NOVAS TECNOLOXÍAS
Martes 5 de maio do 2009
A Policía Local de Carballo conta dende hoxe cun novo sistema de comunicacións dixitais que permite coordinar as situacións de emerxencia, despregar con maior eficiencia os efectivos e obter unha cobertura total no municipio en tempo real que permitirá "axilizar as xestións da Policía" e "mellorar a calidade do servizo que se ofrece á cidadanía", segundo explica Benedito Viña, Concelleiro de Seguridade e Tráfico. Este novo sistema permitiralle á Policía Local comunicacións absolutamente fiables e confidenciais, mellorará a calidade de audición da voz con respecto á tecnoloxía usada ata o momento, permitirá ver nun mapa en tempo real posicionados todos os equipos e saber en todo momento en qué punto exacto do municipio se atopan as persoas que portan un equipo.
NOVAS TECNOLOXÍAS
Luns 4 de maio do 2009
O Telecentro de Carballo, que entrou en funcionamento hai preto de dez meses, xa conta con 584 usuarios rexistrados e un total de 370 veciños e veciñas teñen participado nos seus obradoiros -un total de 43-, destinados a promover as novas tecnoloxías entre a poboación do Concello. Son datos aportados polo propio telecentro a través de Soraya Suárez, dinamizadora da Sociedade da Información no Concello. Ao longo do mes de abril a Rede de Dinamización continuou co seu traballo labor na difusión das novas tecnoloxías coa celebración dun total de tres obradoiros tecnolóxicos, a través dos que se formaron 28 persoas e que se estenderon ao longo de 24 horas.
OBRAS E SERVIZOS
Xoves 30 de abril do 2009
O Concello de Carballo vén de inaugurar a nova Praza do Outeiro, situada na rúa da Concordia da capital municipal e fronte ao edificio dos novos xulgados. Trátase dunha obra realizada polo alumnado da Escola Obradoiro do Concello, e conta cun hórreo cedido pola familia García Facal, ademais dun parque infantil, mobiliario urbano e zonas verdes. A praza ten unha superficie total de 2.750 metros cadrados e o Alcalde, Evencio Ferrero, desexou que se converta nun novo espacio para o lecer na capital municipal e agradeceu a colaboración dos profesores e dos alumnos e alumnas da escola obradoiro na construción da praza, denominada do Outeiro debido ao nome do antigo camiño que atravesaba o lugar.
REDE XIANA
Mércores 29 de abril do 2009
O Concello de Carballo, a través da Concellaría de Formación e Emprego que dirixe María Manso, participa nun proxecto da Rede de Formación e acceso ao mundo laboral impulsada dende a Deputación provincial da Coruña. Un total de 90 concellos de toda a provincia poñen en marcha a Rede Xiana (de Xestión Integral, Accesibilidade, Novas Tecnoloxías e Adaptabilidade no mercado laboral galego), co obxectivo de fomentar o emprego, mellorando a formación e capacitación profesional das persoas desempregadas. Está iniciativa está dirixida a municipios de menos de 50.000 habitantes, e o Concello carballés foi seleccionado para impartir varias actividades formativas.
TRES APOSTAS DISTINTAS DURANTE A FIN DE SEMANA
Mércores 29 de abril do 2009
O programa cultural Primavera EnDanza chega á súa fin esta fin de semana con tres apostas ben diferentes e chegadas de Galicia e Cataluña. O xoves 30 de abril unha lembranza dos anos 20 plasma o universo feminino con BStudio Danza e ‘Sono Silente’. O Venres 1 de maio a compañía catalana Nats Nus Dansa conta a historia de Tari, un estraño personaxe, nunha proposta feita para conmover e chea de sensibilidade. Trátase do espectáculo ‘Momentari’, unha aposta dirixida especialmente para os máis cativos e cativas pero no que tamén hai espazo para sorprender aos adultos. Por último, o broche final corre a cargo do Centro Coreográfico Galego, con ‘Giseliña’, o domingo 3 de maio. Nesta representación baseada no ballet clásico, o coreógrafo Cisco Aznar converte o romanticismo en surrealismo, achegándose ao imaxinario galego. Tódolos espectáculos custan 3,5 euros, 2,5 con desconto.
