RELACIÓNS INSTITUCIONAIS
Mércores 21 de setembro do 2005
O vicepresidente da Igualdade e do Benestar, Anxo Quintana, mantivo un encontro co alcalde de Carballo, Evencio Ferrero, e cos concelleiros delegados de Urbanismo, Manuel Andrade, e de Facenda, José Antonio Viña, no que se lle presentaron diversos proxectos sobre os que anunciou o compromiso da Xunta de Galicia. Anxo Quintana sinalou tamén a súa vontade "de que o goberno tripartito de Carballo siga xerando proxectos ilusionantes para o concello".
RELACIÓNS INSTITUCIONAIS
Martes 20 de setembro do 2005
O alcalde de Carballo, Evencio Ferrero, acompañado dos concelleiros delegados de Urbanismo, Manuel Andrade, e de Facenda, José Antonio Viña, manterán unha reunión co vicepresidente da Igualdade e do Benestar, Anxo Quintana, na que lle presentarán un plan estratéxico para o desenvolvemento de Carballo a curto e medio prazo. O obxectivo deste encontro é "demandar o apoio do goberno galego", segundo indicou o alcalde.
DEPORTE
Martes 20 de setembro do 2005
O alcalde de Carballo, Evencio Ferrero, asina o mércores 21 de setembro a acta de recepción da segunda fase das obras de acondicionamento da zona do Chorís. As novas instalacións - construídas co orzamento municipal - enmárcanse no obxectivo de primar investimentos en espazos educativos do Concello, "posto que a educación pública é unha das prioridades do Goberno municipal", segundo explicou o alcalde.
ESPECTÁCULOS
Martes 20 de setembro do 2005
O alcalde de Carballo, Evencio Ferrero, e o director de Caixanova en Carballo, José Ulfe Bugallo, presentaron a obra Un home de sorte, no que colabora tamén a Deputación da Coruña. O espectáculo, que terá lugar o xoves 29 de setembro, está protagonizado polo coñecido actor Juan Luis Galiardo.
ENSINO
Luns 19 de setembro do 2005
O Concello de Carballo aprobou definitivamente o regulamento do Consello escolar municipal, co que se pretende implicar os colectivos sociais relacionados na elaboración e execución da política educativa municipal. O obxectivo da creación deste organismo de asesoramento e consulta é o de asegurar a fluidez de comunicación entre os centros de ensino e o goberno municipal para "continuar ofrecendo un ensino de calidade", segundo se explica no texto do regulamento.
ACTO DIVULGATIVO DA PER LOCA MARÍTIMA
Luns 19 de setembro do 2005
A Concellaría de Turismo organiza, en colaboración co colectivo Avante Costa da Morte, unha conferencia para promocionar e pór en valor a Per loca marítima, o roteiro romano que ía de Braga a Lugo cun punto de encontro destacado en Carballo. A cita será o sábado 24 de setembro ás 12:00 no Pazo da Cultura.
XUNTA DE GOBERNO LOCAL
Xoves 15 de setembro do 2005
A Xunta de Goberno local de Carballo aprobou durante a súa reunión do 15 de setembro, as bases xerais para a provisión de catro prazas de funcionarios incluídas na oferta de emprego público do Concello para o ano 2005. O Goberno municipal pretende que esta incorporación de persoal cualificado sirva para modernizar a administración local e mellorar o servizo que se lle ofrece aos cidadáns, para o que se introducirán elementos obxectivos no proceso de selección dos aspirantes.
XUNTA DE GOBERNO LOCAL
Xoves 15 de setembro do 2005
O Concello de Carballo acordou - durante a sesión da Xunta de Goberno local do 15 de setembro - adxudicar subvencións ás Asociacións de Nais e Pais de Alumnos (anpa) para a realización de actividades durante o ano 2005, por importe un total de 7.000 euros. Así mesmo, decidiu adxudicar axudas a a diversos centros de ensino para a realización de viaxes culturais no ano 2005. O total destas subvencións ascende a 7.060 euros.
OBRAS DE ACONDICIONAMENTO
Xoves 15 de setembro do 2005
O alcalde de Carballo, Evencio Ferrero, recibiu os delegados provinciais de Medio ambiente e de Pesca, así como os axentes sociais implicados no proxecto medioambiental Razo - Baldaio. Durante a reunión que mantiveron chegaron a un acordo para comezar a executar a primeira fase antes de finais de ano. Dende o Concello sinalouse que con este acordo quedou desbloqueado o proxecto.
VISITA INSTITUCIONAL
Xoves 15 de setembro do 2005
O alcalde de Carballo, Evencio Ferrero, acompañado doutros membros da Corporación municipal recibiu a visita da delegada provincial de Vicepresidencia da Igualdade e do Benestar, Tereixa Novo. Tras a recepción oficial na Casa do Concello, a delegada provincial visitou diversas instalacións municipais.
CALIDADE DOS AREAIS
Mércores 14 de setembro do 2005
As zonas de baño de Carballo contan coas condicións óptimas segundo se desprende dos resultados das mostraxes realizadas nos meses de xullo e agosto polos técnicos da Dirección Xeral da Saúde Pública. Na última análise, remitida ao Concello o 29 de agosto, as catro zonas obxecto de estudo - a ría de Baldaio e as praias de Razo, Baldaio e Pedra do Sal - non presentaban ningún tipo de deterioro.
CONTRATACIÓN
Mércores 14 de setembro do 2005
O Concello de Carballo anuncia os concursos públicos, por procedemento aberto, de cinco contratos relacionados con proxectos municipais. As convocatorias están á disposición dos interesados na páxina web municipal e estarán abertas ata o luns 26 de setembro.
.jpg)