.jpg)
Inicio Carballo ao día Hemeroteca
Venres 6 de xullo do 2007
Este venres, 6 de xullo, terá lugar na praia de Razo o acto de izada da bandeira azul que ondeará no litoral carballés durante a época estival. A colocación deste distintivo terá lugar ás 16,00 horas e significa para o areal de Razo o cumprimento de requisitos de calidade de augas, servizos e realización de actividades de información, educación e xestión ambiental.
Venres 6 de xullo do 2007
O Salón de Plenos do Concello de Carballo acolleu onte xoves, 5 de xullo, a primeira sesión plenaria da lexislatura, de carácter extraordinario. O punto referente ás dedicacións exclusivas e retribucións monopolizou o debate entre goberno e oposición. A proposta saíu adiante cos doce votos a favor do grupo de goberno (BNG e PSOE) e os votos en contra da oposición (PP e TEGA). Estes últimos calificaron de inxustificable o aumento de dedicacións exclusivas en relación á pasada lexislatura, mentres que desde o goberno defendeuse a necesidade da medida para a importancia do municipio.
Venres 6 de xullo do 2007
A concelleira de Cultura, Belén Lendoiro, presentou esta mañá no Pazo da Cultura o programa do Verán Cultural do Concello de Carballo, que se vai desenvolver durante os meses de xullo e agosto na localidade. A música, o teatro, a danza e a maxia son os protagonistas dun extenso e variado programa pensado para todas as idades, dividido en dez xornadas e sumando un total de 20 actuacións. A maior parte das actividades desenvolveranse ao aire libre, sendo a Praza do Concello e o Xardín Municipal os referentes para disfrutar das mesmas. Dúas exposicións e outras actividades novas, como a I Xira Galega Karting Indoor ou a segunda feira literaria Praza dos Libros completan o programa.
Xoves 5 de xullo do 2007
Preto de 400 maiores do concello de Carballo participarán este sábado, 7 de xullo, do II Encontro para os nosos Maiores no Carballiño, Ourense, que organiza a Vicepresidencia da Igualdade e do Benestar. O prazo de inscrición mantívose aberto até finais da pasada semana, recibíndose unha grande cantidade de solicitudes tanto nos Servizos Socias do Concello coma no Pazo da Cultura.
Xoves 5 de xullo do 2007
O Salón de Plenos do Concello de Carballo acolle este xoves, a partir das 20,30 horas, a primeira sesión plenaria da presente lexislatura. Trátase dunha convocatoria extraordinaria que conta con nove puntos na orde do día e que servirá, entre outros asuntos, para a constitución dos grupos políticos, determinar a periodicidade das sesións ordinarias do pleno ou propor os cargos da corporación en réxime de dedicación exclusiva e retribucións. En relación a este último punto, a proposta que se levará a pleno contempla cinco dedicacións exclusivas e tres parciais.
Mércores 4 de xullo do 2007
O ciclo Noites de Cine, que se desenvolve ao longo dos meses de xullo e agosto dentro do programa do Verán Cultural do Concello de Carballo, bota a andar este mércores, 4 de xullo, coa proxección da película Pérez, o ratiño dos teus soños, na praza do Chorís. A proxección, que se realiza en colaboración coa deputación da Coruña, terá lugar ás 22,30 horas e será en galego.
Mércores 4 de xullo do 2007
O Grupo Municipal de Intervención Rápida de Carballo tivo que participar en 24 emerxencias durante o pasado mes de xuño, que arroxou un total de 127 intervencións. No tocante ás emerxencias, destacan en Carballo 17 por accidentes de tráfico e limpezas, 3 por limpezas de estradas, 2 por incendios urbáns e un incendio forestal.
Mércores 4 de xullo do 2007
O Tribunal Superior de Xustiza de Galicia ven de admitir a trámite o recurso presentado polo Concello de Carballo ante a sentencia pola que se anulaba o acordo plenario de 20 de maio de 2003, no que o Plan Xeral de Ordenación Municipal de Carballo era aprobado por unanimidade da corporación municipal. O Concello conta agora cun prazo dun mes para interpoñer recurso ante o Tribunal Supremo e, con posterioridade, saber se este o admite ou non a trámite.
Martes 3 de xullo do 2007
Este mércores, 4 de xullo, iniciarase a programación do Verán Cultural do Concello de Carballo co ciclo Noites de Cine. A primeira proxección realizarase na praza do Chorís, a partir das 22,30 horas, coa película Pérez, el ratoncito de tus sueños, en colaboración coa Deputación da Coruña.
Martes 3 de xullo do 2007
O vindeiro xoves, 5 de xullo, dará comezo un dos tres obradoiros que levará a cabo a Rede de Dinamización da Sociedade da Información en Carballo ao longo deste mes. As temáticas que se desenvolverán nestes obradoiros seguen a mesma liña dos realizados con anterioridade: iniciación á informática, internet e correo electrónico. O obxectivo é o de dar un paso adiante na alfabetización dixital da poboación do concello. As sesión levaranse a cabo en horario de mañá na Aula Informática Municipal, nas Antigas Escolas do Xardín.
Martes 3 de xullo do 2007
O alcalde de Carballo, Evencio Ferrero, e os portavoces das diferentes formacións políticas do Concello, Benedico Viña polo BNG, José Antonio Viña polo PSOE, Alberto Sueiro polo PP e Manuel Andrade por TEGA, mantiveron esta mañá unha xuntanza para analizar os temas a abordar na sesión plenaria extraordinaria a celebrar o vindeiro xoves, ás 20,30 horas, na Casa do Concello. Será o primeiro pleno da lexislatura e contará con nove puntos na orde do día, entre os que destacan as propostas de comisións informativas permanentes, representación da corporación en órganos colexiados ou os cargos da corporación en réxime de dedicación exclusiva e retribucións.
Luns 2 de xullo do 2007
Dúas mulleres e os seus fillos, do concello de Carballo, están a disfrutar dunha estancia de dez días na costa mediterránea con todos os gastos pagados. Ambas fixeron a solicitude no Centro de Información á Muller para participar dun programa que requería que tiveran fillos e fillas , de entre 2 e 12 anos, exclusivamente ao seu cargo.