ENSINO

Aberto o prazo de inscrición na Escola Oficial de Idiomas de Carballo

Xoves 28 de xuño do 2007

Para acceder ás ensinanzas de idiomas será requisito ter cumpridos 16 anos no ano natural en que comecen tales estudos. Ademais, poderá acceder aquel alumnado con 14 anos cumpridos que desexe matricularse nun idioma distinto do que estea a cursar na educación secundaria obrigatoria, para o que deberá achegar certificación da secretaría do centro onde estea matriculado con mención expresa da lingua estranxeira que cursa como primeiro idioma. Estas condicións de acceso non se aplicarán ao alumnado que xa estivera matriculado en réxime oficial no curso 2006/2007.

O título de bacharel dará acceso ao primeiro curso do nivel intermedio de primeira lingua estranxeira cursada no bacharelato. Isto non suporá, en ningún caso, a expedición do certificado do nivel básico. O alumnado con coñecementos previos do idioma poderá incorporarse ao segundo curso do nivel básico ou ao primeiro curso do nivel intermedio mediante probas de clasificación. O alumnado que dispoña das titulacións ou certificados acreditativos de ter coñecementos do idioma no que solicita praza terá acceso ao segundo curso de nivel básico ou ao primeiro curso do nivel intermedio, segundo as equivalencias establecidas.