar cunha oferta diversa e de calidade para diferentes públicos, así como ofrecer a todos os cidadáns de Carballo e aos visitantes que se achegan ao noso municipio durante o verán a posibilidade de enriquecer o tempo de lecer nun período de carácter especialmente lúdico. Así o expresou a Concelleira de Cultura, Belén Lendoiro, durante a presentación das actividades, que tamén serven para involucrar e dar a coñecer o traballo das principais agrupacións musicais e artísticas de Carballo. O cine, o teatro, os libros, a lingua, as exposicións e os festivais centran o programa, con citas xa tradicionais como a Praza dos Libros, o Festival Sereas e Piratas e o programa Noites de cine, ademais dos Venres Culturais.
VISITA DA CONCELLEIRA DE CULTURA
Mércores 1 de xullo do 2009
Un ano máis un nutrido grupo de carballeses e carballesas viaxarán á vila de L’Isle Jourdain, pequena capital da Gascuña tolosana, en Francia, coa que o Concello de Carballo está irmandada desde o ano 1994. Os vencellos que unen ambas as dúas vilas tradúcense cada ano en intercambios coma este. A última das visitas institucionais foi en xuño de 2008, cando o alcalde, Evencio Ferrero, se desprazou até a vila francesa acompañado por unha nutrida delegación do Comité de Irmanamento con L’Isle Jourdain (na imaxe). Nesta ocasión, na viaxe organizada polo Comité de Irmanamento, a representante do Concello de Carballo é Belén Lendoiro, concelleira de Cultura e Normalización Lingüística.
VISTO BO PARA AS BOLSAS DE ESTUDOS 2009-2010
Martes 30 de xuño do 2009
A corporación carballesa vén de celebrar unha sesión plenaria ordinaria na que sacou adiante un suplemento de crédito por un importe de 481.866,10 euros con cargo ao remanente de tesourería. Con esta cantidade está previsto financiar parte da construción dun centro social en Cances e tamén a instalación de paneis de enerxía solar na piscina Vila de Noia da capital municipal (na imaxe). O pleno da Deputación provincial vén de aprobar o acordo para poder financiar nun 80 por certo o custe destas instalacións, con cargo a un plan de investimentos en instalacións deportivas e a un plan para edificios culturais. O Goberno local sacou adiante unha operación de crédito que permite aportar as cantidades necesarias para completar o financiamento, con 37.095 euros para os paneis solares e 64.235 para o centro social de Cances, para o que xa hai terreos dispoñibles.
XUNTANZA DA MESA DE CONTRATACIÓN
Luns 29 de xuño do 2009
A mesa de contratación encargada da adxudicación do proxecto para a reforma do mercado de abastos da Praza do Concello mantivo hoxe -luns 29 de xuño- unha nova xuntanza na que se procedeu á apertura da proposta técnica presentada polos cinco estudos de arquitectura que superaron a pre selección previa, realizada tamén pola mesa de contratación. Trátase de Hermo Iglesias Veiga Arquitectos, con sede na Coruña; Grupo TAU, A Coruña; Mur & Garganté, Arquitectos Asociados, de Barcelona; Abadeus Arquitectura, da Coruña, e Eptisa Servicios de Ingeniería, de Madrid. A súa documentación será remitida a un grupo de expertos, que avaliarán as cinco propostas e redactarán un informe técnico que indicará cal delas é a máis axeitada.
SESIÓN PLENARIA ORDINARIA
Sábado 27 de xuño do 2009
A corporación de Carballo celebra o luns 29 a sesión plenaria ordinaria do mes de xuño, na que un dos principais puntos da orde do día é a aprobación dun suplemento de crédito por un importe de 481.866,10 euros con cargo ao remanente de tesourería. Dentro das partidas incluídas nesta operación financeira, destacan as destinadas á construción dun centro social en Cances e á dotación de paneis de enerxía solar na piscina Vila de Noia da capital municipal, actualmente en proceso de reforma. O pleno da Deputación provincial vén de aprobar esta semana o acordo para poder financiar nun 80 por certo o importe destas instalacións, e o goberno local leva ante o pleno a aprobación dos importes necesarios para completar o financiamento, con 37.095 euros para os paneis solares e 64.235 para a creación dun edificio cultural en Cances, para o que xa hai terreos dispoñibles.
