.jpg)
Comezan de novo, cun día máis de duración, os cursos para axudar ás persoas maiores a usar os teléfonos móbiles
Máis de 120 persoas participaron nos dez obradoiros celebrados este ano coa colaboración da Cruz Vermella
Mércores 18 de outubro do 2023 Benestar
Volven os cursos para axudar ás persoas maiores a mellorar o uso dos teléfonos móbiles. Este martes comezamos o undécimo do ano, nesta ocasión no mercado municipal. Como en todas as edicións anteriores, os grupos son reducidos para conseguir un mellor aproveitamento das sesións, e con esa mesma finalidade ampliamos un día a duración dos obradoiros, de xeito que, en total, constarán de oito horas, repartidas en catro sesións de dúas horas cada unha (martes e mércores, de 16.00 a 18.00 horas).
O Concello de Carballo volve a contar coa Cruz Vermella para achegar ás persoas participantes os coñecementos básicos sobre o funcionamento dos dispositivos e as aplicacións que lles poden resultar de máis utilidade no seu día a día, como enviar unha fotografía a un familiar ou pedir unha cita para o médico sen necesidade de chamar ou achegarse ata o centro de saúde.
Neste 2023 levamos celebrado xa dez cursos, cunha participación total de máis de 120 persoas. Os obradoiros leváronse a cabo nos centros sociais de Aldemunde, Rus, Vilela e A Brea. Na zona urbana houbo cinco, un na Escola de Arrabaldes e catro no mercado municipal, no que xa está en marcha o quinto do ano.
Esta actividade, que puxemos en marcha no ano 2019 con moitísimo éxito, forma parte xa da oferta permanente das concellarías de Terceira Idade e Servizos Sociais, de maneira que o prazo está aberto durante todo o ano e os cursos vanse organizando cando se reúne un número mínimo de participantes. As persoas interesadas poden anotarse a través das asociacións de cada parroquia e/ou dos consellos parroquiais, na Biblioteca Rego da Balsa ou enviando un correo electrónico a comunicacion@carballo.gal.