INDUSTRIA
Martes 10 de abril do 2007
O primeiro trimestre do ano 2007 segue a confirmar a alza espectacular na tramitación de licenzas para a construción de vivendas en Carballo. No núcleo urbano xa se tramitaron licenzas para a construción de bloques de edificios para 290 vivendas, unha cifra que case triplica ás solicitadas o ano pasado no mesmo período. Nas zonas de núcleos rurais, as solicitudes de licenzas ascenden a 12 para vivendas unifamiliares. En total, son 302 vivendas no concello neste primeiro trimestre de ano, unha cifra moi superior á rexistrada no primeiro semestre de 2006, cun total de 124 licenzas.
MULLER
Luns 9 de abril do 2007
O Centro de Información á Muller ven de abrir o prazo para anotarse no curso de Risoterapia e Relaxación que se celebrará desde o 26 de abril até o 21 de xuño no Pazo da Cultura. O curso impartirase os xoves, en oito sesións dunha hora e media de duración cada unha, en horario de 20,00 a 21,30 horas. O número de prazas é limitado a vinte persoas en cada curso, vai dirixido a toda a poboación, pero Terán preferencia aquelas persoas que nunca asistiran ao curso.
SERVIZOS
Luns 9 de abril do 2007
A sesión plenaria ordinaria deste mes de abril incluirá na súa orde do día o proceso de contratación para a creación dunha primeira fase do carril bici entre Carballo e Razo. Este primeiro tramo cubriría o traxecto entre Carballo e a ponte de Oza, o que suporá o primeiro paso para a unión das dúas localidades.
CULTURA
Luns 9 de abril do 2007
O Pazo da Cultura acolleu este luns, 9 de abril, a presentación das Xornadas Balnearios: historia, economía, cultura e saúde, que se desenvolverán os días 13 e 14 de abril en Carballo. Esta segunda edición das xornadas sobre a historia local, logo da celebración dunhas referentes ao Wolframio o ano pasado, céntrase nun aspecto funadamental da historia de Carballo, como son as augas termais. As xornadas son abertas ao público e a matrícula é gratuita. No acto de presentación participaron o alcalde de Carballo, Evencio Ferrero, a concelleira de cultura, Belén Lendoiro, o escritor, Xan Fraga e o presidente da Asociación Socio Pedagóxica Galega, Xoán Costa.
HOSTALARÍA
Mércores 4 de abril do 2007
O Concello de Carballo ven de abrir a prazo para solicitar a ocupación do dominio público local con terrazas de hostalaría. Os interesados en instalar unha terraza nos seus negocios deberán ter en conta as normas reguladoras da Ordenanza correspondente, podendo recoller o impreso para formular a solicitude no propio Concello. O prazo permanecerá aberto até o día 30 de abril de 2007.
NOVAS TECNOLOXÍAS
Mércores 4 de abril do 2007
O vindeiro martes, 10 de abril, dará comezo un novo obradoiro de Iniciación á Informática e Internet en Carballo, da man da Rede de Dinamización da Sociedade da Información. Os interesados nesta e outras temáticas vinculadas ás Novas Tecnoloxías da Información e a Comunicación poden achegarse á Aula de Informática ou chamar ao teléfono 981 757 362 para informarse. O horario de atención ao público é de 10,00 a 14,00 horas, de luns a venres.
LECER
Mércores 4 de abril do 2007
A celebración de Panxea 2007, un festival que se celebrará en Carballo os días 6 e 7 de abril e no que o pan será o protagonista, será un dos maiores atractivos da localidade durante as festas de Semana Santa. Baixo o lema de Pan e solidariedade, nesta primeira edición da Feira solidaria o obxectivo de colaboración está situado nos campamentos de refuxiados saharauis. Os fondos recadados no evento serán destinados a fariña para pan e material musical educativo para as escolas de nenos e nenas con necesidades educativas especiais da Uilaia de Smara.
CULTURA
Martes 3 de abril do 2007
A terceira edición do Premio a artigos xornalísticos normalizadores do Concello de Carballo, que outorga un primeiro premio de 1.000 euros e un segundo de 350, realízase desde 2005 e en colaboración con oito medios de comunicación escritos, que publicarán os dous artigos gañadores. Esta iniciativa convócaa a Concellaría de Cultura, Ensino e Normalización Lingüística, desde o Servizo de Normalización Lingüística municipal do Concello de Carballo, entidade comprometida coa dinamización social do uso do galego, e busca os obxectivos de promover a reflexión sobre a situación social da lingua galega e de crear espazos nos xornais para analizar esta situación. O prazo de presentación de artigos remata o 18 de abril de 2007.
COMERCIO
Martes 3 de abril do 2007
Ao fío da da colaboración coa Dirección Xeral de Comercio e o convenio coa empresa nacional Mercasa, o Concello de Carballo organizou no Pazo da Cultura unha xornada sobre o presente e futuro dos mercados e o comercio, unha iniciativa que perseguía dar os primeiros pasos de cara a definir a estratexia a seguir para convertir o mercado municipal de Carballo na locomotora do comercio da localidade. A directora xeral de Comercio, Ana Rúa, asegurou no desenvolvemento da xornada que a Consellería de Innovación e Industria prestará a súa colaboración no proceso de renovación do mercado, do que se expuxeron as claves e ideas fortes durante a súa celebración. Medio centenar de empresarios acudiron á celebración desta xornada, da que tamén participaron representantes das formacións políticas da corporación municipal.
URBANISMO
Martes 3 de abril do 2007
O alcalde de Carballo, Evencio Ferrero, o concelleiro de Urbanismo, Manuel Andrade, e o concelleiro de Facenda, José Antonio Viña, celebraron este martes unha xuntanza en Santiago co director xeral de Urbanismo, Ramón Lueje. O obxectivo da mesma era a de valorar a situación xurídica actual xerada logo da sentencia do Tribunal Superior de Xustiza de Galicia que anula o Plan Xeral de Ordenación Municipal de Carballo, ademáis da situación actual do planeamento do Concello de cara á futura revisión do documento urbanístico.
BALANCE MENSUAL
Luns 2 de abril do 2007
O Grupo Municipal de Intervención Rápida de Carballo tivo que participar en 33 emerxencias durante o pasado mes de marzo, que arroxou un total de 126 intervencións. No tocante ás emerxencias, destacan en Carballo 11 por accidentes de tráfico e limpezas, 19 por limpezas de estradas, 2 por incendios urbáns e un incendio nun vehículo.
COMERCIO
Luns 2 de abril do 2007
O Pazo da Cultura acolle este luns, 2 de abril, a celebración dunha xornada sobre Os mercados e o comercio. Presente e futuro. A directora xeral de comercio da Xunta de Galicia, Ana Rúa, e o alcalde de Carballo, Evencio Ferrero, serán os encargados de inaugurar a xornada ás 19,00 horas. Ana Rúa, precisamente, visitara recentemente o mercado de abastos de Carballo para coñecer a súa situación. A xornada prolongarase até ás 22,00 horas, hora prevista para o acto de clausura, coa celebración de cinco ponencias.
.jpg)