INAUGURACIÓN DO NOVO CENTRO DE PROMOCIÓN ECONÓMICA
Mércores 20 de maio do 2009
Un total de doce propostas aspiran a gañar os galardóns na segunda edición dos premios Carballo Emprende. Hai que lembrar que o concurso conta con dúas categorías: Premios a Ideas Empresariais e Premio a Programas de Fomento da Emprendeduría. No primeiro caso presentáronse un total de nove proxectos, mentres que no segundo hai tres candidaturas. O martes 19 de maio reuniuse por primeira vez o xurado para avaliar as propostas e deliberar sobre a súa decisión. Está formado polos representantes da Cámara de Comercio Carlos Fernández Bermúdez e Juan Manuel Cancela Sánchez; e, en representación do Concello, polo responsable de Promoción Económica, Xosé Manuel García Guillín e pola Axente de Emprego e Desenvolvemento Local, Paula Lema Pena.
PROGRAMA DAS LETRAS
Mércores 20 de maio do 2009
O domingo 24 de maio comeza en Carballo a IV Semana do Libro e a Lectura, unha cita organizada pola Asociación Socio-Pedagóxica Galega (ASPG) en colaboración con Caixanova e o Concello de Carballo, que pretende crear un lugar de encontro para pequenos e adultos, para nais e pais e para profesionais do ensino onde espertar a curiosidade polos libros e a lectura, o desexo por ler e buscar estratexias para desenvolver hábitos lectores e habilidades lectoras, especialmente entre os máis cativos e cativas. Nesta edición participará alumnado de todos os centros de ensino de Carballo, con un total de 992 escolares de Infantil, Primaria e ESO, ademais de todos os veciños e veciñas que o desexen. Nas últimas tres edicións un total de 3.000 escolares e arredor de 5.000 persoas teñen participado nesta cita en Carballo, un dos acontecementos relacionados co libro e a lectura "que máis xente atrae en toda Galicia", en verbas do presidente da ASPG, Xoán Costa.
OBRAS E SERVIZOS
Martes 19 de maio do 2009
Os operarios municipais veñen de principiar esta semana os traballos para mellorar as instalacións do parque infantil do Xardín Municipal da Praza do Concello de Carballo. Por ese motivo, a partir do luns 18 de maio e ata o 31 deste mes está previsto cercar a zona de xogos para poder desenvolver unhas melloras que o Concello espera que causen as menores molestias posibles. Esta actuación forma parte dun plan do Goberno municipal para avanzar no acondicionamento de espazos de uso público, situados tanto na capital municipal como nas parroquias. Está previsto realizar un investimento de arredor de 900.000 euros, dos cales preto de 500.000 servirán para acondicionar o parque de Rego da Balsa, incluíndo tamén a instalación de xogos infantís.
FONDO ESTATAL DE INVESTIMENTO LOCAL
Luns 18 de maio do 2009
Hoxe veñen de principiar os traballos de 'Urbanización e dotación de servizos na rúa Muíño', da capital municipal, unha mellora incluída nos proxectos do Fondo Estatal de Investimento Local (FEIL) e que foi adxudicada a Excavaciones y Obras Candal SL por un importe de 336.336,20 euros. Está previsto que a rúa estea cortada ao tráfico por un período aproximado de seis meses, o prazo de execución das obras, aínda que estes cortes realizaranse por tramos. Neste momento as obras estanse realizando no treito da rúa Muíño situado entre as rúas Emilio Pardo Bazán e Vázquez de Parga, onde xa se está procedendo ao levantamento do firme. Coa realización desta actuación está previsto dar emprego a 22 persoas, a metade a través de postos directos e outros 11 a través de ocupación indirecta.
CULTURA
Venres 15 de maio do 2009
Esta fin de semana continúa o Programa das Letras 2009, con diversas actividades destinadas a todos os públicos e que abranguen un amplo abano de posibilidades: contacontos, música, homenaxes, lectura ou teatro conforman unha oferta cultural centrada na festa do 17 de maio. Una das citas máis importantes é o domingo, co maratón de lectura 'As letras en voces', un dos actos de maior relevancia dos que organiza o Concello, tanto pola súa tradición como polo número de persoas que participan. Con esta actividade, lémbrase a obra dos escritores que foron homenaxeados no Día das Letras ademais de renderse un recoñecemento á lingua galega como vehículo de expresión e creación e como un dos expoñentes esenciais da nosa cultura.
OS DÍAS 20 E 21 DE MAIO
Venres 15 de maio do 2009
"O apoio ás empresas nun momento de conxuntura económica de crise", segundo as verbas do Concelleiro de Promoción Económica, Xosé Manuel García Guillín, é un dos principais obxectivos das xornadas Carballo Emprende 2009, un foro de emprendedores e oportunidades de negocio que ademais de ofrecer numerosas claves sobre a situación económica conta cuns premios que distinguen as mellores ideas para poñer en marcha unha empresa. Ademais, no marco desta iniciativa, inaugúrase o novo Centro de Promoción Económica de Carballo, un edificio municipal situado no polígono empresarial de Bértoa que centrará todas as actividades que se realicen no Concello relacionadas co mundo empresarial e que tamén servirá para coordinar as liñas de acción e os programas en materia de promoción económica.