SERVIZOS
Venres 26 de xuño do 2009
Os areais de Razo e Pedra do Sal volven a contar un ano máis coa Bandeira Azul, un distintivo de calidade que outorga cada ano a ONG Asociación de Educación Ambiental e do Consumidor e que xa luciron estas praias carballesas no verán de 2008. Esta bandeira recoñece non só a calidade das augas, senón tamén a calidade dos servizos, da xestión ambiental, da seguridade e en xeral das instalacións das que dispoñen estes espazos naturais. O Alcalde de Carballo, Evencio Ferrero, e o Tenente de Alcalde, José Antonio Viña, xunto con Concelleiro de Praias, Benedito Viña, procederon o venres 26 de xuño ao izado das dúas bandeiras que permanecerán nos areais ata a finalización da tempada de verán, que principiou oficialmente o xoves 11 de xuño, e que está previsto que remate o 10 de setembro.
DEPORTE
Venres 26 de xuño do 2009
Un total de oito clubs de renome toman parte na fase final do V Torneo Internacional de Fútbol 7 Concello de Carballo, que se celebra no Campo de Fútbol Municipal As Eiroas entre o venres 26 e o domingo 28 de xuño. Trátase do FC Barcelona, do Atlético de Madrid, o Deportivo da Coruña, o Celta de Vigo, a UD Almería, o Luis Calvo Sanz o holandés FC Groningen e o gañador da fase previa, disputada entre 20 dos mellores clubs galegos, o Conxo de Santiago, que lle gañou na final ao Ural da Coruña. Os enfrontamentos principian o venres 26 a partires das 18.00 horas; o sábado 27 son a partires das 10.00 horas e o domingo péchase o torneo con enfrontamentos, tamén, dende as 10.00 horas.
CULTURA
Venres 26 de xuño do 2009
O IX Gran Prix de Carrilanas e a Festa do Bosque marcan o 27 e o 28 de xuño os últimos compases das festas patronais de Carballo. Poren, na fin de semana tamén hai espazo para o deporte, coa disputa da fase final do V Torneo Internacional de Fútbol 7 Concello de Carballo, da final do Trofeo de Fútbol de Peñas ou do Trofeo Club Ciclista Carballo; ou para a música, coa celebración da XIII Mostra de Habaneras que organiza cada ano a Coral Polifónica de Bergantiños e con múltiples orquestras como a TVG ou a Olympus. O peche do programa o marcan, como vén sendo habitual, os fogos de artificio, o domingo 28 a partires das 00.00 horas e a cargo da Pirotécnica Rocha. Un punto de final para a Semana Grande de Festexos que aínda colea o luns 29 co Día do Neno, que supón descontos nas barracas e atraccións situadas no San Martiño.
SAN XOÁN 2009
Martes 23 de xuño do 2009
O mércores 24 e o xoves 25 son os días centrais, en canto a concertos, das Festas de San Xoán 2009. O grupo granadino indie-pop Lori Meyers e os arxentinos Dios salve a la reina, co seu tributo ao mítico grupo Queen, encherán cos acordes de dúas ofertas ben distintas a Praza do Concello de Carballo. Ademais, non hai que esquecer a celebración do XII Descenso do Anllóns, o xoves 25, que un ano máis animará aos veciños e veciñas co seu percorrido pola canle do río. Neste momento están inscritas 31 balsas, e a saída é no bosque do Añón (Ponte de Bértoa). Todo o descenso estará animado polos sons de Charanga.es. Pasacalles, verbenas, concertos e a degustación de chourizos ao viño no Parque do Anllóns, veñen a completar a oferta festeira para os días grandes do San Xoán.
CONCELLARÍA DE CULTURA
Luns 22 de xuño do 2009
O luns 22 de xuño principian oficialmente as Festas de San Xoán 2009, a partir das 12.00 horas co disparo das bombas de palenque. Aínda que o programa de festexos xa arrincou co festival Rockin', celebrado o 19 de xuño con grande éxito de público, o luns é o día do pregón, que este ano ten como protagonista ao humorista carballés Rober Bodegas. Os actos dan comezo ás 21.00 horas, co concerto da Banda Municipal de Música de Carballo que dirixe Vicente Pérez Planells, no que interpretarán varias pezas do seu amplo repertorio. Ás 21.30 horas será xa o momento do pregón, da man do cómico guionista e creador de contos Rober Bodegas, que comezou a súa andaina no Festival Internacional Outono de Teatro (FIOT) gañando o Certame de dramatización de monólogos cómicos no ano 2003 e tamén impoñéndose no certame de comedia 'Bienal da caricatura', de Ourense.
.jpg)