.jpg)
Carballo está presente no encontro "Mulleres e cultura urbana", que se celebra os días 3 e 4 de setembro na Cidade da Cultura
A técnica de Turismo, Maite Parga, participa o venres nunha mesa redonda sobre feminismos e boas prácticas
Xoves 2 de setembro do 2021 Cultura
A Cidade da Cultura de Galicia acolle do 3 ao 4 de setembro a celebración do encontro Mulleres e Cultura Urbana, un evento impulsado por 7H Cooperativa Cultural co apoio do Fondo de Proxectos Culturais Xacobeo 2021 que procura fomentar o intercambio de experiencias, a creatividade colectiva e o espírito crítico na abordaxe das desigualdades de xénero no sector.
Esta segunda edición do encontro busca consolidar a iniciativa e convertela en referente iberoamericano na promoción da cultura urbana como patrimonio cultural contemporáneo desde unha perspectiva innovadora e feminista.
Mulleres e Cultura Urbana propón en 2021 dúas xornadas de análise, exhibición e creación artística colectiva en clave de xénero arredor da cultura urbana galega. O programa de actividades, dirixido tanto a profesionais do sector como a público mozo e familiar, combina propostas de experimentación creativa nos eidos do graffiti, a música, o baile e o deporte co diálogo, a reflexión e o intercambio de experiencias.
Deste xeito, o encontro ten como obxectivos:
- Propiciar a difusión de creacións culturais e artísticas ligadas á cultura urbana en Galicia.
- Darlle visibilidade á presenza da muller na cultura urbana e analizar de xeito colectivo as desigualdades de xénero presentes neste sector.
O encontro divídese en dúas xornadas que se complementan, unha de carácter teórico e formativo (o venres no Auditorio 1 Edificio CINC) e outra orientada á creación experimental e cun espírito máis lúdico (o sábado, no Xardín do Teatro). Na primeira delas estará presente o proxecto de arte pública do Concello de Carballo, do que falará a técnica de Turismo, Maite Parga. Na ligazón inferior tes toda a info.