OBRAS E SERVIZOS
Xoves 14 de maio do 2009
Os operarios principiarán o luns 18 de maio cos traballos para mellorar as instalacións do parque infantil da Praza do Concello de Carballo (na imaxe). Por ese motivo, a partir da semana que vén está previsto cercar a zona de xogos para poder desenvolver as melloras, que está previsto que duren dúas semanas, aproximadamente, e que o Concello espera que causen as menores molestias posibles. Esta actuación forma parte dun plan do Goberno municipal para avanzar no acondicionamento de espazos de uso público, situados tanto na capital municipal como nas parroquias. Está previsto realizar un investimento de arredor de 900.000 euros, dos cales preto de 500.000 servirán para acondicionar o parque de Rego da Balsa, incluíndo tamén a instalación de xogos infantís.
O CONCELLO INVITA AOS VECIÑOS A ACUDIR
Mércores 13 de maio do 2009
O Concello homenaxea ao carballés Alfredo Brañas no 150 aniversario do seu nacemento e invita a tódolos veciños e veciñas que o desexen a asistir a este acto, que ten lugar o sábado 16 de maio na Igrexa de San Domingos de Bonaval, no Panteón de Galegos Ilustres, a partires das 12.00 horas. O Concello de Carballo pon a disposición dos cidadáns que o desexen un autobús para que poidan asistir de balde a esta homenaxe que contará coa presenza do Alcalde de Carballo, Evencio Ferrero, ademais de representantes da familia Brañas, da Asociación de Escritores en Lingua Galega, do Concello de Cambados, da Real Academia Galega, da Universidade de Compostela, da Fundación Alfredo Brañas, do Concello de Santiago de Compostela e da Xunta de Galicia.
PROGRAMA DAS LETRAS
Martes 12 de maio do 2009
Máis dun centenar de caricaturas sobre os acontecementos máis sobresaíntes da historia da Autonomía Galega, os feitos que definiron esta etapa e os persoeiros que foron os seus protagonistas conforman a exposición 'A Autonomía Galega nas caricaturas de Siro López', que vén de ser inaugurada no Pazo da Cultura carballés. A mostra, incluída no Programa das Letras de 2009 e organizada pola Deputación da Coruña, recolle unha selección das viñetas que o humorista gráfico Siro publicou no xornal 'La Voz de Galicia' dende 1985 ata 2006. Trátase dun percorrido en clave de humor pola historia máis recente de Galicia. Os veciños e veciñas que queiran visitar a exposición poden facelo na sala do soto do Pazo da Cultura de 18.00 a 21.00 horas entre o 12 e o 27 de maio.
XUNTA DE GOBERNO LOCAL
Luns 11 de maio do 2009
A Xunta de Goberno Local vén de aprobar a adxudicación provisional das obras 'Edificación destinada a Escola taller de Carballo. Fase III. Cerramento Naves 1-2-3' e 'Edificación destinada a Escola Taller en Carballo. Fase IV' por un importe total de 3.720.643 euros (3.125.250 euros no caso da cuarta fase e 595.394 euros nas outras tres). No primeiro caso a empresa adxudicataria provisional é Construcciones López Cao SL, e no segundo unha Unión Temporal de Empresas (UTE) formada por Atlántica de Construcción SL e AIN Empresa de Servicios para la Construcción SL. O prazo de execución para o cerramento externo das tres naves da Casa dos Oficios do Proxecto Forum (no barrio da Milagrosa) das que xa están levantados os alicerces é de catro meses. Para a fase catro, que permitirá practicamente rematar o complexo, o prazo de execución é de quince meses.
17 DE MAIO
Xoves 7 de maio do 2009
Durante todo o mes de maio Carballo converterase nun bulir de actividades para festexar o Día das Letras, que se conmemora o 17 de maio. Os libros e a lectura terán un grande protagonismo nun completo programa de actividades, xunto con autores como Ramón Piñeiro, o escritor homenaxeado este ano 2009, e Alfredo Brañas, no 150 aniversario do seu nacemento. Contacontos, exposicións, teatro, concertos e a animación á lectura en tódalas súas expresións -contacontos, festivais,presentacións de libros- serán os protagonistas dun Programa das Letras que se estende dende hoxe, 7 de maio, ata o 31. O Alcalde de Carballo, Evencio Ferrero, e a Concelleira de Cultura, Belén Lendoiro, animan a tódolos veciños e veciñas a participar no completo abano de actividades.
REDE DE DINAMIZACIÓN DA SOCIEDADE DA INFORMACIÓN
Mércores 6 de maio do 2009
A Rede de Dinamización da Sociedade da Información, en colaboración co concello de Carballo, anuncia novas actividades de achegamento ás Novas Tecnoloxías que terán lugar no mes de maio en Carballo. Para conmemorar o 17 de maio, Día das Letras Galegas, Día de Internet e Día Mundial das Telecomunicacións e da Sociedade da Información a Rede de Dinamización levará a cabo en Carballo a actividade 'Bergantiños: pasado e presente'. Esta iniciativa está orientada ao colectivo de maiores no que retomarán o blog de 'Cóntame. lembranzas de Carballo'. Con esta actividade o que se trata é de que os e as maiores da zona que participen nos diferentes obradoiros que constitúen a citada iniciativa relaten coas súas verbas os recordos que teñen de cando eran cativos, como lembran Carballo e os seus arredores, como cambiou ... Asemade poderán subir ao citado blog fotografías que teñan gardadas na casa da comarca bergantiñán de hai anos.
.jpg)