TRECE ACTUACIÓNS E 205 POSTOS DE TRABALLO
Martes 28 de abril do 2009
O Concello de Carballo vén de anunciar o comezo das obras nos proxectos incluídos no Fondo Estatal de Investimento Local, un total de 13 actuacións que contan cun orzamento global de 5.327.070 euros e que suporán a creación de 205 postos de traballo, entre persoas xa ocupadas e integradas nas empresas adxudicatarias dos traballos e persoas ocupadas de nova contratación exclusivamente para o desenvolvemento destas obras. Trátase de proxectos "para cubrir numerosas demandas", en verbas do Alcalde, Evencio Ferrero, e que prentenden "redundar na mellora da calidade de vida dos carballeses e carballesas". O Subdelegado do Goberno, José Manuel Pose Mesura, visitou a vila para ver os traballos de primeira man e quixo subliñar a selección de melloras realizada polo goberno local "con amplitude de miras e con proxectos que pretenden compensar o centro urbano e a zona rural".
SESIÓN PLENARIA ORDINARIA
Martes 28 de abril do 2009
A corporación carballesa vén de celebrar unha sesión plenaria ordinaria na que un dos principais puntos da orde do día foi a aprobación dunha operación de crédito de 2,5 millóns de euros para completar o apartado de investimentos reais do orzamento de 2009. Grazas a este empréstito, que será subscrito con Caixa Galicia, entidade financeira que presentou a mellor oferta, está previsto financiar en parte o proxecto de renovación do mercado municipal ou continuar coa construción do centro de dinamización Fórum Carballo, situado na Milagrosa. Así mesmo, asumirase a achega municipal necesaria para mellorar a travesía de Malpica e afrontaranse outros gastos relacionados con melloras urbanísticas ou a creación de dúas novas Galescolas municipais, entre outras actuacións.
XUNTA DE GOBERNO LOCAL
Luns 27 de abril do 2009
A Xunta de Goberno Local vén de aprobar na sesión ordinaria desta semana a solicitude dunha subvención ante a Vicepresidencia da Igualdade e do Benestar por un importe total de 6.000 euros para elaborar o III Plan de Igualdade do Concello de Carballo. A administración local concorre a unha convocatoria pola que se regulan as axudas para dinamizar o compromiso coa igualdade entre mulleres e homes. No mesmo apartado de subvencións, a Xunta de Goberno aprobou solicitar á Deputación Provincial unha axuda para a limpeza de praias por un importe de máis de 31.000 euros.
SESIÓN ORDINARIA
Venres 24 de abril do 2009
A corporación de Carballo celebra o luns 27 de abril unha nova sesión plenaria ordinaria. A orde do día contempla, entre outros asuntos, a adxudicación da operación de crédito que acomete o Concello de Carballo e mais as dacións de conta da liquidación do orzamento 2008.
CONCELLARÍA DE CULTURA
Venres 24 de abril do 2009
Os espectáculos de sala do programa Primavera EnDanza comezan esta fin de semana con dúas apostas ben distintas. Por unha banda, hoxe venres a compañía galega Entremáns aposta polo movemento, a fusión co mundo sonoro e a modernidade con 'Concerto Desconcerto'; por outra, chega dende Madrid o Ballet de Carmen Roche para representar, o domingo, unha versión do popular conto de Andersen 'El patito feo', neste caso cunha proposta máis familiar, con mestura de estilos como o hip-hop ou o baile máis clasico para todos os públicos.
ONCE ACTUACIÓNS
Xoves 23 de abril do 2009
O Plan Especial de Infraestruturas do Medio Rural aprobado en 2008 está próximo a completar o seu programa de obras. A través deste PEIM, o Concello de Carballo quere mellorar a calidade do transporte e as comunicacións nas áreas rurais do municipio. A día de hoxe, a meirande parte das actuacións xa están finalizadas e as poucas restantes atópanse xa en período de execución.
DOMINGO 19 DE ABRIL
Venres 17 de abril do 2009
A organización da III Carreira Pedestre Costa da Morte, que transcorre en Carballo o domingo 19 de abril, informa de que hai máis de mil persoas inscritas para participar nesta multitudinaria cita deportiva. Trátase dunha cita que aglutina a tódolos municipios das comarcas de Bergantiños, Soneira e Fisterra e que contará con participantes de categorías benxamín, alevín, infantil, cadete e xuvenil, ademais de adultos, tanto masculina coma feminina. Nesta edición serán repartidos máis de 4.000 euros, cincuenta trofeos e dez lotes de agasallos. Ademais, este ano creouse o premio ao mellor colexio, que estará dotado dun lote de material deportivo. Os mellores clasificados de Costa da Morte e Carballo serán tamén agasallados.
.jpg)