PROMOCIÓN LINGÜÍSTICA
Venres 16 de decembro do 2005
O Concello de Carballo, dentro da campaña Incrementa o teu interese e en colaboración coa Mesa pola Normalización Lingüística, quere contribuír a potenciar o uso normalizado do galego na actividade comercial do Nadal. Con este fin vai distribuír entre os comercios da localidade 31.200 etiquetas adhesivas para utilizar nos envoltorios dos agasallos co lema Cos meus mellores desexos. O obxectivo principal da iniciativa é o de seguir avanzando no proceso de incorporación e implantación do galego no sector do comercio.
CULTURA
Xoves 15 de decembro do 2005
O Pazo da Cultura acolle este xoves, 15 de decembro, a presentación do libro A Memoria de Carballo dos escritores Xan Fraga e Carlos Díaz Martínez. Trátase dunha monografía na que se fala da historia de Carballo e dos elementos vinculados á súa memoria, como o río Anllóns, a poboación, a música, a arquitectura ou a economía. Ademáis, o acto contempla a presentación dunha serie de fotografías a modo de postais que ilustran os elementos mencionados.
EDUCACIÓN
Xoves 15 de decembro do 2005
A necesidade de impulsar a Escola de Idiomas de Carballo foi un dos temas que abordou o alcalde da localidade, Evencio Ferrero, nunha entrevista co Delegado Provincial de Educación. O rexedor local fixo saber a necesidade de que a Escola de Idiomas sexa recoñecida oficialmente e que se introduzan novos idiomas para os cursos sucesivos. O Delegado Provincial de Educación entendeu a situación plantexada polo alcalde de Carballo e a necesidade de darlle un impulso á Escola de Idiomas durante o vindeiro ano.
EN MENOS DE SEIS MESES
Xoves 15 de decembro do 2005
Dende que botara a andar, a comezos do mes de xullo, a web municipal recibiu un total de 250.000 consultas. Polo de agora, outubro foi o mes que rexistrou unha maior afluencia de usuarios, acadando máis de 58.000 visitas. A web www.carballo.org afianzouse xa como unha referencia informativa para os habitantes do municipio.
POLÍGONO DE BÉRTOA
Xoves 15 de decembro do 2005
O Concello de Carballo segue a dar pasos na tramitación dunha nova ampliación de solo industrial no Polígono Industrial de Bértoa. O alcalde de Carballo, Evencio Ferrero, plantexou nunha xuntanza en A Coruña, ante o presidente de Xestur Coruña, Luis Barcia, e o Delegado Provincial de Vivenda e Solo, Juan Carlos Bascuas, a necesidade de seguir desenvolvendo o polígono industrial de Bértoa, coa realización dunha nova ampliación que complemente ás 74 hectáreas que se están a desenvolver na actualidade.
INSCRICIÓN PADROAL
Mércores 14 de decembro do 2005
O vindeiro xoves, 22 de decembro, remata o prazo de renovación do padrón para os primeiros 274 habitantes sen residencia permanente -extranxeiros non comunitarios-. O Concello de Carballo fai un chamamento a todos aqueles que aínda non pasaron a renovar a inscrición padroal, para que o fagan antes de cumplirse o prazo.
CULTURA
Mércores 14 de decembro do 2005
O videniro venres, 16 de decembro, remata o ciclo de conferencias do programa Aprender para Educar, dirixido a pais e nais do concello de Carballo. A conferencia Como facer lectores organizada pola Concellaría de Ensino e pola Asociación Sociopedagóxica Galega celébrase o venres a partir das 20.00 horas no Pazo da Cultura, cunha charla a cargo de Carme Loriga Tomé, licenciada en Psicoloxía e responsable da biblioteca Uxío Novoneyra do IES Anxel Casal.
LECER
Mércores 14 de decembro do 2005
O Concello de Carballo, en colaboración con Creativa Dixital, Grupo Gadisa e a Secretaría Xeral para o Deporte, habilitará estas festas do Nadal unha pista de xeo na localidade. O Pavillón Bergantiños convertirase nun punto de encontro para familias de toda a comarca, que poderán disfrutar dun servizo exclusivo, ata agora, ás grandes cidades. Desde o vindeiro luns 19 de decembro, e ata o 15 de xaneiro, abrirase ao público a instalación, onde se poderán alugar os patíns en perfecto estado e recibir asesoramento por parte dos monitores que velan porque todo se desenvolva con normalidade.
XUNTANZA
Martes 13 de decembro do 2005
O Concelleiro delegado de Urbanismo, Manuel andrade, mantivo unha reunión co Conselleiro de Presidencia, José Luis Méndez Romeu, na que lle trasladou varias demandas en materia de, fundamentalmente, comunicación e infraestructuras. Unha estrada de circunvalación, o enlace da AG-55 con Razo e Baldaio, a promoción de solo industrial, a necesidade dun hospital comarcal, unha zona deportiva no Bosque ou as resolucións das modificacións urbanísticas pendentes no concello foron algunhas das principais demandas que trasladou o Concelleiro de Urbanismo nesa xuntanza mantida en Santiago.
OBRAS
Martes 13 de decembro do 2005
O alcalde de Carballo, Evencio Ferrero, ven de manter unha xuntanza co Director Xeral de Estructuras e Infraestructuras Agrarias, Xosé Carballido Presas, para coñecer os plans de Medio Rural ao respecto das obras a desenvolver nun Plan para 2006. A xuntanza respondiu á necesidade do Concello de centrarse en obras que contribúan a fixar poboación e podan crear elementos de dinamización do mundo rural, sempre vinculados ao sector productivo.
LECER
Martes 13 de decembro do 2005
O Concello de Carballo porá en funcionamento, ata mediados do vindeiro mes de xaneiro, unha pista de xeo na localidade. Este martes, 13 de decembro, terá lugar na Casa do Concello a presentación do proxecto, acto no que ademáis do alcalde da localidade estará presente a Delegada Provincial de Cultura e Deporte, Milagros Lantes.
XUNTA DE GOBERNO LOCAL
Luns 12 de decembro do 2005
A Xunta de Goberno Local aprobou, na Xunta de Goberno Local do luns 12 de decembro, a autorización de tres novos vaos permanentes en distintas zonas do municipio de Carballo. Estas solicitudes de licenza, que se suman outras xa autorizadas en sesións anteriores, estanse a realizar a raíz da campaña de inspección dos vaos irregulares nas vías urbanas de Carballo. As novas licenzas de vado permanente correspóndense coas rúas Rosas, Gran Vía e Vila de Noia.
_(535_x_143_px).jpg)
